رواية عاجر الفصل السابع 7 بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل السابع 7 بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل السابع 7 بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٧ 

-منو هااااااي حازم ؟

ضل يباوع عليها وهو مكمبص للصوبة جان يعدلها ، كام من مكانه وهو يرد : ضيفة 

واشرلها براسه تفوت جوا ... 

حجت : لا ليش غير نعرف ضيفتك ياهي 

المرة شايفتها كبل بس عكدت حاجبي اريد اتذكرها منو 

بس هي ذاكرتني وكالت : انت مو كرايب بيت حجي راضي ؟ عمج يدري اتباتين بالبيوت 

حازم : امل اذا عندج حجي نحجي ونتفاهم عليه جوا 

- لا احجي ولا اتفاهم وياك .. ولا عبالك اني ضجت لو انقهرت من شفتك جايبلك مرة اصلا ما تحركلي شعرة من راسي والله انت بكبرك ما تهمني . 

- ما طول الحجي هيج جا المن جاية 

- محتاجة غرض وحسبالي محد موجود اجي اخذ كلت بالدوام ما اشوفك واتكابل وياك  .. اشبع 

حجتها ومشت اني كتله : لازم اروح لببت عمي بعد..  فدوة 

حجه : اكعدي بمكانج 

-  هي منو هاي .. مرتك ؟ 

- اي ، اكعدي 

- لا جا حقها اني مالي حق .. اكوم 

- هو المالج حق شني مرتي انت؟  بويه اتريكي وخلصي واخذج قابل عدي وياج شي ؟ شو هم مدري شلونج انت الثانية . 

عافني ومشى .. 

بقيت واكفة بالمطبخ احتاريت هسه شسوي 

اريد اطلع بس خاف اطلع بدون ما اكله وعيب .. 

شكد فشلة من اجت ولكتني وحدي .. الله لا ينطيك حيدر على هالموقف العفتني بيه 

كمت اسمعه يصيح عليها وهي تصيح .. 

كاللها : الحجي مو وكته جا علمتج 

حجاها واجا للمطبخ 

كتله : عليك العباس خل اروحن 

- دخلي اتريك واخذج يا بويه قابل ناهبج اني 

- لا يطيك العافية اني كلفتك هواي اروح لوحدي ..

- صبا .. كتلج اكعدي 

- لا والله اروح 

- بابا انت عليش خايفة اني شعدي وياج من اتطلعين اتثبتين للمقابل امور مو بصالحج .. انت ضيفة هنا وخطار تتريكين واخذج معززة مكرمة لاهلج .. غير هالحجي ما عندي 

- جا مرتك ضاجت 

- الا فرحت .. اكعدي صبا 

كعدت .. وشفتها نزلت من الدرج من صديت بيها اتذكرت وجهه وطخت براسي واتذكرتها .. هي نفسها المرة اللي اجت لوفاء وتريد تزوج رجلها حتى تخلص منه . 

وكفت وكالتله : كدام الوادم سبحتك وانت وتحجي بالدين ومن جوا لجوا لفني بعباتك ... 

حازم : كلامج صحيح 

- عود عبالك تستفزني وربك ما تستفزني وما تهمني وبالعافية عليك هالشكول . 

حازم : المرة خطار ابيتي احترمي نفسج امل واذا خلصتي وخذيتي التريدينه شوفيني كفاج 

- هي هي تطردني لخاطرها 

- محد طاردج انت العايفة البيت وانت الجاية بهالوكت حتى ما تشوفيني وبلسانج كلتي جايه اخذ شغلة واطلع وما دامج خذيتيها .. احسبيني ما موجود واطلعي 

- اي حتى تاخذ راحتك عيني يحقلك ليش لا يحقلك .

لبست عبايتها وطلعت .. 

ابتسم : انشر غسيلنا كدامج اني اتعذر منج اذا صارت بوجهج 

- لا بس لو اروح ما طولها راحت 

- هسه بس اكلي لكمة اخذج 

شغل الطباخ حط طاوة  وكام يفتح بالكاونتر .. حمت الطاوة دخنت 

كتله : من ارجع اتريك براحتك 

- هسه بس شوفيلي الزيت وينه ماهو 

- ذاك كدامك 

- وينه 

اندارلي اشرتله ابتسم .. 

حجيت : مرتك اعرفها 

- صدك !؟ 

- تجي يم وفاء اخت اسعد ع الصالون 

- صح موصلها كم مرة ليغاد 

- رايدة تزوجك مو 

- تزوجني ! منو كالج هالحجي 

- ما ادري هيج هي كالت 

- هي كالت اريد ازوجه !؟ 

- اكلك لا كالت ولا سمعت اني ما ادري عن شي .. 

كافي عليه ضيمي مو ازيد ضيم الوادم 

- يا صبا بهالدنيا لا تصدكين احد مرتاح .. هالدنيا مو مكان راحة لاحد .. بس الفرق انتن النسوان تكدرن تحجن وتفضن البكلبجن .. احنا الزلم ما نرضاها ونشوفها عيب بحقنا نحجي مشاكل بيوتنا ونطلع اسرارنا لهذا يمكن تشوفين النسوان مظلومة اكثر من الزلم بس لو تفتحين صدورهم راح تشوفين امور غير الشايفتها وسامعتها 

ها احجيلج ع الزلم مو المخانيث التعرفينهم 

مثل اخيج هذا الذب عرضه بالشارع هاذ ما ينحسب ع الزلم لا والله 

- مشاكل زوجتك على شغلها 

- لازم فاتحة اسرارنا بنص الصالون 

- كلنا احنا النسوان بالصالون نفضفض لان محد تعرف اللخ ومحتاجين نحجي مو مثلكم تعرفون تكتمون اللي بداخلكم احنا اذا ما نحجي ونفضفض نطك ونموت 

- شوفي امل تصير بت عمي .. وزواجنا صار زواج اقارب 

اجذب عليج اذا اكلج ما جانت برغبة وقناعة بت عمي واعرفها واعرف اخلاقهم .. وجانت موفيتني وموفية بيتها وقايمة بواجبنا .. اخذتها من بيت عمي ربة بيت مبطلة وما تشتغل ومشت حياتنا عمر لا بيناتنا مشاكل لا امور مو زينة ..

 والله جانت الوادم تحلف بينا وبعلاقتنا وكلها تدري بحبي الها ودلالي الها .. الله فوكاي شاهد وملايكته تسجل راتب استلم احطه بيدها واكلها احكمي  ووازني مصرف البيت 

- لعد شغيركم ؟

- فراغ .. وكت الفراغ عد الانسان مشكلة خصوصا اللي ما يدرك نعمة الله ويحس هذا الفراغ نعمة مو نقمة والله مريحك .. اخوتها كلهم يشتغلون بالسوك وجان اكو لود مال شغل .. فاخوها طرح تعاونه بالمحل وتوكف وياه وتشتغل .. 

ما رضيت انا .. وهي  زعلت واعتزلتني وانت تريدني ارد اخوي وشضارني لو اشتغلت وجنيت فلوس ومليت من كعدة البيت والملل .. ومن هالحجي اسبوع كتلها : بس فترة شهرين هاي مال رمضان ورا رمضان موسم عيد ورا وموسم مدارس .. ومن بعدها موسم بهاري انوب شتوي .. فهالمواسم تاخذلها شهرين تلاثة السوك يشتعل . 

كتلها بس هالفترة اشتغلي وكعدي شرط ما تقصرين ابيتج وكالت امرك .. 

صدك اشتغلت .. بس اشوفنها تدوس على روحها تطلع من ٨ .. ترجع ب١٢ ونص وتركض تعزل وتطبخ كبل لا اجي .. اتغدينا وانام ظهرية ونكعد اني اخذ علي وهي تاخذ سجاد ابني الصغير ودنيا بنتي تعوفها يم بيت اهلها .. ترجع تعبانة  المغربية ال٩ ما توصلها تنام بعد ما تدري عني 

كلت ميخالف فترة تكضي ونرجع مثل اول 

.. بس ما گضت .. من كضّت فلوس بديها طمعت تريد ازيد 

وابوها كايللها افتحلج محل بصف محل اخوج .. دكت رجل وياي الا تفتح 

ما رضيت وتعاركنا .. ذبت عليه الجهال وراحت لاهلها .. 

ما عدي بيت اهل 

 بس الحجية وكاعدة عد اخوي  الجبير وما اكدر اذب حملي على بيت اخوي وامي ما تكدر اتداري جهال .. ومرت اهوي حكها على يا اساس تحتار ابزريتي وامهم تشتغل وذابتهم ! 

واحتاريت بالجهال حيرة .. بين دوامي بين شغلي بالمحل .. اتأذيت 

وهي راحت فتحت المحل واتسوكت ورتبت كلشي 

وكامت ناس تدخل بيناتنا حتى ارجعها لخاطر الجهال .. 

رضيت ارجعها خاطر بزري لا يتشتت وكلتلهم خلي تضل بشغلها العافت بيتها ورجلها لخاطره .. خليها تطلع وتشتغل وتفرح بالفلوس التجنيهن بس خلي يكون بمعلومها اني ما باريلها الذمة بشغلها 

اجاني الجواب هي موافقة حتى اذا اني ما برايها .. 

ورجعنا .. بس رجعت متغيرة .. الجانت تركض وتدوس على نفسها حتى تنظف البيت وتسوي اكل الي والجهال .. كامت تتمنن وبكل مشكلة تصيح والله ترا اعوفلك الجهال تحتار بيهم واطلع . 

وهاي صارلنا سنة تقريبا 

بالقران جان اكلها ما ينشبع منه .. وتحير شتطبخ وتتفنن بأكلنا

صار الاكل يا محروك يا ماصخ يا يتأخر تطك ارواحنا يلا تكمل الاكل بسب تليفوناتها وحجيها بالموبايل ع الشغل .. 

قصرت بحقي .. بحق الجهال .. بحق مدارسهم 

لا ملابس نظيفة .. يوم تغسل عشرة ما تلحك .. 

السلة مالت الملابس تصير تل واكوم اتعارك واصيح واكلها يا بشر ما عندي ملابس نظيفة اغسليلي .. يلا تغسل 

حقي بعرك اكلي بعرك عيشتنا انكلبت ١٨٠٪؜  بسبب شغلها 

- لهسبب تريدك تتزوج 

- لا هي ما تريدني اتزوج هي اتكلي اني ازوجك ما تاخذ الا وحدة اني اختارها ... مسودنة حسبالها الامر على كيفها واني خاضعلها ما تدري من تطك عدي تعض الاصابع ندم .. ومنطيها مجال تزاور نفسها

- ما ادري اني سالتها كتلها ليش متطلكين 

كالت ما اريد الطلاك ما اكدر اعوف جهالي 

- مو اكلج .. ماكو واحد بالدنيا مرتاح بس كل واحد همه على كده .. الحمدلله على كل حال 

شال القوري من الطباخ حطه ع الصوبة 

حجيت : يعني اذا انت شفتلك مرة ما ترضالك تتزوج 

- شوفي صبا .. اني لحد اخر مشكلة اللي طلعت بيها من هالبيت كاعد احاول ابطلها حتى ترجع تكعد بالبيت .. اني ما كاعد ادور حل لروحي خاطر اكول اتزوج وطز .. اني رايدها ترجع مثل كبل لخاطر الجهال لا اكلة بيها خير لا بدراسة فالحين لا ملابس نظيفة .. اذا هي تفكر بنفسها وتروح تشتغل واني افكر بروحي واروح اتزوج وذوله الخلفناهم ياهو الالهم !؟ 

هي خوش ادمية .. وجانت نعم المرة ونعم الزوجة 

بس اتغيرت بسبب شغلها يعني المشكلة بس شغلها هذا الاريده تعوفه .. اني ما رايد زواج ولا رايد اشوف روحي .. اني رايد احتوي عائلتي بيتي الجاي يضيع .. لا بالعرك جاي يفيد ولا الاسلوب جاي ينفع .. 

تغار علي وهاملتني 

تريدني وما تريد تطلك مني بس ما تعوف شغلها وترجع لبيتها .. 

اتغيرت اتشوهت الطمع من يدخل كلب بنادم ينخره نخر .. 

الله يعرف كل انسان ومكانته من كال ( وقرن في بيوتكن ) مو من فراغ البيت هو اهم مكان للمرأة تقوم بواجبها بيه.. اذا كفت عود لا بأس تشتغل .. بس البيوت تنبني بالنسوان مو بالزلم .. الرجال خطار ابيته .. البيت للمرة .. المرة اذا هملت واجبها وصار هدفها الفلوس والشغل خارج البيت .. البيت انهدم العائلة ادمرت الاسرة انعدمت . 

- الله يهديها ويصلحكم .. بس اني اخاف لا تروح لبيت عمي وتفتله جنت هنا .. 

- ما تسويها 

- ولو سوتها 

- اني اكلج ما تسويها لا تخافين كملي ريوكج خاطر اخذنج لبيت عمج ولا تنسين اي شي يصير وياج تخابريني وتكليلي 

- اني هم كلفتك وثكلت عليك .. انت اليوم دوام 

- لا خابرت كتلهم اليوم عندي ظرف رايد اجازة يدبرونها مالج غرض ولا تشيلين همي .. حيري بروحج .. تحبين البيض لو لا 

ابتسمت بوجهه .. ابتسملي : اكلي يمعودة ترجعين ويسممون روحج ويسدون نفسج مو من الاكل حتى من العيشة .. اكلي 

- ليش دا تساعدني ؟ 

- طمعان باموالج وجمالج الخارق 

- خارق ! هسه هذا ذم لو شني .. يعني اني مو حلوة 

- اذا شايفة روحج حلوة خير من الله اكلي 

- اذا شايفة .. يا دهر شمالني انوب اتعيب علي 

- هسه دكلي اكلي .. 

هزيت ايدي كام يضحك .. اكلت شوية وجلبت بالجاي ما طوله ع الصوبة صبيتلي ٤ كلاصات 

حجه : دكومي خل اوديج صرتي ترمز مال جاي .. كومي 

اتبسمت وكمت لبست العباية وتفقدت فلوس بصدري .. وطلعت وصلاني للشارع مال بيت عمي ، شاف وجهي كام يطي الوان حجه : انت صاحبة الحق مو هم .. فوتي واشكي واحجي بزودج 

- ولو حجيت بزودي منو يسمعني .. يدمغوني 

- اقلها لا تسكتين وخلي عمج يرجعج لبيتج 

- ان شاءالله مشكور ما قصرت 

- لا تنسين تخابريني وانطمنيني ترا راح يضل بالي يمج 

- خوش . 

نزلت ورحت لبيت عمي 

فتحت الباب وفتت .. لكيت جعفر اخوي موجود 

كال : وين جنتي ولج 

- تسالني اني وين جنت ما تسأل اخوك الذبني مشككه هدومي بالشارع 

اجا عمي : تعاي اكربي وكليلنا صدك بايكة اخوج مليون 

- اني بايكته عمي المليون مالي وهو الخذاه من فوك الكنتور واسال سهى هي خابرته وكاللها 

- يكول تطلع بدون علمي كل ما اجي الكاها مو بالبيت .. واخيرها باكت مليون من راتبي 

- وين طالعة حدي الكم وبيت جيرانه وهو يدري وبعلمه ويكلي روحي 

حجه جعفر : وين جنتي جاوبيني من امس وهسه 

- جاي تحاسبني بدال ما تحاسبه طاردني من بيتي 

حجيتها وجابني بجف ترس خدي : بيتج ووووولج ذالته ابيتج ام الوصخ بايكته وشادتله كرون واطلعين على حل شعرج وتعايرينه كاعدة ابيتججججج ما يصرفلج يكعد وياج تريدين البيت خاليلج 

- الله لا ينطيك يا نذل فوك حكي تصف وياه وتتهمني .. ما اريده يلا شتريدون مني .. دافع وياي فلوس بيت لو متسوكلي لو معيشني حتى تفرضونه علي بس دخانكم يعمي عيوووون ما اريده ..

عفوني بحالي لا اجيتكم ولا وازيتكم ببيوتكم وجاي ادبر روحي كوا على كوا وما عايفيني بحاااالي شتريدوووووون مني .. 

حجه عمي : بت الجلب شنهو النريده منج شنهي شيكولون .. بتهم  عزبة وكاعدة ليوحدها 

- من اني عزبة ومرة وعيب ليش طردني نص الليل بلا عباة 

- لانج مو خوش ادمية 

- والمو خوش ادمية تنطرد بلا ستر .. تخافون اكعد وحدي بس ما تخافون حجي الوادم من تطردوني بالليل بلا ستر

جعفر : اسمعي لج متحملج وواصلة وياي ليجاي منج تمشين اتجيبين المليون هسه لا وحق هو الله هنا ادفنج 

- المليون انطيته ووفيت بي دين ما ماخذته من احد .. 

- انعل ساسج هسه اتجيبين المليون لا احط طلقة براسج والله 

كام يريد يهد .. وعمي يدفه بسه ويكله : هسه تنطي اصبر عنك .. اكعد 

- المن اطيتي المليون لاسعد 

- لا مو لاسعد وفيت بيه ديوني ناس تطلبني 

- لا اتجذبين عمي وجيبي المليون 

- عمي مالي شنو هو الجيبي 

- لا تبلشينا وتسويلنا طلايب جيبي المليوووون ولج 

- ما عندي 

جعفر : عمي فدوة اروحلك اطينياها .. 

- شني الاطينياها مليون ما عدي مال دين واخذه مني ورجعته . 

هم بسرعة ولزم براسي وكام يجر بيه ويتصايح واني اصيح والتموا عمتي وميلاد يفاككني من اديه .. 

كمت اصيح وابجي واكله : كافي الله لا ينطيكممممم 

الله ع الظالممممم الله يشوفني بيكم يوم يبرد كلبي بيكممممممم 

جلااااااب لا معيشيني ولا كاعدة عد واحد منكم وتلومون بييييه . 

راد يلزمني .. جريت عباتي وطلعت منهم .. ابجي واصيح 

والم بروحي .. تبعني .. مشيت لبيت وفاء .. صعدت الها ، كام يدك الباب علي بقوة .. طلعتله ام وفاء .. ووفاء فزت : شكو يمعودة شصاير 

حضنتها وكمت ابجي 

شبكتني: شبيج ولج فهميني 

- ولج تعبت منهم والله تعبت 

صعدتلي خالتي ام وفاء .. وابوها طلع لجعفر 

كعدت اسولف الها .. كامت وفاء ادك على رجلها : هسه ذوله مو مال انزللهم حرك .. ولج فوك شينهم كوات عينهم يمممممه .. شني من ملة ذول 

- يريدون المليون .. 

- غير فلوسج فوك ما بايكج 

- والله احتاريت وياهم بالقران احتاريت 

- داهدي اهدي هسه ابوي يحلها وياها 

كمت اسمع جعفر كام يتجاوز بالحجي عليهم ويدفر ويكلهم طلعولياها 

خجلت حيل جا هسه شلون .. 

اخذت تليفون وفاء خابرت حازم 

كال : اني بالمحل راح اجي وانت بس اوخر جعفر من الباب اطلعي من بيتهم لا اتظلين عد بيت ابو اسعد روحتج الهم غلط 

- جا وين اروح 

- تجين للمحل .. هسه بس خلي اجي سدي 

وكفتلي وفاء : ها 

- ما ادري وفاء ما ادري حيل احتاريت 

ولج والله تعبت .. شرايدة منهم اني غير يعوفوني بحالي .. ويخلوني اعيش 

ضلت الهوسة كابة 

حازم مسوي روحه يمشي بالفرع واجا صف وياهم وكام يجر بجعفر وخابر على عمي .. المرابط بالدكان خاف يطلع منه وتخسر ثروته ربع دينار . 

على اتصال حازم .. اجا عمي وابو وفاء يتعارك وياه ويكله : البنية عندي لو تطخ راسك بالحايط ما انطيها الك امشي منا روووح 

وحازم يدفع بيه اجا عمي يركض كام يجر بجعفر ويصيح 

فضحتوني ويا جيراني من الله لاي نطيكم 

شلون انا بهالخلفة الزفرة هاي ابتلييييت 

وكام حازم يسولف ويا عمي و ابو وفاء وجعفر مشى 

.. بقيت كاعدة اسولف ويا وفاء الصار وابوها من جوا صاحل .. 

نزلت واني ع الدرج كضيت بوفاء : اكلج خوما اسعد موجود 

- لا يمعودة بالدوام  والولد بالشغل انزلي بس ابوي موجود 

نزلت للدوانية مالتهم .. حجه : تعاي عمي 

كعدت كباله ، كال : شماله اخوج شنهي سالفة المليون البايگته منه ؟ 

- عمي والعباس ما بايكته .. اني من شلت ابيت وحدي وما عدي غراض هكو سيد جانت عده محاضرة بالعشرة الاولى وكال بالمجلس للناس عليه ومحتاجة والناس ما قصرت لمتلي غراض ونص منهم اشترالي وهواي منهم لمولي فلوس .. اني جمعت الفلوس وزدت فوكهن واطيتهن لاسعد جيف يطلبني مليونين ونص مالت القسط 

- اي ندري بيها 

- اني ضامة المليون فوك الكنتور حيدر عاثر عليه وماخذه من التحق .. كدامي نكر .. بس لسهى كاللها عود من استلم راتب اوفيها واختي سهى شاهدة والله يا عمي هسه كون اخابرلكياها وتحجيلك .. 

المليون مالي وابالي اطي بس العشرة الاولى مال محرم جان كله شغل ما لحكت اجي واطيهن واخذهن مني من رد شفت المليون بجنطته ووياهن ٢٠٠ اني اخذت بس الفلوس ورديت فلوسه حرام لو خذيت منهن ربع والله كله اني الاصرف واتسوك دينار ما ينطيني للبيت . 

-والمليون وينه هسه 

-عد اسعد 

-جا حلال حرام يريده غير مالج 

-لا يصيح مالي وباكتني وحرام والله يا عمي محفظته يذبها ذب ما فد يوم مديت ايدي عليها لو خذت منها يكعد الصبح ادزله مني صمون حتى يتريك وما حجيت وتالي يكتلني ويطردني من بيتي 

—خل يولي عوينة ابو هله ضلي هنا بتي ولا يهمج انا احجيلج وياه . 

ضل يحجي ويلوم على تصرفات اخوتي 

اخير شي كاللها : وفاء بوية صبي لصويحبتج اغدي خليها تاكللها لگمة وانا احلنها لا تخافين بويه يولون اكصه كص والله اللي يكربلج 

- مشكور عمي يطيك العافية 

كمت ويا وفاء صعدنا للصالون .. 

كالتلي : هذا رقمن الخابرتي عليه كبل شوية 

- رقم حازم ابو الانشائية 

- وحازم ياهو مالته 

- جا لو ما هو اني البارحة بالضيم والعباس 

- جا وحازم ياهو ماته بسالفتج 

- مو خابرته بالليل حظر تجوال اريدلي نفر بالشارع ماكو .. عاد اني اذكر عده سيارة خابرته واجاني خطية السيطرات كلها اتوسل بيها عده ظرف وعبرهن انوب سواني مريضة 

- يا وحافظة رقمة 

- من شلت .. حفظته 

-سوالفج هواي ولج تعاي جاي .. شنو الموضوع 

- والعباس ماكو كل موضوع افرغ من جيبج 

- ايييييي هو الطرح سالفة بيت وحدج وهو سعى بيها وحققاها و شيلج وساعداج وصايرلج باتمان تقنعيني هيج منها لله بلوشي !؟ 

- جا وشعدي انطيه شوا اني والمجدي سوا 

- لا ما كلت فلوس بس اشم ريحة حوب بالسالفة 

- امداني .. اني نصيبي بس القهر والضيم وين الله كاتبلي حب كاتبلي صخام .. والا شفايتلي اطيحلي بزلمة بيه خير ويخلصني من اهچلاب ذول التنهش بيه 

-اي ما بيها شي حازم زلمة شهم ومعدل 

غمزتلي .. وحلو 

-بالعافية ع الماخذته

-يعني ما مفاتحج 

-باع هاي .. شبيج كلشي ما بيناتنا وبعدين هو متزوج 

خكه صدك ما كتلج تدرين منو طلعت مرته !؟ 

-امل 

-اي هاي اللي تريد تزوج رجلها 

-اي شبيج ام علي التجي تحف يمي مو خطبتج اله جا ما تعرفيها 

-لا وعلي ما عرفت الا اليوم 

-حرامات فاتتج تريدين احجيلج وياها او افتحلج موضوع 

-لا لا على بختج لا تنجرع ولا تنحمل .. تكلج جذب ما تحب رجلها .

-لا يا تحبه انت رايدة بس تخلص منه بس جيف ابن عمها وعدها منه جهال كبار ما تكدر تطلك هل تريد تزوجة وتفتك والا شايفتلج وحدة تدور مرة لرجلها

-وربج تريده وشعارة السانها يهلها 

-بت سوك وعدج الحساب شتريديها فقيرة 

-حرام اكوم اترحم على اخوتي وايامهم لو كابلتها 

-تريدين تقنعيني ما معجبة بحازم انت لو ما رايدة تتقربين منه 

-لا علي العباس .. بس ما اخفيلج امر انت صاحبتي واخيتي ارتاح من احجي وياه ما ادري اهيس احجي ويا روحي ويا مرايتي من احجي كبل اجرخ البكلبي واحجي همومي 

-يا من هاي يركضلج 

-اي والله الا كل سالفة ما بينا حرام 

وجوهنا وجه مال ضيم مو مالت حب وعشك 

-اي بالعباس طاح حظنا وكلشي ما شفنا من امدانا نركض والعشا خباز والنشتغله بحلوك غيرنا زين لو كدرتي تحطيلج بيت بالاقساط .. اني ابوي كاضيني اطيني اطيني لو مرة كلت ما عدي شال وجهه عني اسبوع يكوم ما بحاجيني .. 

خو نسوان اخوتي اسكتي وخليها ما جن عدهن زلم 

وفاء معجون 

وفاء بهارات 

وفاء چاي  

وزلمهن واحدهم راتبه ب٧٥٠ والمليون ولاحكاتني وحاطات عيونهن على هالجم فلس الاخذهن من النسوان

 وابوي يكوم يكعد يعايرني امفتحه صالون من بيته خاف مرة اكول ما عندي وما انطي .. شتحجين وحدتنا شيبت وهي بعز شبابها من ضيمهم وعلي .. وذاك الاحبه نايم ويا مريته وكلبي مبتلي 

صدك مو وجوه حب وراحة .. حصتنا من هالدنيا بس الضيم والشگى 

- اي بالعباس

- اكوم انزل اصبلج يمعودة .

كامت واني ذبيت حسرة وجريت الريموت و كعدت اكلب .. 

اجتي مرة .. صعدت كالت : رايدة احفن 

كتلها : تعالي 

كعدت كبالي جريت المخدة كسرت المخدة وخليتها جواي وجريت الخيط .. كضيته بسنوني وكمت الف على اصبعي .. دخلت وفاء : يا اني احفها لا اتعبين روحج اكعدي 

- ما عندي شي اصلا ما مشتهية اكلي 

كمت احف بالمرة .. والمرة تسولف وتحجي بضيم عيالها .. 

واحنا نستمع خلصت اطتني خمسة حطتها بيدي وطلعت .. كمت اطيتها لوفاء كالت : مصرفج خليها 

- عندي الحمدلله 

- شعدج يمعودة .. حالج من حالي متوقف الشغل وماكلين وحل 

- لا الحمدلله عندي 

كمت غسلت وهي تكول : لازم طايحتلج بكنز ولج 

- شكولي شكول كنز 

شفت وكعدت كتلها : حازم عده زكاة ما ادري شنو هاي مال الخمس 

- اي فلوس الخمس 

- الله ينطي اطاني منهن كال تستحقين ما طول ما عندي معيل .

- عمي شريف هالحازم شبيج يغمة دجرجري 

- اجرجره شلون شسوي !؟ الرجال رايد يلم بيته ويكعد مرته اني اروح اجرجره 

- باع هاي .. يا مرته انت هي هاي هم مرة شو هي التريد اتزوجه 

اخذي احسن ما غيرج تشوبش عليه 

- واني اروحله لو يريد هو يجي خو ما اني 

- اي جا كتلج روحي ذبي روحج عليه بس اتلحلحي 

- شسوي يعني ؟ 

- خايبة  كل يوم ويومين جري الاسود وحطي الاحمر والبسيلج ملابس حلوة وعدلي روحج ومريله وبيعي رقة ودلع واتمسكني الزلمة يموت ع المرة التتمسكن .. وجيبي راسه خايبة 

- اكلج وفاء شو ما تكومين عني جا من بيج خير اتجبين روس زلم وصايرتلي خبيرة ما جبتي راس حسن .. هالراح منج وضليتي مكابلتني .. تنصحني ام الكلك 

طكتها ضحكة 

واني هزيت ايدي : والله .. 

كامت تضحك من كل كلبها وتفل الشيطان بحلكها 

كمت اضحك على ضحكها 

.. وبقينا اني وياها لليل ماكو احد اجا .. وتليفوني ما موجود حتى احد يخابرني ولا واحد من عمامي اجا ولا اهلي .. عاد كالتلي : شو بدلي خل نروح لصورة السيد نتمشى نشم هوى طكت روحنا من البيت .. امشي 

.. كتلها يلا 

بدلت وجاي ننزل .. طلع اسعد من الدوانية كال : شني صبا عدنا 

- هلا بيك خوية شلونك 

- يا هلا ومرحبا .. من يمتى هنا شو ما ادري 

وفاء : شاردة وجاية عدنا .. اخوها متحلف الها وابوي اتكفل السالفة .. وطالعين نتمشى للصورة هم ناخذ مراد وهم نشتم هوى 

- هاه .. ديلا خل اخذجن بالسيارة اوصلجن .. وعود بالطريق افتهم الموضوع 

وفاء : اكلك نريد نتمشى وانت تكلي اوصلج 

- دكلي خر** واصعدي .. تتمشى هي 

يلا يلا اصعدن 

ندستها وهمست : خل نمشي 

- دمشي عود بالرجعة نرد مشي 

صعدت هي يمه بالصدر واني ورا وهو يستفسر .. طلع من الفرع كله نزل على شارع الداخل .. حازم واثنين زلم واكفين مقابيل محله يسولفون .. من شافه اسعد رفع ايده وصاح : ابو علي الغالي 

اندارله حازم  وكاله : حبيبي اسع... 

قطع سلامه من شافني من الجامة كاعدة وراه .. 

ضل يباوع ورانا .. 

ضل اسعد يسال ووفاء تجاوبه .. 

واني اجاوبلي كلمة كلمتين واسكت ومثكله وجهي .. 

وهو مغلس مسوي روحه ماكو شي ولا كأنه النكس طالبني متعة كبل ايام . 

وصلنا للصورة .. ونزلنا .. شو هذا صف السيارة ونزل 

وفاء راحت تاخذ شمعة من المعلوكات يم الصورة وهو وكف يمي : احسج زعلانة 

- خوية ما زعلانة ووكفتك يمي غلط اني لو ادري توصلنا لو تنزل ويانا ما اجي 

- افا هذا كله لان رايدج 

- شرايد رحمة لاهلك .. شو اسكت مني وابعد الله يخليك 

- هسه نتفاهم انت شني التريدينه عمي مو متعة زواج دائم بعد 

- لا دائم ولا عائم اني مرة مو مالت زواج 

- لا ليش اكو زلمة ما يتمنى يحطج مرة عنده شو جنج كمر 

- ايعد عليك العباس روح 

- بداعتي فكري بالموضوع 

- ما افكر جوابي تعرفه 

اجت وفاء كالت : جا ما تاخذيلج شمعة للحاجة 

- وشعدي اخذ .. ادعي يموت اخوتي لو يبنيلي خيمة بالمريخ حتى افتك 

حجه اسعد : ادعي برجل ياخذ

ضحكت وفاء : صدك ادعي برجل 

- على كولت  ذاك الشاعر يكول هي من الاول ما صفت عود ارتجي لتاليها .. هو الاول شلونه حتى افكر بثاني بعد كلبي ما تسكتين . 

- اسعد شني راح تضل 

- جا موازيج ياهو ماتج 

- لا بس جاي اسألك 

- انتن تردن لو لا 

- لا مو هسه خل شوية نكعد 

لزك اسعد فد لزكة لا راح ولا تزحزح واني كضيت بذيال وفاء ووفاء طلعت رايده تشوف حسن من ابعيد واسعد فكس السالفة كلها .. كمت ازن حتى نرد .. 

لحد ما خابرت ام وفاء كالتلها : كلي لصبا اختها سهى يمنا جاية عليها 

عاد بسرعة ركبنا ويا اسعد رجعنا .. 

واصر الا يوكفنا ع الشارع يشتريلنا موطة 

جابلنا ورجعنا .. 

شفت سهى سلمت عليها .. واخذتني وراحت لبيت عمي .. 

دخلنا عمي وجعفر و حيدر موجودين .. 

كاموا يحجون بوجود عمي .. حيدر نكر على سهى سالفة المليون الماخذه من الكنتور وسهى تخبلت 

كتله : عمي هسه اني جذابه و اختي جذابه .. واحنا البايكين 

كال : فضي المشكلة ورجعي المليون 

- والله عمي لو عندي بعيني بس المليون انطيته دين 

حيدر يكله : مالها رده للبيت اذا ما تنطيني المليون 

كتله : ليش شني البيت بيتك مشتري حتى تطردني منه 

صاح عمي : طايحة الحظ احجي باحترام 

- عمي ما تشوفه يطردني من بيتي 

- بيتج شنو مستكعدته انت وتصيحين بيتي ما طول اخذتي منه المليون انت شراكة وياه بالبيت 

- شراكه شنو .. هو يمتى انطاني مليون حتى يشااااركني ؟ المليوووون هو اخذه مني والعبااااس 

- سمعي ولج جزعنا وچل افادنا من مصايبج وطراكيعج من يوم ما اتطلكتي وذبج علينا واحنا مبتلين .. اتصمين حلكج لا وحك علي .. نلتم عليج اني واخوتج ونطكج وندفنج 

- تحلف بعلي كافل الايتام وانت تاكل حقي وتصف ويا الظالمني عمي .. اني ما ذابة روحي عليكم اشتغلت وعيشت روحي واشتريت بيت على كدي وانتم الاجيتو وزاحمتوني وذبيتو بمصايبكم علي بس لان مرة ومالي اليحاجيكم متوليني .. سهى ما تحجين 

- خيه هسه هو بيت تجاوز واثنينكم كاعدين بيه .. بيه ورقة بيه صخام حتى تتشاركون بيه .. ارضي وفكي مشكلة 

- جا هو هيج هيج كاعد وياي وياكل ويشرب بلاش ..  ليش يحجي بالشراكة لو ما اكو سالفة براسه !؟ 

جعفر : بتل بتل تعايريه ياكل ويشرب بلاش غصبا ما عليه 

- جا مو هو الزلمة واني المرة ومكاومين باعتباركم مسؤلين علي .. بس يم الصرف تصير السالفة غصبا ما علي .. غصبا منين اجيب ؟ 

جعفر :- لا تعلين صوتج لا اكوم افرك حلكج وووووووالله 

- من ما تلكون حجة تحاججوني بيها تكولون لا تعلين صوتج .. عمي احجيلك حجاية حق 

- الحق ترجعين ويا اخوتج واتسكتين وتنجبين وبطلي مشاكل ومصايب ترا ملينا يومية يا صبا يا طركاعة صبا 

- وصبا جاية يم احد نايمة بجال احد ماكلة من احد .. شو بخيرهم ما خيروني بشرهم عموا عليه 

حيدر : تعاي جاي يا همه البشرهم .. شو تعاااي 

كامل فزت سهى وكفت كباله .. وكام عمي يصيح وجعفر يغلط ويوسف يهدي .. وانتهت وعمي يكللنا : اطلعوا من بيتي كلكم انعل ابوكم لابو الخلفاكم طلعواااا 

طلعنا اني اريد امشي وسهى تجر بيه تريديني اصعد ويا جعفر .. 

كاللها : خليها ترلي هالنكسة حتى ما اصعدها بسيارتي 

جريت سهى وطلعت للشارع واني الوم واحجي عليها : جا انت جاية لعيبة الصبري .. غير تحجين تكولين .. بس اني الاحجي وادافع 

- وعلي حجيت لحد ما مليت كبل لا اجيبج حتى صياح كمت اصيح بس ما يفيد وياهم صبا شتسوين 

- وشلون ؟ 

- ارضي خيه واسكتي شبيدج 

- ولو سواله سالفة وحطني بالباب 

- عود ذاك الوكت ندخل مثل ما هسه ادخلنا 

- قصدج من يوكع الفاس بالراس وتجون تطمطموها وتصمون حلكي مثل ما صميتوه هسه وغلبتوني . 

- اي شبدينا يلا كليلي 

- من ساعة السودة بحظهم وابختهم ناخيه الزهرة وهذا مصاب ابو عبدالله اليطلع حوبتي بيهم . 

رجعنا للبيت .. لكينا البيت على هوسته 

كمنا نظفنا وشمرنا التلفزيون برا .. وعدلت الغراض الميز ما ذبيته بس صفحة منه مكسور .. والكنتور بس الباب مدفور الخشم مالتها من النص طاب جوا .. بس الباب ينسد 

وهي تشتغل خابر عليها رجلها سلمت عليه ومشت .. 

اخذت تليفوني .. ودكيت على حازم .. ما رد 

رجعت خابرته خاطر اكله رجعت 

بس هم ما رد .. 

كتبتله ( اني رجعت للبيت كاعد اتصل عليك ما جاوبتني ) 

عفته وكعدت ..ارتب بغراضي وفرشت وبقيت متمدده اسمع لطميات بتليفوني لمهدي العبودي على محرم ... وافكر باجر امشي واجيبلي اقمشه اخيط بيهن وجوه مال مخاد .. تلبسيات مال جرباية جرجوبة مال تلفزيون اقلها اشتغل هيج امور النسوان ترغبها . 

بنص تفكيري فات حيدر شافني 

حجه : اعلمج اعلمج .. عود اعديلجياها 

وعلي الا ... اجا بقوته دفرني وكمل ... اعلمج 

طايحة الحظ .. انداريت عنه ما جاوبته اتجفى شره 

صاح : كومي فرشيلي يلا كوووومي 

كمت فرشتله ورجعت لفراشي .. تغطيت وانداريت عنه 

استهضمت بس منو يهتم البجيت والما بجيت اقهر روحي .. 

ظليت بس اتكلب 

ثاني يوم الصبح ..

كعدت حيدر ماكو كمت لبست هدومي وطلعت للسوك اتسوكت وجبت قماش .. رجعت تعبانة ذبيت العلاليك وكعدت فحطانة حيل انعثل بغراضي .. 

جريت تليفوني 

حازم لا جاوب ولا رد ع الرسالة ! 

تندت وباوعت لجواريبي سود وحدة نازلة ووحدة صاعد 

خرب حظي وخر* بعيشتي 

اتعب واركض واشتغل وشمستفادة 

حتى اوفي البيت ويشاركني بيه حيدر 

يامن تعب يامن شكى يامن على الحاضر لكى 

ذبيت حسرة وجريت التليفون بتعب دست اتصال على حازم 

يدك يدك وما يرد .. راد ينكطع الاتصال .. جاوب : الو 

- الو ها شلونك ابو علي 

- هلا 

- خير صاير شي 

- لا ليش 

- ما ادري اكول دزيتلك رسالة وما جاوبت 

- ها .. اي 

-ردت اكلك رجعت بس بطياح حظ حسب عليه المليون شراكة بالبيت ما ادري شيفكر هو البيت تجاوز شراكة شنو !؟ وشنو غايته 

والمشكلة عمي وجعفر صافين وياه 

و سهى ما كدرت تردهم 

واكلوا حقي 

-اني شعليه بيج ؟ ليش دا تحجيلي امورج الشخصية 

-ما فهمت 

- بابا انت وحدة ملعبة واخوتج ما يلامون بيج يعرفوج وشأنهم شيسوون بيج يسوون 

- يا شو كلبت عليه شبيك 

- روحي بابا روحي .. العبي بعيد 

سده بوجهي 

استغربت .. هذا شبيه ؟ 

وليش هيج يحاجيني واني شسويت !؟ 

رجعت خابرته .. ما ردت 

رجعت خابرته مرة للخ .. جاوب 

انهديت بيه : مو عيب تسد التليفون بوجهي شني صغيرة عدك لو اشايفني حتى تكول ملعبة .. 

- جا من تصعدين بسيارة واحد رايدج متعة وتعرفينه بعده يداور وراج شيسموونها هاي استشراف لو عفاف !؟ 

- يا عفاف يا جفاف وانت ياهو مالتك اصعد وين ما اريد شني تحكمني !؟ وياهو انت حتى تحاسبني 

- جا من انا ياهو المن مخابرتني تحجيلي مشاكلج انا ياهو مالتي !؟ 

- مو عسبالي زلمة ادمي ما عبالي انت هيج 

- واكتشفتيني حيوان مو ادمي .. عمي خلف الله عليج جا هي هاي جزاتها اليساعد له وحدة بربوك شينتظر ؟ روحي بابا روحي 

- تعال جاي ياهي هاي البربوك !؟ 

سده بوجهي .. 

رجعت خابرته ما جاوب .. 

كتبتله ( اذا انت زلمة رد ) 

رد برسالة ( ماكو زلمة يرد على وحدة مثلج ) 

رديت ( بسيطة يا حازم لا ما اجيت شهرتك وخزيتك بالمحل فلا اطلع بت ابوي .. لا اعلمك مني عاي البربوك والما تستحي بسيطة ) 

سديته منه وجريت عباتي اريد اطلع 

اتذكرت هسه ظهر يعزل ويروح لبيته 

لازم العصر لو بالليل .. بسيطة يا حازم لا ما اعلمك منو هاي التعلط وتفشر عليها .  

كمت افتر بالبيت .. وروحي فايرة 

وعيوني تجدح نار واحس مسممة كعدة ما عرفت اكعد .. 

دخل حيدر .. فات جوا .. صاح : غدا ما مسوية 

اني مشتعلة نار وهذا البطران جاي يصيح على غدا 

كمت طشرت العلاليك واشمر بيهن واصيح : اكل هاااك اكل .. اشبع بطنك وفضنييييي اكل 

- نصي صوتج لا ادرس بمصارينج والله 

- ما ادوس شمنتظر انت مو عسكري مسدسك وين انت شو ما تفتهم طكني بمسدسك واخذ كلشي وخلصني .. فكوووووي منكم فكوووني اني اريد اخلص انيييييي ما اريد اعيش متت ولكممممممم متت ما اريد اعييييش 

بحظكم وابختكم امي وابوي يوم الخلفتوني وذبيتوني بهالدنيا ومشيتوووووووو الله لا ينطيكم على سوايتكم هاااي ما بيكم خير تخلفون المن جبتوووووني للقهر للضييييم .. جبتوني مشوها وكسرتو بختي لييييييش 

فقدت كمت اصيح 

حيدر خنس طب بالتواليت ساعة ما طلع 

ضليت كاعدة برا .. افور رغم الدنيا ثلج .. 

لحد ما كالت الـ ٣ هاي اني 

لبست عباتي وحولت على سارة اخذت منها الفلوس باقيات ٤٢٥ الف .. خذيتهن وطلعت بيهن للداخل .. وصلت المحل مسدود بعده ما مفتح .. 

باوعت الساعة البموبايلي الساعة ٣ ونص .. جا شوكت يفتح 

كعدت بباب المحل انتظره على نار وين يروح مني 

شفت سيارته وابنه نزل وياه كمت من مكاني واتخصرتله بعبايتي 

باوعني حصرته الضحكة بس عكد حاجبة عود يخفيها ويباوع على يسرته ويمد ايده بجيبه طلع محفظته انطى لابنه ودزه للمحل واجا .. 

متخصرتله وكتله : منو هاي البربوك !؟ 

: هششش كلمة ما اسمع منج منا الناس لا تخلينا علج بحلك الوادم 

حجاها وهو يدور على مفاتيح المحل بين المفاتيح 

-لاااا خايف .. مستحي بس ما استحيت من كتلي بربوك 

-هش اسكتي خل افتح الباب كتلج 

-افتح افتح خلي اعلمك على منو تغلط وتتجاوز افتح 

رجع يحصر بضحكته ويحاول ما يضحك .. فتح الكبنك ورفع وفتح باب المحل وفات فتت ورا .. نزل الكبنك ليجوا .. وسد الباب كتله : وليش سديته 

-خوما انكتل كدام العالم ؟ 

-اكلك شوف لا تسويها بضحك وتتمضحك .. وكلي منو هاي البربوك وما تستحي 

-انت 

-ها مصر يعني 

-لا الامارات 

- يا تقلد حضرتك وتنكت ..خب اسمع شوف والعباس اشرفك واشرف اهلك وامك وخواتك ونسوانكم كلهن بخويطهم وجبيركم جبيركم جايف جبيركم 

-اي شبيه 

-ما يوصل ذيال عباتي  افتهمت لو لا 

- فهمت ، المطلوب !؟ 

- ليش تغلط عليه !؟ 

-جا التصعد بسيارة رجال رايدها متعة شيسمونها ؟ 

نزل المرايا وكعد يتمعن بمحاسنج وانت صاعدة وياه وراه

اتوسل بيج دكلج ناعم .. حسيتي بروحج مرغوبة ورفع معنوياتج 

هاهيه بالعافية عليج .. اتوكلي 

- وانت ياهوووو مالتك اصعد وين ما اريد انت شنو عم وليد خال بنية 

- اي هاهية مو كتلج اتوكلي بالله 

- هاك ذني فلوسك التصدقت بيهن علي ما اريدهن ولا بعازة فلوسك هسه لو يكطعني الجوع ما اخذ من الفلوسك اطاني فلوس خمس ملكني كام يتحكم بيه .. هاك هاك اخذهن

وصفكتهن ع الميز وكملت : 

-وها عن الحلال والحرام ناقصات ٧٥ هالاسبوع يجنك  

-جاي اتلعبين علي ما طول رجعتيهن ترجعيهن كاملات 

-اي اكملكياهن هالاسبوع لو اعرف احفر الكاع واجيبلك ياهن ولا اضل بمنيتك 

-مو مشكلتي مثل ما اطيتجياهن ٥٠٠ يرجعن ما ناقصات دينار 

- اني من اطي كلمة كلمة مرة ما ارجع بيها مثل غيري لا تخاف اوفيك 

-خلي كلمتج على حالج واخذي الفلوس من كدامي واتوكلي 

- هي شني التوكلي اطرد بيه انت 

-محلي وما اريدج بيه انتي ياهو مالتج 

-خب اسمع شوف والعباس لا تكول مرة ترا انام بخوانيكك والله والله ومحد يفكك مني 

- جا يلا اذا تكدرين شمنتظرة 

- خب لا تختبرني 

ابتسم ومد اديه يفرك بوجه : هسه شتريدين 

- ليش تغلط علي 

- ما قبل تصعدين ويا اسعد 

- بصفتك شنو بالله !؟ 

انرفع الكبنك .. كالي فوتي للمخزن بسرعة 

زركت بسرعة طلع ابنه كاله : ابني روح جيب الصوندة من حجي منير وامسح المحل واغسل بابه يلا ابني عيب يجون الناس وهو وصخ .. استعجل 

- ماشي يابه 

راح مشى وكف اباب المخزن : اطلعي فضيني 

- مجاوبتني 

- رجعي لبيتج صبا واتأدبي 

- انوب مو مؤدبة يا ربي شسوي اشك هدومي انت ليش تغلط ليش 

- شكيهن جا هسه منو لازمج 

- اني الما استحي موو انييييي يا فاسد .. يا ما تستحي 

ياااااا ابو علي الـ.       الـ شررررريف 

عبرته بهمه وهو جر عباتي من ورا انرديت ... بسرعة وعافني 

وجر الفلوس : غصبا ما على راسج شريف وذني الفلوس اذا ما يرجعن كاملات ما اتقبلهن افتهمتيييي .. يلا منا 

-بسييييييطة اني الك ...... يتبع 

تكملة الرواية من هنااااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا