رواية عاجر الفصل الخامس 5 بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الخامس 5 بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الخامس 5 بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٥

تبسمت : هلا بيك خوية بس شو جاي حامي ، خير ؟ 

- لا شني مرة تطلع تكعد بيت ليوحدها ماكو زلم شنكول اختنا ماخذتلها وكاعدة وحد تطلع واتطب على حل شعرها 

-جا خوية الزلم العدي وين جانت من جنت عد بيت عمي سنة ما تدرون بحالي ميتة عايشة 

-اي هناك ابيت عمي فوك راسج زلمة يكسر راسج لو غلطتي 

-جا هي الزلم بس بالتكسر والغلط وينها الزلم التحوي وتلم لحمها عايفني ابيت نصه زلم ولد عمي محرمين عليه لو لا ؟ يحلون علي لو لا جا تخاف عليه من الشارع ما تخاف علي اغلط واني بنص المحرمين ؟ 

ما شالتك غيرتك واجيتني وكتلي ما ارضى تكعدي ويا ولد عمي تعاي نتعاون اني وياج ونأجر مو اخير ما انام واتمدد بنصهم 

-هسه خر** لا تاكلين كعدة لوحدج ما تكعدين راح اكعد هنا .. وهذا الباب ما توصليله اذا مو بعلمي .. ارضى اتطلعين ما ارضى اكسر ظهرج لو عتبتي 

-لا خوية جا نتخارب انا مرة جاي اشتغل وروحاتي للسوك هواي ونسوان هواي من منطقة عمي يخابرني على خياط خوما شيجيبهن لهنا غير اروحلهن 

-تروحيلهن شني واحنه نديح خاطر نخيط للوادم 

-يلا الله وايدك كل الهلا بيك انعل ابو الخياط لابو المكينة وفي فلوس البيت خوية وانطيني مصرفي وكل الهلا شتأمر وشتريد اكسر رجلي لو وصلت الباب 

-ومنين اجيبلج ابوك اني ياهو مالتي كايلج اشتري بيت وارفي عنج 

- واذا كعدت وما خيطت منين اجيب وارفي 

-اي القريبات 

- ووين يعرفني القريبات حتى يخيطن يمي ؟ 

-هسه انا كتلج وعود خالفيني 

- هي شني شو شاد احزامك ، ياهو الموديك علي 

- موديني شني غير اختي ومحسوبة علي اروح انعاب بيج والله اختك مطلكة وكاعدة وحدها 

- ووينك عن اختك سنة 

- اكلج تعبان وراسي يوجعني لا ادوخيني 

ميلي مني 

فات باوع الغرفة .. 

طب للمطبخ كاونتر جديد غراض جديدة وتلفزيون 

منيلج كل ذني جا تبجين بوجه الله وما عدي اوفي ذني ياهو الجابهن الج 

- ياهو الجابهن ؟ شني تهيمة هاي خوية 

- جا منين جبتيهن 

- من اهل الرحم 

- ومن همه ذولة اهل الرحم الجايبلج هذا كله ؟ ومشترية بيت وماثثته ، ما ادليني على اهل الرحم ذولة اليجيبولج كل هاذ 

- هسه انت بدال ما تباركلي بدال ما تكلي خوية اني اخوج واخاف عليج ورايد اكعد وياج خاطر لحد ياذيج بكلمته جاي تتهمني وتتعارك وياي 

شبيها الكلمة الطيبة شحت من حلوگكم ؟ 

ترا بلاش وعلي بلاش لا تخسرك فلوس ولا تنقص منك شي 

- وشنهي رايدتني اتلوكلج حتى اكعد هنا 

- ومنو الرايدك تتلوك خوية الكلمة الطيبة ما تعرفلها 

- دنجبي هسه وسدي حلكج وسويلي فد شي ترا جوعان وعلى لحم بطني من الصبح 

- انت ملاحظ حتى كلمة السلام عليكم والمرحبا ما كلتها بس اوامر 

- امشي لا ادفرج بالعباس امشييي 

حجاها وكعد بحذائه 

- انزع حذائك برا متشوف فارشة زوالي 

- وشني تتنكسين من حذائي احطها تاج على راسج 

- خوية زولية طاهرة اصلي عليها شني التتنكسين غير ماشي بحذائك بالشارع هي حذاء . 

- تعرفين الله انت 

- ما اعرفه خوية ارتاح 

- اسمعي حجي وياي عدل لا والكعبة اكوم هسه افرك حلكج فرك . 

عفته ورحت على المكينة كعدت 

صاح : اكلج جوعان كاعدة شني كومي سويلي شي اكله 

- روح اتسوك خلي اسويلك اكل 

- يعني هسه اذا افتح الثلاجة ما عدج مسواك 

- لا والله الثوابات هواي واني بطرك روحي حتى ما تسوى اتسوك ويخيس 

- اي روحي اتسوكي وسويلي اكل 

- روح جيب وتدلل 

- ما بيه حيل 

باوعت عليه .. تنهدت وكمت 

عندي بيضتين طكيتهن وخدرت وياهن جاي وجبتهن الها 

كال : اكو واحد ياكل بيض العصرررررر 

- هذا الموجود خوية احمد الله واشكره هم نعمة الله 

- سهلة سهلة 

جرها وكعد يتحلفلي .. 

عفته وكعدت اخيط .. اكل البيضتين وشرب جاي وجر الريموت دارها ع الطوبة . 

عفته والتهيت بخياطي .. 

جر مخدة وضل يباوع لحد ما نام .. 

درته على ام بي سي فور وكعدت اتابع مسلسل ( لحظة وداع ) بالاعادة لان بالليل اتابع عمار كوسوفي .

لحد ما صار الغروب خليتها على قناة الانوار الثانية يقرا قران لحد ما اذن صليت .. واني اصلي .. دك التليفون 

وكف كلبي من الخوف من حيدر شال راسه .. 

خفت لا حازم ابو الانشائية وحيدر يكوم ويشوفه ويسويلي مصيبة .. 

شال راسه حيدر وكال: ياهو الكاعد يخابرج؟ 

ما عرفت شكول وشحجي .. 

رجع صاح : دسدي خل انام 

وكام اني من كام سكتت نسيت شنطق بعد .. 

بس كام للحمام .. مو للتليفون 

قطعت الصلاة لان معرفت شكلت بيها ورحت للتليفون لكيته صدك حازم المتصل .. يمه دخيلك ربي لو شايف الاسم واني كاتبة ( حازم ابو الأنشائية ) الا يشكني شك 

بس عليمن قابل شعدي ويا حازم خاطر اخاف 

اني هم ثولة .. اكله اشتريت منه غراض بالدين ويمكن مخابر على مود الفلوس لان ما دزيتهن اله . 

 يا يمه راح حيلي 

ضغطت ع الشباك مطول خليت التليفون صامت خابر من يدك ما يهرج الدنيا احسن ما كلساع  يسالني منو هذا ومنو متصل . 

رجعت عدت الصلاة وكملت .. 

هستوني جاي اريد اكعد .. صاحتلي جارتنا : صباااا 

- ها حبيبتي 

- اقراية عد بيت ام زهراء تروحين ؟ 

- بس خل اگل لاخوي واصيحج 

- ديلا لعد انتظرج 

دخلت كال : مني هاي ؟ 

- جارتنا خطية هم وحدها رجلها منتسب وكاعدة وحدها ويجي اسبوع واسبوع يروح 

- ها 

حجيت : تكول اكو قراية عد بيت ام زهراء راح اروح وياها 

- خو انت تموتين ع الخوارة 

- جا غير شغلي اذا ما اتعرف على نسوان المنطقة واعرفهن منين اشتغل واسدد فلوس البيت 

- دروحي بس لا تبطين 

- اي ماشي 

لبست عباتي وصحت على جارتي اسمها ( سارة ) 

رحنا اني وياها وبتها الصغيرة للقراية .. 

وزعولنا جاي ولفة .. وقرت 

وبعدها رحنا لغير بيت هم توزيع وقراية 

تعرفت على كم مرة من المنطقة وبقيت اسولف وياهن وحبيتهم وحبني واخذن رقمي من عرفن بيه خياطة 

وطرحن عليه احط لافتة صغيرة ابابي للخياطة والحفافة حتى نسوان المنطقة يعرفن بيه ويجن يخيطن وعجبتني الفكرة 

خلصنا قراية رجعت واني شايلة كيك وعصاير و لفتين .. لفة كبة ولفة دجاج .. كتله : جوعان جبت وياي لفات تريدهن 

كال : اي اذا عدج اطيني شو بطني بطرك البيضتين 

انطيته اللفتين وكعدت  ضل يسولف على جعفر 

صارله اسبوع ما يحجي ويا جعفر ومتحاجين لان يرجع متأخر .. ومن هالسوالف .. 

لليل نمت وهو ضل كاعد .. 

ثاني يوم كعدت الصبح لكيت حازملي ( صايرين ثكال ما تردون ) 

ابتسمت من رسالته .. 

كتبتله ( لا ظروف ) 

كتبلي ( خير ) 

ما جاوبت .. انتظرت حيدر يطلع ما راح 

ما كام لحد الظهر يلا كعد .. لكاني حامية التمن والقيمة صبيتلا .. خلص وكال : راح اروح اجيب غراضي واجي هنا فرغيلي خانة من الكنتور 

- اي ان شاءالله 

راح .. عاد اتصلت بحازم 

جاوب بسرعة وهو يكول : شني يابه الچلب العضكم كتلناه 

- جلابي هواي يا جلب كتلت منهم بالضبط 

ضحك بصوت عالي وكال : خير لازم جلب جديد نازل للساحة مالتج هالايام 

- اخوي اجا يكول ما عدنا مرة تكعد وحدها وبعد اني الامر الناهي ومن البارحة لليوم جنه عنتر بن شداد فوك راسي 

- اي خوش اخبار هم زين 

- شني هي الخوش اخبار 

كاعد يحجي .. اجا صوت مرا : خير شو ضحكتك واصلة لذاك الصوب ، ضحكنا . 

حجه : شوية وارجع اخابرج 

- خوش 

سده واني بقيت افكر .. مرته لو منو 

اي اكيد مرته هو كال مرتي .. متزوج واكيد سمعت بيه يخابر ويضحك فضاجت وحجت .. 

كاعد اكوم .. رد دك 

حجه : الو 

- مرتك حجت وياك 

- اي ، كملي 

- شكمل ؟ تكلي خوش اخبار 

- جا مو احسن ما تضلين وحدج ؟ 

- وشفايتلي اضل وحدج 

- صعبة ووضعنا اصعب .. ثقي وصدكي المنطقة من تدري بيج مطلكة وكاعدة وحدج حتى نسوانهم يمنعوهن منج ورزقج ينقطع .. هاي تفكير ناسنا يحطون بالمرة الف آنة مو انوب كاعدة وحدها . 

- جا واضل كل عمري هيج 

- هو اخوج الما متزوج مو المنتسب ؟ 

- اي 

- اي احملي ايام نزلته وايام الما موجود اخذي راحتج .

- والله ما ادري كلت راح ارتاح مدري منين طلعلي يشمر ويغلط وما يحترم .

- ما طوله بيتج ما بيها مذلة اتحملي وعبري 

- بعد ، صدك اكلك اني جمعت الفلوس اللموها الي الناس والصدك ما صرفت منهن كلش قليل شتكول اوسع شغلي واشتري اقمشة واشتغل لو ارفي بيهن اسعد 

- وفي بيهن اسعد طبعا .. الدين حمله ثگيل 

بس ها كون بدون ربح توفيهن 

-شلون يعني 

-هن شكثر الفلوس 

-مليون تقريبا 

-اي هو وكت ما اشترى البيت انطاج بس مليونين ونص حط ربح فوكهن ع المية اكثر من ٣٠ الف صار المبلغ عليج ٣ ملايين ونص .. من تريدين تنطي المليون كون ينقص من الرقم الحقيقي مو الحاط عليه ربح .. يعني المليونين ونص تعتبر كانما منطيج مليون ونص بس وعلى اساسها يحط الربح 

- ها .. اي 

- اكص ادي اثنينهن من العچس لو فهمتي 

ضحكت ، حجه : اذا تريدين وديلياهن واني اطيهن اله واحجيله كانما انت . 

- اي خوش لعد هيج احسن  

- تدللين 

- تسلم الله يحفظك ،  مرتك ضاجت لان تحجي ع التليفون 

- لا ليش تضوج 

- مو يعني سمعتها كانما ضاجت 

- لااا 

- مو سديته فهيج توقعت 

- هسه شني رايده احجيلج شكلتلها وشكالتلي وانطيج الصار 

صفنت : لا اني شعليج بس هيج حجيت 

- اي، من تصيرلج جية ليجاي عود جيبي الفلوس ولا تتاخرين احسن حتى ما يحسبهن عليج .  

- اي ان شاءالله ، من رخصتك عندي شغل 

- على راحتج يابه وشتحتاجين لا تترددين 

- اي، مع السلامة 

سديت الخط منه 

بس اتضايقت .. صارله ساعة يحاجيني ويسالني عن ادق تفاصيلي وكجرد سالته عن مرته ضاج ويكلي شنو تريدين احجيلي شصار بينا .. جا انا مو كاعد احجي الصار ويا اخوي ! 

بس اني هم غبية 

لا وحيل غبية .. بيا صفة جاي اخابر لو ارد عليه 

زلمة ساعدني ما انكر واله فضل عليه كلش جبير بس شنو الصفة البيتي وبينة حتى ابقى مستمرة بالتواصل وياه واسولفله . 

اتضايقت من روحي حيل 

كلش احس نفسي اروح زايد وامشي بحسن نية بس شو هم مو هيج وياي .. حرام بعد لا ارد عليه ولا اخابره عودين من اروح لليت عمي اخذله فلوس اوفي بيهن من الدين وهاهية . 

المغربية كضيت شغلي وصليت والبيت كله نظيف .. 

حيدر ما رجع ، عاد كعدت من السياج اسولف ويا جارتي ( سارة ) .. لحد ما كالت : سويت شلون عشا يخبل وما عدي احد باللبيت تكللي علينا نتعشى سوية 

- يلا اجيتج بس اهم شي الجاي 

- خرب يومج شكثر اتشربين جاي جنج شايب 

- يبوو وعلي اذا ما اشرب فد عشر اكلاصات باليوم شوف ما اشرف بعيوني اكضيها النهار كله راسي يوجعني 

- دتعاي جنج على چاي 

جريت عباتي من ورا الباب ورحت يمها .. 

اتعشيت وياها وويا جهاله ، شوية واجت امها واختها 

وكعدت اضحك واتشاقى وياهن .. 

امها حيل حبتني واندمجت وياي 

اختها صغيرة اسمها رقية عمرها يطلع ١٤ سنة .. 

كتلها : بيا صف 

كالت امها : مبطلة والله 

- يا ليش خطية لو مخلينها تكمل شتنفعها كعدت البيت 

- بعد كلهن على هالدرب ما يرضون من يخلصن السادس الابتدائي يبطلونهن وينتظرون قسمة زينة تجيها خاطر ينطونهن 

- وهاي احنا اتزوجنا على صغر شحصلنا غير الهم واشلاع الكلب شيبنا واحنا بعز شبابنا يمعودة .. بس بعد وحدتنا شبيدها اذا واحدهم صماخه مثل الحديدة يبيع بهالشرف بروسنا ويرد ليورا . 

- بعد ، وين بيتكم خالة 

سارة : يا شبيج بالفرع منا بس تمشين بيت اهلي 

- يا يعني هم هنا بالشماعية 

- اي والله ، امي كضت عمرها عد العيال اني اتزوجت واني ابيت عيالها عاد دبرت وكدر ابوي يشتري بالحواسم جيف كثروا واخوتي كبروا ومشاكل كثرت . 

- الله يعينها اشافت ضيم 

- يووووه خليها سكتة الله يعلم هالفاد اشحمل 

رجعت كالت : انت كاعدة ليوحدج 

- لا اخوي وياي كاعد 

- يا شو سمعنا عزبة كاعدة وحدج 

سارة : لا اخوها وياها بس منتسب كل ايامه بالدوام بعد امر من حالي . 

حجت رقية : موجود لو الطب الكم واحد ثاني 

-منو الطب النا !؟ 

-انتم مو هذا البيت الع اليمنة ؟ 

-اي 

-اي شفت سيارة ورجال نزل ودخل 

-جا هو .. اجا خل اروحن 

سارة : شني والقراية الليلة ليلة القاسم 

- دخل اكله اشوفه خاف جوعان وهم يكلب البيت فوك راسي 

-دهاج اخذيلا من عشانا منو ياكله بعد 

-علوا هل اطبلا بصينية خاطر يسد حلكه 

كامت نصبتلي صينية صغيرة ورحت للبيت لكيته كاعد 

اول ما شافني ، حجه : وين مخورة بهالليل 

-وين يم سارة دزتلك عشى متعشي لو لا 

بسرعة غلس ع المحاسبة وكال : لا منين متعشي ميت من الجوع 

- دهاك اكعد لعد خل اخدر الجاي 

حطيت الصينية كباله ومشيت اخدر الجاي واجيت انتجيت على باب المطبخ كتله : سارة عدها شلون اخت تكل للكمر غيب واني بمكانك حلوة وصغيرة ومبطلة منتظرة نصيبها خطية انقهرت عليها 

-شسمها ؟ 

-اسمها رقية اهلها هنا يمنا بالفرع بس خوش ناس 

-جا اسعي كولي اخوي كبر ومحد بحاله 

-يا بعيوني والله من هالعين ومن هالعين بس كول حبايبي شكثرهن التريدها اجيبها الك 

-ما اكيف احسن ما صال مهجول هيج لا عيشتي عيشة ولا نومتي مثل البشر 

-صدك يعني ناوي .. 

-اي ليش لا 

-تريدني احاجي ام سارة على البنية 

-لا خل اشوفها شلونها مالونها شني اتكاتب على السمج البشط 

- جا سهلة .. هسه راح نطلع اني وياهن للقراية وشوفها البنية القزمة 

-هم راح اتطلعين 

-يا غير ليلة القاسم اليوم شبيك النسوان كلها ملتمة 

- وشلون تفض 

- ما تفض لورا العاشر يلا .. ما تعرف هاي الايام جديدة عليك 

صبيتله جاي وشربت جايي ع السريع وطلعت .. 

رحنا سويه للقراية جانوا جايبين بنية ملبسيها ابيض وبركع وملفلفيها بالابيض كلها وصينية القاسم بالوسط .. زفيناها وطشينا الجكليت فوكها ونصبنا عزا الإمام القاسم . 

من كعدنا للنعي .. 

رقية كاعدة يمي .. حجت وياي مرة على يسرتي وبقت تسولف وياي .. وانداريت عنها .. ندستني رقية : هاي المرة مو خوش مرة 

- ليش

- ما ارتاحلها 

- شبيها 

- بعدين اكلج 

خلصنا المجلس ودنطلع صفت ويايا رقية : شايفة هاي المرة 

- اي 

- جيرانه وتحب على رجلها 

- استغفري ربج يمعودة تونا طالعين من مجلس ابا عبدالله 

- شبيج اكلج جيرانه 

- وشلون عرفتي خاينة رجلها 

- من يطلع رجلها تكض التليفون ما تذبه وحبيبي وحبيبي وضحكها وين واصل 

- بالشارع تحجي وتضحك 

- لا بالبيت 

- وانت كاعدة وياها بالبيت 

- لا شبيج غير اكلج جيرانه .. اني مراقبتها 

- عزا لعزاج وشعدج مراقبتها 

- هيج اشوف اتخبل من مرة تخون رجلها اموت من الخيانة 

- وانت شمعرفج بالخيانة شجابج على هالسوالف دكعدي يمعودة تطلع المرة دا تخابر اخوها ابوها ميصير هيج كلام 

- لا شني وابوها واخوها ما تخابرهم بس من يطلع رجلها 

- وشمدريج برجلها طالع يمكن نايم 

- لا اشوفه يطلع 

- مراقبة حتى رجلها خرب بيومج انت كارثة 

- جا شعبالج اني ماكو شي يفوتني 

ابتسمت بوجهه بس بداخلي خفت 

اول ما شفتها قزمة وعمرها ١٤ .. كلت خطية ومظلومة 

يمة طلعت فلفل .. مبينة ملسونة ووكحة .. خلي اغلس على سالفة حيدر اخيرلي اروح ابتلش بوحدة امر من هدى غير اطك واموت . 

رجعت للبيت .. هو منزل هدومة ونايم 

رتبت ملابسة بخانة من الكنتور والوصخة شمرتهن بالغسالة وغسلتهن .. بس واني اشتغل عقلي كله بحازم .. اجيب واودي بالتفكير .. كل شوية اسال نفسي ليش افكر بيه وليش اهتم لاهره عادي رجال ساعدني والله ينطي يعني شريد اسويله اكثر من الشكر !؟ 

بس ما قنع راسي يجيب ويودي بافكاره عنه .. 

ثاني يوم الصبح نايمة واندكت الباب .. شلت راسي حيدر بسابع نومة كمت لفيت حجابي ورحت افتح الباب ولن .. اسعد بالباب ، كتله : هلا خوية 

-هلا بيج ذكرتج وكلت امرلج خاف محتاجة شي 

-يا عساك سالم .. 

شال علاكتين كبار وحطهن كدامي كال : ذني مسواك بيتج خاف ما تكدرين تطلعين 

-يا عليمن ملفت نفسك صدك جذب 

-لا تكلفة ولا ابد انت عزيزة ، بس رايد احجي وياج كلمتين 

-اي كول .. 

- بس مو ع الباب 

- جا خل اكعد اخوي يستقبلك اصبر 

- شني اخوج وياي 

- اي اي هسه اكعده الك اصبر 

- لا لا لعد عوفيها غير مرة ان شاءالله اجي وامرلج ونحجي 

- كول خاف رايد شي .. 

- لا ماكو شي هيج سالفة 

- جا خوش اني  امرلكم هم عندي فلوس رايدة اوفيك خاطر لا يظلن دين عليه 

- هسه هاي سهلة يمعودة لا تفكرين بالفلوس قابل بيناتنا فلوس 

- لا هذا حق .. 

- ان شاءالله سهلة من تريدين تجين خابري خاطر اكون اني موجود ونحجي ونسولف 

- ان شاءالله بلكت ورا العاشر تعرف هالايام مشغولين بعزا الامام والقرايات 

- ماجورين ماجورين ان شاءالله 

سلم وراح واني جبت المسواك دخلته للمطبخ وكمت اعزل واشتغل .. اسعد جايبلي بالكيلوين لحم كيلو صحاح وكيلو مثروم .. كمت سويت كبب تمن و وبرغل .. 

واني اشتغل تليفوني دك .. شفته حازم خليته صامت ما رديت .. عليش ارد وبيش احجي .. اذا هو صندوق لاسرار جا بس اني كاعدة واهذري بحياتي كدامه ..

كاعد اشتغل .. كعد حيدر 

كال : غسلتي هدومي ؟ 

- كلهن مشرورات ع الخبل بالحديقة 

- سويتي غدا 

- اي سويت اصحى وغسل حتى اصب ونكعد ناكل 

.. فات مني ودخل للحمام واني واكفة الف بكبة جريش .. طلع وهو يرد الباب سألني : شوكت اتسوكتي 

- اسعد اخو وفاء صديقتي اليم بيت عمي .. هو جاب المسواك 

- يعني هو لو اخته دزتلج 

- ما ادري ما كال بس انطاني المسواك وراح 

- يلا المهم جابولنا مسواك .. طلع اكلنا مال شهر .. دصبي يلا جوعان حيل 

كملت صبيت وكعدت وياه 

كال : حجيتي وياه اخت جيرانج 

- اي بس حسيتهم ما موافقين 

- ليش ؟ 

- ما ادري شفتهم ماخذينا بالعين الصغيرة وكامت تجر بذيالها .. انت اذا نويت بنات الحلال هواي 

- ديلا الله وايدج شوفيلي وحدة ما اريد هواي 

- اذا ع البنية سهلة بحيل الله  على فرحة الزهرة ان شاءالله نخطبلك 

- ان شاءالله 

كضيت الغدا وكتله : اكلك محتاجين تنور .. رايدة اخبز اليوم بثواب العباس .. واليوم يومه ابو راس الحار 

- اي اطيني اروح اجيبلج 

- عدي بس ١٥ ما تجمل عليهن واتجيبلنا الباقيات اريد اتسوك بيهن للخبز 

- ما عدج ما رايد الامام ثوابج 

- جا غير تشركني 

- واني منيلي 

- ليش شو بطرك روحك وما طالبة بس تنور 

- اي دبري روحج اني ياهو ماتي اشتريلج 

- خطار انت وياهو مالتك وهو بثواب العباس 

- بري العباس منج ومن افكارج 

- ليش بري  شمسوية اني ؟ بايكة ناهبة لو مو زينة !؟ 

-بطلي هاي سوالفج بطليها حتى غداج ما اريده تبزعين الروح . 

كام مني وطلع .. عفته وصحت على سارة كتلها : اذا عجن لخبز العباس اجيب دبتي واخبز بتنورج 

- صدك جذب دجيبي وتعاي يا دبة يا غاز البيت واهله فدوة لابو فاضل.. اذا معتازة عونة اندارلج 

- لا خلي اروح اتسوك واصيحج 

-ديلا لعد انتظرج 

رحت اتسوكت وجبت .. واجت هي ساعدتني بالثرم وعجنه وسوينا عروك ولكطنا الخضرة وكلينا وسوينا جاي وكعدنا لحد ما صار العصر شلت المعجانة وحولنا ابيتها نصبنا التنور وكعدت هي تدولچ واني اطرك واخط بالتنور وبناتها كامن يشيلن ويوزعن بالمنطقة خبز العباس وخضرة وعروك . 

بليلة التاسع اتفقت ويا الملاية تجي تقرا ابيتي لان نذرت لو انقضت حاجتي وكدرت اثث البيت واكمله انصب عزا للامام بنص البيت ... وما قصر ابو عبدلله يستاهل .. 

اني سويت لفات دجاج وسارة اشتركت وياي بكيك وبيبسي بجيس .. جريت قماش اسود وحاوطت الغرفة كلها ودكيته .. وخابرت على خواتي يجن طارن من الفرح من كتلهن راح اسوي اقراية تعالن .. للمغرب هن وجهالهن يمي .. ونصبت عزا للامام بليلة عاشوراء وسوينا مجلس . 

خلصت الملاية ابيتنا .. كلنا لبسنا عبينا وطلعنا من البيت .. اني عبالي الكل طلع ما بقى احد لان شفت المطبخ والغرفة فارغات سديت الباب ومشيت اني وخواتي 

واحيينا الليلة ببيت ام زهراء .. 

ما رضيت اكعد دخلت للمطبخ وحطيت ايدي ويا البنات وكمت اشتغل وياهن حيل حبيتهن وحبني .. 

لحد الساعة ب٢ ونص اختي منى مشت للبيت حتى تجيب حليب ابنها ، اجتني وجهه اصفر ، كالت: صبا طبيت البيت وشفت شوفة مو حلوة 

- خير ؟ 

- خية لكيت اخت جارتج كاعدة ويا علاوي وعوزهم بس يتحاضون حتى الحجاب ذابته 

- ادخيلك يلعباس صدك تحجين 

- والعباس شبيج امشي خية لبيتج وشوفي لا تصيرلنا سالفة احنه بغنى عنها 

-وما طلعتيها 

-خية من شافتني كامت بسرعة .. بس طلعت اتعمدت اوكف ليغاد .. فكت باب اختها ورجعت حولت للبيت 

-عزا العزاها كون 

صحت على سارة : ما تروحين وياي للبيت اجيبن جوزداني اخاف لا يطلعلي جلب واركض ركض مجنون بالشارع 

- يلا كومي اني هم اتكسرن رجلية من الدك والكعدة 

خلت بناتها يم امها ومشت 

كتلها : جا رقية وينها شو ما هي 

- كالتلي راح تروح لبيتي منعسة ما رضت تمشي ويانا 

-ها خطية 

فتحت الباب على كيفك واني اشاقيها : لا انوب حويدر جاي ونايم ونزعجه بالعباس الا يكطفنا بالشارع 

-يا جاي 

-ما ادري جني شفت سيارته ليغاد 

نجي وطبينا للغرفة وما اشوفها الا كاعد ومتجية رجليها على رجليه وتسولف وياه .. اختها تخبلت من شافتها .. وحيدر فز بسرعة صرخت اختها : شعدج هنا ولج .. شجاي اتسوين 

- اجيت اخذ الحليب اختها دزتني 

- يا حليب ولج .. منى توها جابت الحليب واجتي 

صرخت سارة : اصخام الصخمج امشي كدامي لا تخزيني امشييي 

ركضت كدامها وطلعن واني انداريت لحيدر : خير خوية ؟ شنهي ما تكول البيت اله حرمة واني اختك وحيدة مسويلي البيت للمواعد 

- دنجبي وامشي مني لا ادفرج على اساس ما ادري متفقة انت ومنى اجيبين اختها وتجين حتى تفضحين 

- خوية الليلة علشورا الناس مصخمة ومتعزاية وانت حاير بهالسوالف صدك تحجي ابو عبدلله ما وكف بعينك 

- مالج غرض افتهمتي لو لا .. اني شسوي اسوي مو اني التحكمني مرة وتحاسبني ادوسج بالقندرة والله . 

- اتدوسني نا اتدوسني يا حيدر والعباس لو نعادت هالسوالف وصارت لا الم عمامي والعشيرة كلها واشهرك واخزيك استحي تروح للدوام اضل وحدي ما تكول شنهي بيت اختي مكان للمواعد والسوالف الخايسة 

فز كامي : هي مني التشهرني .. خب لا عبالج البيت بيتج وعلي الزمج جلاليق وادفنج هنا .. مصدكة هي عدها بيت وتحط قوانين 

دفعني ... 

كتله : اني كتلك واشوف وهاي البربو* الي عمل ويا اعلها الما عرفوا يربوها 

- لو وصلتي وحجيتي لا الزمج والعباس افنيج فني 

دخلت سهى : خير يمعودين صياحكم واصل ليغاد 

يخزر بيه ويكول : كلي لاختج هاي خل تعرف اوادمها لا تخليني اسود عيشتها والله 

- وشسوت 

عافنا وطلع حجيت لسهى كامت ادك على خدودها 

كالت : شطبباها ؟ وشلون هيج اجت وكعدت وياها واتعرفت واتوالمت 

- خية اول شوفة الي الها تكلي اخوج ابو سيارة اجا مليزرته الملعونة 

- تخوف صبا ابتعدي منهم خاف مو خوش ناس ونبتلش بيهم . 

- والله اختها وردة بس هاي شرنفص بعدها بكد القندرة وهيج جا لو كبرت شتسوي ؟ 

- راح ترجعين لو تضلين 

- لا خية شرجع لا انوب هم تضل فالتو 

- لا اني راح انام خلصن الحجة .. وتعالن 

عاد رجعنا للحجة وكملناها للصبح قرينا زيارة عاشوراء ودعاء الندبة وصلينا الصبح .. ورجعنا لبيوتنا لكيت خواتي فارشات ونايمات .. وحيدر نايم .. والغرفة صايرة لحم كل ٣ ببطانية .. عاد اني هم انزويت وياهم ونمت بيناتهم . 

شفت التليفون كبل لا انام لكيت ثلث مكالمات لحازم .. 

ما جاوبته لفيت ونمت للصبح .. 

ثاني يوم ناسية اجيب صمون وكلها معزلة عاشوراء .. عاد الطحين الضل من خبز العباس سوينا عجين واتريكنا خبز طاوة مكلا  وعليه شكر وجاي .. 

كملنا ريوك الجهال اخذت اجدورتها وصعدت ويا حيدر بالسيارة لفوا المدينة ولموا كومة اكل من المواكب واجو .. طلعنا غدانا كله .. بين الهريسة و تمن وقيمة و برياني ولحم وشاكال الوان نصبنا سفرة وكعدنا ناكل 

و سهى اختصت بحيدر تنصحه وتحاول تخلي يبتعد عن هالبنية ومو راحة والتغافل بيت اهلها وتطفر ع الجيران وتكعد بحضن واحد صارلها دقيقتين تعرفه هاي لا تتامن ولا تتعاشر . 

وهو يكللها ما عندي شي بس سوالفها حلوة استمريت احجي وياها .. وهي بقت تنصح بيه 

للعصر خواتي انفكن لبيت عيالهن 

من طلعن وصار البيت هدوء انقهرت جهالهن جانوا مالين البيت هوسة وصياح من راحو رد البيت كبر ما ينطب .. 

لا اعتراض على امرك ربي مكتوبلي اعيش عمري بلا ضنا ولا صوت طفل يشاركني حياتي واصير ام ومسؤلة .. اكضي عمري اركض وخيري لغيري . 

كاعدة ووصل مسج من حازم 

( خلصت المصلحة وانطوينا ) 

كن شفت راسله منه كلبي رجف

ضليت مكابلتها وكاعدة اريد اتصل واتردد .. 

اريد ارد برسالة واكول لا .. 

عاد خابرته وكلت ليش اتهرب واخليه بامل .. 

خل احسسه ما عندي شي وياه 

اتصلت بيه رد .. 

حجه : اي ثكال عمي 

- هلا ابو علي شلونك خوية 

- شلونك وانت صالج ثلث تيام ما تردين 

- اتعذر منك حيل .. بس من يوم السابع لهاليوم يلا فضيت تعرف نذرت لابو عبالله ووفيت نذري 

- ها .. اي واصل ان شاءالله انا هيج بس ردت اعرف اخبارج شكو ماكو وصلتي لفلوس الاسعد مو كلتي ادزيلياهن 

- اي بس انشغلت 

- اي جا كتبتي رسالة وطمنتيني ادك وماكو رد

- بصفتي شنو 

-شنو يعني بصفتج شنو ما فهمت 

- لا اني من اريد ارد واحجي واسولف ونفضفض شنو الصفة البيني وبينك حتى نسمح لنفسنا نفضفض ونسولف 

-اذا مضايقج الموضوع بعلي اني كلش اعتذر 

- تفتهمني !؟ اني اريد افهم بس شنو الصفة اللي متراسل ونسولف بيها .. اصدقاء ؟ تعرف مجتمعنا وعاداتنا ما تصير عده صداقة مرة ورجال .. 

-معارف 

- معارف اخابرك واشكيلك واحجيلك 

- اي ليش اذا محتاجة خاطر اساعدج 

- ابو علي انت فاهم وواعي وتعرف اكثر مني بهالامور اني ما رايده احرجك بس .. من ساعدتني جان كرم منك وغيرة .. بس المعارف اللي تكول عليها بوضعنا الحالي يا ترى لو اني تعتبرني اختك بت امك وابوك ترضى تسولف وتشكي وتفضفض لزلمة والصفة معارف 

- اني كلش اسف بالقران يعني ما اعرف اذا انت ماخذة اهتمامي بغير جانب بس اني الغلط مني مرات افوت زايد بضميري ويهمني الاخر هواي واشيل همه وهذا هم عيب بيه اني حيل اعتذر منج اخت صبا وهذا اخر اتصال تشوفينه مني الا اذا احتاجيتي شي اني اخوج بالخدمة . 

-الموضوع مو... سد الخط 

تنهدت .. باوعت بالحديقة وكمت اذب حسرات 

ليش اهتمله وليش هيج يتغير حالي وفكري بطاريه

زلمة متزوج وعنده عائلة .. واني استقريت واموري زينة 

شريد ؟ وليش هيج اهتم واشيل هم .. 

كمت اروح منا اجي منا ... 

كلش اتضايقت لان اذيته .. او جرحته بس ما بيدي شي اني مو مال سوالف عشك واكعد احجي واسولف ويا رجال واكثر حجي ومتزوج ... شفكري اخذه من اهله حتى اسعد روحي .. مو حل وما يصير .

من فراغي كضيت الوكت كله صافنة وايد على خدي وافكر بيه 

اذكر من فشخني عمي وخذاني ورجعت بالليل احط بعطره ع المخدة حتى احس بشوية امان وراحة .. 

عجيب انسان بوكت قصير صار عبارة عن شعور يدفيك من تفكر بيه .

كاعدة ع الجودلية والريموت بيدي واباوع بلا رغبة 

رجع حيدر بالليل ، اخذ الريموت لفيت راسي ونمت ، بالليل حسيت حيدر يم راسي يدور بالكنتور ، كتله : شرايد ؟ 

- بس كاعد اجهز جنطتي خاطر التحق 

- تريد اساعدك 

- لا نامي .. 

رجعت لنومتي 

كعدت الصبح حيدر ما هو .. خابرته ، كال : التحقت 

كتله : درب السلامة ان شاءلله

كلت ما طول ما عندي شي خل اخذ المليون الضامته جوا فوك الكنتور انطي لاسعد خاطر افتك من نص الدين .

صعدت امد ايدي فوك الكنتور ماكو .. 

هبطت كمت امد ايدي اكثر .. الجيس مال الفلوس ماهو 

اني حاطته بعلاكة ولافتها ومخلية فوكاها جودليات وفوكاها مخدات وامس من راحن هواتي وصفطت المخاد والجودليات جان موجود .. وينه يربي 

فكيت الكنتور طلعته كله ماكو .. 

دورا حوا الزولية يم المكينة بالمطبخ .. 

يربي وين راح ؟ 

اتذكرت حيدر بالليل وهو يجهز جنطته 

خابرته بسرعة .. كتله : حيدر اكو فلوس فوك الكنتور شايفهم ؟ 

- شكثر 

- شنو شكثر شايفهم لو لا 

- لا ما شايفهن 

- امس اني من صفطت الدواشك جانن موجودات وماكو بالبيت غيري اني وانت ..

- شني تبوكيني طايحة الحظ .. ما عندي 

- عليك بروح ابوي كول .. ماخذهن لو لا ؟ 

- كتلج ما ماخذهن ولي من وجهي 

- حيدر فلوس البيت جاي انطيهن والله 

- واني شمعرفني .. دروحي لج 

سده بوجهي من كلامه احلف عليه هو ماخذهن وكاعد يغلسهن علي ... 

كمت الوب واروح منا واجي منا 

خابرت سهى اشكيلها بلكت تحجي وياه .. 

كالتلي : هسه اشوفلجياه 

راحت واني بقيت الوب .. اروح واجي واكل بروحي ..

رجعت خابرتني : ها بشري 

- عده 

- عليج الله والجلب ينكرهن علي يكلي ما عندي 

- يكول محتاج وراس الشهر اني انطيها الفلوس 

- وشلون يمد ايده بدون ما يكلي 

- بعد شافهن كدامه وانت نايمة وخذاهن ما يروحن بعيد ما ضل للراتب يمكن اسبوع ويستلم ويرجعلج 

- ولو ما رجعن سهى ؟ 

- يرجعن وعيونج بس لا تحركين بروحج والله يرجعن 

- شلون اني بحيدر كليلي والله تعبت ياكل ويمسح ايده بالحايط وسكتت .. يامر ويشمر وهو لا فلس لا عانة وكلت ميخالف بس اسمه اخو وياي بالبيت ، هنوب يبوكني 

- لا ما يبوك هسه ما نكرهن كال ارجعهن الها راس الشهر . 

ضلت تهدي بيه وتسولف وياي لحد ما هديت وسلمت امري لله كلت شسوي بعد .

سديت الخط منها 

كمت اريد الهي روحي .. رحت سويتلي عجينة وجبت فستق حطيت ويا شكر وعبيت العجينة وكليتها .. من كملت تكلاه اتذكرت ما عندي خلاط لو طاحونة حتى اطحن الشكر .. 

صحت على سارة .. كالت انطيني 

انطيتها طحنتلياه واجت كالت : حيل مستحية منج على سالفة اختي ترا طايشة بس عرمة عليج الله لا تاخذين عليها 

- خب دسكتي غير انت اختي شنو مستحية شنو ما اخذ عليها 

- اروحلج فدوة جا ما طول رجلي نايم فتحيلي الباب خل اشوف شسويتي 

- هلا هلا هاي الاخبار الحلوة 

حولت يمي .. اخذت الشكر المطحون وكمت الوث العجينة ام الفستقة الكليتها بنص الشكر 

كالت : شنو هاي الحلاوة شو اول مرة اشوف هيج حلاوة 

- هاي اسمها حلاوة قطب عمت عيني امي جانت تسويها واني اتعلمتها منها كل ما اشتاق لامي اشتعي هاي الحلاوة 

سويتلها ماعون وكتلها : هاي انت ورجلج وبناتج 

وذني خلي اخذن وامشي 

- المن 

- البيت عمي لازم اصالح عمي واطيح على راسه صح عده سوالف ما تنبلع بس مالي غيره انتجي عليه لو طحت بس هو البيه ها شوية رجا نا طول عمتي وراه 

- وشوكت ترجعين 

- ليش 

-حتى احسب احسابج بالعشى لو لا 

-اكلج خية انت رجلج مو اجا ما تولين 

-يا رجلي شني والله كعدته تكصر العمر من اجا البارحة ولليوم مخلصها متنك ويصيح علينا وانت محد يمج كايلتله جارتنا الجديدة وحدها ويقبل 

- جا خوش احاول ارجع كبل العشا هم عندي كبة نكلي وياهن اصابع بتيته وجاي 

- وعمار كوسوفي 

-جوي واجوائي خايبة مو زلمة يكتل 

-جا مو زلمنا المتنكة 

-ههههههههه اي وعلي .. ديلا خل اروحن حتى ارجع من وكت 

- يلا لا تتاخرين ترا ما اقبل 

- امرج ست. 

راحت سارة واني سويت الحلا ماعونين .. ولفيتهم وطلعت مشيت لحد ما ركبت وطلعت للداخل .. نزلت مقابيل فرع بيت عمي .. نزلت كلت بالاول خلي امر على محل حازم هم انطي فلوس من الدين اناوشه ١٥ وهم انطي حلاوة قطب .. كهدية شكر على السواه وياي 

بس بالاول باوعت اذا هو بالمحل لو لا .. شفت سيارته موجودة كلت اي هم زين .. رحت دخلت : مساء الخير 

وهو مدنگ : وعليكم السلام اهلا وسهلا 

- اجيت حتى... قاطعني وهو يصيح 

- علي بابا شوف خالتك شمحتاجة . 

- لا مشكور ما محتاجة شي .. بس جبتلك هذا الماعون حلاوة قطب .. هدية شكر على وكفاتك وياي 

- مشكورة ، اخذه علي بابا 

راد يمد ايده علي .. 

لا رايده تضوكه وتكلي رايك بحلاوتي مو هيج 

وهم اجيت اوفيك من الدين .. 

حجيت : شكد علي 

- ما اعرف هسه اشوف السجل .. 

كام من مكانه : علي شوف السجل على ما اخابر عمك 

طلع وهو يتضاهر بتجاهلي .. وعود ما يريد يكابلني .. 

ضليت ادور ويا ابنه على اسمي بالسجل ما لكيته .. 

كتله : هاك حبيبي هاي ١٥ وعود كله لبابا 

- ماشي عمة 

طلعت وهو مبتعد لهناك .. من ردت ادخل الفرع .. انداريت لكيته باوعلي .. دار وجهه ودخل لمحله . 

اخذت تليفوني وكتبت رسالة ( ما يلوكلك التمثيل ولا راهملك الجذب حلاتك وانت حقيقي ) 

سديته وتقربت لدكان عمي : حجي .. يحلو .. 

باوع دار وجهه : نكدر نتعرف بحضرتك معجبة بيك حجي 

- صايرة مستهترة كلش 

- جا ادبني غير انت ابوي 

- لا ادبج ولا اريدج 

- بس اني اريدج وجايبتلك شلون حلاوة قطب من هاي اليحبها كلبك 

- لا اريدج ولا اريد حلاوتج 

- ايباااه ، دخل اطب واسوي قوري جاي واحط الحلاوة واشوف منو الما ياكل من حلاوتي الظاهر انت مو مال عيني واغاتي طالعة عينك 

- دطبي طبي ما تجيني منج بس الطلايب 

طبيت للبيت ومشيتلا للدكان حضنته وبست راسه ضحك وكال : الله يرضى عليج بنيتي اني غير لمصلحتج جا من تروحين وتكعدين وحدج زين الج غير الوادم تاكل وجوهنا وجج 

- لا وانت الحق عمي .. واحا اخوي وكاعد وياي وعايشين الحمدلله .. بس ضوك عليك العباس .. ضوك . 

اخذ من ايدي واكل كال : مسويته لو مشتريته 

- والعزيز ذاك الراح وما لمنا .. اني مسويته بدية ذني الحلوات 

- طيبات 

- دخلي اسويلك جاي ونكعد عمتي وين 

- نايمة 

- شو البيت هادي لا سويسو لا داليا لا بيت رسول 

- هجو 

- ها هم زين حتى ناكل بس اني وانت ونتغازل 

- اي نتغازل ديلا سوي الجاي خلي ناكل 

- ها ها كول عجبتك حلاوتي 

- جا مو كلنا طيبات دفضيها 

- يمااااي وحات العباس احبنك 

ضحك واني احضنه : من اكلج صايرة مستهترة ما تصدكين 

- يا جا غير اجيتك خاطر تعيد تربيتي شبيك عمي 

رحت حطيت الحاي ومشيت للصريفة مالتي حاط بيهن مسواك الدكان .. كتله بسرعة بدلتني بمسواكك 

- شلونج بالبيت الجديد ؟ 

- بخير .. الحمدلله الثواب خير من الله واهل الرحم هواي والله مسهلها هالايام 

- عسنها دىم بس كون تصيرين سباعية وتلمين روحج 

- ان شاءالله ان شاءلله تاليتك اخليك تعوف ولدك وتجي تعيش يمي بس اني وياك نضل .. وعود جيب عمتي احبها .. ما اخليك عد ولدك وتحت رحمة الجناين 

صبيتله جاي وجبته وعمتي كعدت فرشنا اباب الدكان وكعدنا نسولف ونضحك .. سلمت عليهم وكتلهم : لازم اودي الهدوم مالت الوادم .. وارد من وكت 

- مو حيدر ما موجود باتي هنا 

- لا عمي كلي روحي البيت مناك ما يتيه . 

- ديري بالج على روحج ورد من وكت لا تبطين عد وحدة 

- ان شاءالله عمي 

- وعود اجيج انا بس خل افرف وذول الكواوي* يكعدولهم شوية بمكاني بالدكان امرلج 

- كل الهلا عين غطا وعين فراش لو ما شالتك الكاع تشيلك عيوني 

- الله يحفظ عيونج يلا بوية ديري بالج على روحج . 

- مع السلامة 

- الله وياج 

كمت رحت على كم بيت واخذت فلوس الخياط لان كل البجيبي انطيته لدين حازم .. لو ما مفترة وماخذة فلوس الخياط لا حرام ما عندي فلوس كروة .. بس الله مدبرها يجبها منا ويسد منا وتمشي الدنيا . 

من كملت وردت اركب لبيتي .. 

رديت ع المحل لكيت حازم  كاعد وحده ماكو ابنه .. 

كتله : اذا خلصت الحلاوة اطيني ماعوني حتى اطلع . 

اخذ الماعون واطانياه بدون حجي وانتباه عود مركز بالدفتر 

حجيت : لا شكر لا تقدير بس يلا فدوة 

كاعد ينطيني الماعون جان يطب اسعد : صبا لو مشتبه 

- هلا بيك خوية 

- جيت من راس الشارع ولمحتج شلونج شلون احوالج اليوم هنا 

حازم : مشكورة على الحلاوة كلش طيبة 

تهت اجاوب حازم لو اجاوب اسعد ابتسمت وكتلهم : يلا مع السلامة 

حجه اسعد : اوصلج 

- لا تسلم شتوصلني 

- لا والله ما تروحين وحدج الا اوصلج 

- لا ينطيك العافية 

حازم : بس عندي حجي وياج على الدين .. اذا تسمحين 

- شنو ؟ 

- اسعد خلصي امورج وانتظرج يلا 

- ما اريد اعطلك عليك العباس روح

- لا تحجين ابد .. هم منها احجي وياج بموضوع مو كتلج 

- ان شاءالله 

مشى واني انداريت على حازم : شبيه الدين انطيت... قاطعني وهو يصك على سنونه ويحجي بحده 

- شوفي لو صعدتي وياه بالعباس مو اهلج لا اني احط جيلة برجلج واعوقج وحق هو محمد 

- هاي شبيك ليش تحجي هيج حجي ؟ 

- النكس امس جان يمي وحجالي عنج اباله ياخذج  زواج متعة ويقنعج اذا رضيتي تسددين دين البيت بالمتعة .. لو مشيتي وصعدتي وياه وعلي ما تلومين الا روحج افتهمتيييي.... 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا