رواية عاجر الفصل الثامن 8 بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الثامن 8 بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثامن 8 بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٨ 

طلعت منه روحي فايرة فور 

حجيه وكلامه مستفز .. والله ما اقبل تصعدين ويا اسعد

وانت منوووو والله يالله ياهو الكام وصار سيد على راسي ويتأمر وفرض 

من امدا حظي وقسمتي اي والله .

نزلت للشارع ردت اركب امشي للبيتي بعدين افتريت ومشيت على بيت ابو اسعد .. جريت السيم وفتحت الباب وصعدت لوفاء كبل .. 

فتحت الباب .. لكيتها واكفة وبنية كدامها ع الكرسي كاعدة .. حاطتلها الكب ودا تطلع خصل بالسنارة .. اول ما طبيت كالت : الله جابج .. تعاي بدالي عليج الله 

ذبيت عباتي وحجابي ووكفت اخذت السنارة منها وكفت وراي تطلع الاوكسجين والبلوندر وهي تسألني : اي بشري شصار 

- عزا وصخام يمعودة شصار 

- شبيج بعدكم ما خليتوها 

- لا كضت ورجعت بس تعبانة 

- منين 

- من هذا الطالع عليه من تالي يغلط 

- ياهوه ؟ 

- عوفيها يمعودة 

ندستها واني اطلع .. البنية كل شوية تصيح : اخ عفية كاعد توجعيني 

- حبيبتي بس عدلي راسج طبعا تتوجعين اذا بس اريد امد ايدي تجرين راسج .. اثبتي 

- وشدعواج تصيحين 

حجت وفاء : دثبتي جوا ايدها يا عيني خلي تكملج بسرعة 

تنهدت وهي تحاول تكسر عليه : وهسه شني رجعتي للبيت 

- اي 

- امس خطية اسعد جايب عشى بالليل حسباله انت هنا 

- اي .. 

- اليوم كلش لامة عدج اكعدي اني اخلص بمكانج 

- وفاء رايدة شغل .. لازم اشتغل 

- شكو 

- حازم ابو الانشائية مو اطاني ٥٠٠ صرفت منهن ٧٥ لازم اكملهن .. وارجعن 

- ليش ترجعيهن هو مو اطاجياهن زكاة 

- ما اريدهن 

حجت البنية الكاعد اشتغل براسها : حازم ابو علي ؟ 

باوعت لوفاء مجاوبناها حجت : يصير رجل بت خالي .

وفاء : بت خالج اللي تشتغل بالسوك 

- هو خالي وولده كلهم بسوك الكيارة .. 

- حبيبتي واحنا شعلينا بخالج وبته ورجلها !؟ الزلمة يطلبني فلوس ورايده اوديهن انه .. دهر اسود رابطة فيشتج وياي . 

وفاء : يماي اليوم الاعصاب كابة نار يمج 

انطيني اطيني لا اتكتلين المرة 

البنية تضايقت

- والله طالعة روحي والعباس بودي هسه كون اكبع واطلع للامير 

- اي دروحي ربع يذبج ابانزين خانه مناك اركبي كوستر نجف .. ب٨ الاف الكروة 

- منيلي يمعودة اني حايرة شلون المهن اروح اصرف منهن .. رايده شغل .. تلفزيون كسره حيدر والبيت يخنك والشارع يخنك والناس تخنك بودي اطك واهج لديرة ما بيها بشر 

- كلنا نتمنى هالهجة بس ما طايحة بيدنا 

مجاوبتها 

كملت : المشكلة ايام محرم وصفر كل شغل ما بيهن ركود بكلشي جان كتلج تعاي يومية اشتغلي وياي واحسبلج ١٠ باليوم واذا زاد الشغل ازيدلج .. بس شوفة عينج وين ليون تجي وحدة تحف لو تصبغ .. 

- ادري بس لازم اشوفلي شغل ما لازم اضل هيج . 

حطت الخبطة مال الاوكسجين على راس البنية ونزلت صبت غده وكعدت تسولف ويايا حاولت تعرف الموضوع .. ما حجيتلها الصراحة شكلها حازم ضايجة جيف صعدت ويا اخوج .. هسه تكلي وشبي اخوي .. سكتت 

لهناك سمعت صوت اسعد اجا 

كتلها : وفاء اني راح اروحن معتازة شي 

- لا يحبيبية ديري بالج على روحج 

- اودعناج 

كاعد انزل .. اتلكاني اسعد طلع من الحمام البرا كال : ها جا كالوا مشت امس 

- هلا بيك خوية 

- شني انحلت سالفتكم لا 

- الحمدلله كضت 

كاعد احجي طلعت وفاء : صبااااا ، صبااااا 

شافت اسعد سكتت .. 

وهو يكلي : جا شبعد !؟ 

اباوعلها شتريدين 

لزمتني وهي تكله : صباوي محتاجة شغل ما تخابرلها جماعتك منا منا بلكت الله ويلكولها شغل 

- جنها على شغل اليوم ادبرلها صدك جذب .. خادم 

فتحت : يااااا هذا اخوي 

ضحك وذب المي عليها وطب 

همست باذني : اريدج تودين حاجة لحسن 

- يا واني شمعرفني بحسن يمعودة لا تجيبيلي سالفة 

- عليج العباس بس هاي توصلينها اله 

- يا دخيل العباس شيوديني اله وفاء على بختج 

- ولج ع الشارع بس ما اكدر انزل واروحله فدوة عليج الله 

- هسه هاي طلعة يا وفاء 

- دمشي منتظر امشيييي 

طلعتني وهي تغمزلي وتضحك ودعتها .. ومشيت للشارع 

ما اعرف حسن اني شايفته بصورة وحدة سمين جنه مطرب اسمه عماد الريحاني باغنية ( وحشتوني ) .. من وصلت الشارع شفت سيارة كيا وباوعت الولد يشبه هذا المطرب .. تقربت صحت : حسن 

اندار : عيونه 

- خفن وطفن خير خوية اعرفك تعرفني وترد هيج شمالك 

ضحك وكال : جا عليمن صحتيني 

- هاي امانة ودوها الك جماعة 

- ها انت صبا 

- اي 

- سامع بيج تحجيلي عنج بس ما عبالي هاكدج طلعتي صغيرة 

- جا كايلتلك عني عجوز 

- لا يعمي كمر 

- خوية شمالك .. شو توكل 

- جا انت مو رايحة للشماعية 

- وانت ياهو ماتك وين اروحن ؟ 

- هم الجماعة كالولي وصلها بطريقك .. اصعدي 

- مشكور يكثر خيرك 

- مكعدج يمي رب الحلو حالج حال العبرية ليورا .. 

- اتوكل خوية 

حجيتها وعبرت الشارع حتى اركب للشماعية 

التف واجا وسيارة ما واكفتلي .. ضحك : دصعدي واطيني كروة شمالج جلف 

هزيت ايدي وفتحت باب الكيا صعدت 

داس الها .. حجه : كالتلي اخوج طاردج من بيتج صحيح 

- الكتلك صحيح والكلت لك غلط بيش راح يفيدك الجواب !؟ 

- شبيج نسولف نكضي الطريق 

- واعرفك تعرفني وتسولف 

- ليش هيج متكبرة وشايفة روحج 

- طاكة روحي مو شايفتها شوف دربك من حلك ساكت واذا ما تكدر صف السيارة خليني انزل 

- على كيفج سكتنا . 

ساق وصعد عبرية .. وضل يفر لحد ما نزلوا كلهم لف ع الشماعية .. كال : بالسجن انت مو ؟ 

- لا نزليني هنا اكملها مشي 

- صدك جذب شنو السالفة دليني 

- خوية اريد انزل 

لح ومستمر ولعبت روحي منه هذا مدري شلون وفاء ضيعت عمرها كله عليه وهو من وجهه مبين ملعب ابو نسوان ما ينجرع . 

وصلني قريب من بيتي نزلت انطيته الكروة ما قبلها عفتها بمكاني ونزلت .. ضل بمكانه ما راح لحد ما دخلت البيت . 

دخلت .. حيدر نايم 

من انضرب الباب وراي كعد : وين جنتي 

- يم وفاء 

افتح بدكمة الضوا ما تشتغل : جا ماعدنا كهرباء 

- سحب وابو المولدة منزل الجوزة 

- اي وما انطيته 

- واني منلي اطي مو خذيتي راتبي كله ابوووك 

- وشلون هسه 

- عوفي الكهرباء وكولي وين جنتي 

- جا مو كتلك يم وفاء 

- شتسوين 

- ادورلي شغل شوفة عينك المكينة جيمت ومحد دازتلي فصال 

-وهسه ما مسويتلنا غده 

-حيدر شو روح مني اني محتارة بضيمي وانت فوك الحمل تعلاوة 

-جا نموت من الجوع 

-ذاك الشارع وروح اكل منين اجيبلك اني 

-مو متسوكة اليوم سويلي طماطة تكلاه وجاي . 

تنهدت وكمت من مكاني سويتله وحطيت الجاي ع الصوبة واجيت كابلته وكعدت غمست كم لكمة وبقيت اسفت چاي 

وهو يسولفلي المواقف اللي اتصير وياه غاد بتلعفر وشلون حالهم وشلون الشغل هناك تعب .. كعدت استمعله لحد ما غربت الدنيا كتله : بروح امي جيب شموع وياك كبل لا تطلع 

عاد صدك راح جاب شموع واخذ سيارته وطلع بيها 

واني ظليت على ضوا الشمعة كاعدة لحد ما جتي الوطنية . 

يوم ويومين واتلاثه على هالوضع 

ويوم عن يوم جاي اكره روحي بالزايد 

حيدر يطلع ويا الغروب يرجع تالي الليل يلف راسه وينام 

واني ضاله انتظر الوطنية حتى اخيط وتلفزيون ماكو .. وطاكة روحي فد نوب . 

بالليل ..  

جانت الكهرباء طافية واني كاعدة على ضوا الشمعة 

اكمل الخياط بيدي مال المخدة .. وحاطة قوري الجاي يمي ع الصوبة واشرب كلاص ورا كلاص .. 

وافكر ما ادري ليش سالفة حازم حازة بروحي 

اكول ما اهتم بس ما جاي ابطل تفكير 

اشاف علي ويكول عني بربوك .. صعدت وياه وحدي قابل غير اخته موجودة وهو لزك .. واني شكو مهتمة الكال والما كال .. يطبه طوب اصلا ما خابر ولا اعتذر ولا همه 

لو يهمه امري جان اعتذر خابر اتأسف مو يطردني من محله ويريد الفلوس الا كاملة .. وما يعذر سوالف واحد رايد زلة .

احس بفراغ ما ادري شلون اشرحه 

روحي شنهو احساسها .. هيج كأنما باهتة وطافية الوانها 

والكآبة مالية صدري  .. واني اخيط واحاول الهي روحي

اندكت الباب .. 

بس الهوى عالي حطيت اذني حتى اركز باب ديندك صدك لو الهوى ! سمعت دكة ثانية عفت الخياط من ايدي وكمت جريت شالي وصحت : ياهوووووو 

اندكت بقوة بدون جواب 

مشيت وكفت يم الباب : منووو 

حازم : اني 

- يا وانت شعندك جاي 

-دفتحي 

فتحت : شرايد انت شرايد 

- من صخونة لهالملكى هذا .. هو هيج اليرحب باحد جايه 

- جيا وين اخوي جوا .. شعدك جاي 

- واني صاحبج حتى خايفة احد يعرف جاي .. ما طوله جوا .. صيحيله كليله ابو علي يريدك 

- حازم لا تفضحني 

- ولج افضحج بيش .. وشعدي وياج حتى ننفضح 

- جا شعدك جاي 

- هسه دصيحي اخوج 

- اجذب عليك وحدي بالبيت بس روح منا 

- هسه اليكول جاي وكاتل روحي على شوفتها حتى جاي اتطرد وشايفة روحه المنغولية .. دميلي ميلي وطبي جوا 

- ياهي هاي المنغولية ؟ 

- انت ام عيون العمص اكو غيرج 

- عيوني عمص .. انت شني ما تبطل شرايد مني شرايد 

- ميلي وطبي جوا .. خل افوت 

- يا دهر اسود تفوت شنو 

- اخيج وين خابري خلي يجيني 

-هسه غير يكلي شيريد 

عافني ومشى .. شال تلفزيون من صندوك سيارته واجا فات بيه للبيت ذباه بالكراج كتله : شنو هذا 

- واحد اطانياه ما يريده واني ما محتاجه كلت احسن ما اذبه بالزبالة اذبه ابيتج 

- وانت ياهو الكايلك بيتي زبالة واتذب زبالتك علي 

- يشتغل ترا 

- ما اريد منك شي .. اخذ زبالتك واتوكل 

- ليش ماكو كهرباء 

يحجي ويتلفت يشوف الجيران عدهم ضوا بس احنا لا 

- عاجبني اسويلي جوا بالشموع واترومس 

- وويامن تترومسين ؟

- ويا روحي انت ياهو ماتك ؟

- صخونة امي كون ..  ويا روحها الفطيرة 

غمني وطلع 

-وتلفزيونك هذا 

-سدي الباب الهوى عالي فوتي لا يضربج شرجي وانت من الله مضروبة شرجي شيصير بيج بعد 

-اكلك صدك جديات انت تتونس بالغلط ع الناس 

ترضى احد يغلط عليك هيج ؟ 

- سدي الباب 

- شسد التلفزيون شعدك مبقي يمي شكل لاخوي لو اجا 

- انت ليش معيشتنا شعور احنا عدنا شي وخايفين الناس تكتشفه وننفضح .. 

- انت شرايد مني ؟ فلوسك بالكوة جاي المهن و اكملهن الك 

- استعجلي بيهن على سالفتج هاي استلمهن بيوم القيامة .. شني تجمعين يومية ربع 

- جعليمن خو اخذ العدي و خليني اسدد الباقي على كيفي 

- دفوتي وسدي الباب يلا .. مو مرة مصيبة 

ركب سيارته ومشى 

واني سديت الباب اهز بيدي 

والله ردت اذبه بالزبالة واستحيفت جبته الج 

شايفني زبالة. ابن الاوادم

دخلت جوا وسديت الباب صبيتلي جاي وخطته .. شربت هستوني كاعد اكض الثوب اجت الكهرباء ! 

كمت حتى اشوفه سحب لو وطنية 

باوعت الضوا احمر سحب .. شنو تيه ابو المولده وشغل النا لو شنو !؟ 

رجعت كملت .. اجا حيدر كال : هاي سحب 

-اي 

_شني دفعتي 

-لا منيلي هو اني حايرة شلون المهن 

-جا ليش دفع .. التلفزيون هذا ياهو الجابه ؟ 

-حازم اليم بيت عمي 

-ومنين يعرف البيت 

-شني حيدر تحقيق جا مو هو السعى بشروة البيت وهو الشاهد مال البيعة ويا عمي 

-جا خاف هو الدفع السحب 

-ليش حتى يدفع السحب 

-شمدريني خاف شافج كاعدة بالظلمج واستخطاج 

ضليت اباوع بوجهه ما جاوبته 

رد حجه : يلا هسه معلينا المهم جتي الكهرباء 

خلي اشد التلفزيون 

كام شاله وركبه وضل يسوي بيه لحد ما شغلاه

دك تليفوني رقم غريب كال : ياهو هاذ الكاعد يخابر عليج بهالوكت 

-شمدريني رقم غريب رد انت 

اخذه ورد بس الثاني ما جاوب 

عقد حواجبه عود شاك .. عفته 

ثاني يوم الصبح خابراني اسعد ، ما رديت كتبلي رسالة ( مو ردتي شغل شفتلج خوش شغل وكلش مريح ) 

رجع خابر رديت 

حجه : جا ما تردين الا ع الشغل 

- شغليش اللكيته 

- اي بس ليش متجاوبين من اتصل قابل اني شرايد منج 

-خوية اني ما فارغة للسوالف دكيت واني كاعدة ع المكينة اخيط كلت من اكضي احاجيك شنيه تحقيق 

-هسه اسف ليش بسرعة تصيرين عصبية انت 

-جا تحاسبني ؟

-لا بس جاي اعتب واليحب يعتب

-هسه ما كلت الشغل شنهو ؟ 

-دكتورة مقابيل مستشفى القادسية 

-شمالها 

-محتاجة سكرتيرة من ٢ الظهر لحد العشرة بالليل وراتبها ٣٠٠ الف وعطلة العيادة بس الجمعة والثلاثاء 

-يعني بشارع الداخل 

-اي شمالج مقابيل مستشفى الصدر جاي اكلج 

-زين ب١٠ بالليل شيردني وحدي للشماعية 

-اذا تريدين اني اوديح بس خابريني 

-مشكور رحم الله والديك راح اگل لاخوي واجي اشوف الدكتورة يلا اودعناك . 

-من تجين كليلي خاطر ادليج عليها 

-جا كلي اسمها 

-لا من تجين اخذج الها 

-خوش .. ديلا مع السلامة 

سديته كبل ليجاوبني 

كعد حيدر خبرته بالشغل كال : اي احسنلج من المكينة وصوتها الچرخ راسي 

-وشيجيبني للشماعية بالليل وهذا شتا 

-شيرادلها متكليلي 

-مرلي انت عود ماطول ماعدك شي 

-اني بالكوفي خاف ما الحك عليج 

-احسب حسابك للعشرة تجيني شنيه صعبة 

-خو احسبيني بالوام شلون هم تنتظريني 

-صدك هو اني هم غلطانة احطك بحسباني 

كمت سبحت وبدلت ورحت للداخل 

نزلت ع الشارع مشيت للانشائية مال حازم فتت هو كاعد 

كال : خير 

-انت دافع سحب اوت البارحة ؟ 

-شو متخوصرة شني ضامتلج حديدة وراج 

نزلت اديه : هسه دحجي 

-وانا ياهو مالتي 

-جا ياهو الدفع السحب صاله يومين جاي ومحد يعرف الجوزه غيرك اني لو مشيت ما اعرفها انت المسويها 

-هسه جايه على هاي !؟ 

-لا اسعد خابر لاكيلي شغل عد دكتورة كدام هاي المستشفى 

-ما جزتي من اسعد 

نترت : وشجابرك ع المر غير الامر منه لازم اطي اقساط هذا الشهر واني فلوسك ما جامعتهن منين اجيب ابوووك 

-شو تصيحين 

-اي طكت روحي 

-منيش 

-منكم كلكم عساني طكيت وافتكيت 

-هسه ما افتهمت وكفتج هاي تتعاركين وياي تحجيلي شنهي موضوعج 

-لا هاي ولا هاي هو مو صاحبك خابره خلي يجي 

-ياهو اسعد 

-لا امي 

ابتسم : انت ليش هيج صايرة جنچ ذبانة تهامش 

-خلف الله عليك دخابره يلا 

-واني ياهو ماتي اخابره 

-من اروحله للبيت هسه يتلوك وتعاي اصعدي و يبقى يفر بيه بغداد بحجة ازدحام وبعده ما واصل وهو بس يريد يسولف .. خابره خلي يجي لهنا كله ناسية تليفونها 

طلع تليفونه خابر على اسعد كاله علي .. 

دقايق واجا .. مد ايده سلم على حازم وكالي : يلا 

-شني اليلا شسمها وين مكانها بالضبط 

-غير اوديج 

-وما عدي رجلين اوديج 

حازم : خوية نصيحة اليوم ذباناتها هاجات وعلي ما اضمنلك تشيل حديدة وتركعك دليها وخليها هي تمشي 

-مو خاف ما تندلها غير ادليها 

صبا : هي شنيه المنظمة السرية فدوة رحتلك خوية هو اسم طينياه وخليني امشي اسأل عن اسمها كدام المستشفى واوصللها 

-خو خل اخذج اني بعد ليش هيج

-اكلك حتى الشغل ما اريده خلي الك يطيك العافية . 

ردت اطلع صاح وراي واطاني اسم الدكتورة 

عفتهم ومشيت .. طكيتها مشي لكدام المستشفى ليغاد كمت اسأل دلوني .. وصلت يم العيادة لكيت اسعد اصلا واكف يضحكلي .. اتفق ويا الدكتورة وكالت : تنظفين العيادة وتغسليها يومية اول متجين الظهر وتجهزين المراجعين اني اكعد ب٤ ادخليهم واحد واحد ..

ما اريد يرم راسي يوجعني يوم خالي عده فاتحة يوم فلان عرس كلهن تنسيهن واذا انذكرن تاخذين حسابج وتروحين وبعد انت وشطارتج تكدرين تاخذين من المريض اكثر حتى تخلي ليكدام ويطب اول . 

-ان شاءالله 

تشكر منها اسعد ووصاها عليه 

عاد اني هم شكرته الزلمة سعالي برزقي .. عاد كالي : محتاجة شي بعد 

كتله : لا مشكور يطيك العافية 

نظفت العيادة وكعدت .. اطتني كارتات عليها ارقام كالت كل مريض تنطي رقم يدخل بيه والدخول بالتسلسل ع الرقم 

فصدك سويت هيج وكعدت كل اليجي ينطيني ٢٥ انطي رقم واسجل الرقم بالسجل واكوله : اتفضل 

لحدما كملت ب٩ ونص ورادت تطلع الدكتورة 

كالت : نظفي غرفتي والزبالة لتبقيها ابد لان بيها قاذورات ودم ملازم تبقى 

-تأمرين دكتورة 

- وشغلة لخ .. تكدرين تلبسين جبة او شي عريض بدل العباية !؟ 

- اي عدي جبة عريضة 

- ياريت تلبسها باجر 

- تدللين 

- مبدأيا انت محبوبة وبيج قبول بس معرفت متزوجة لو  شنو وضعج 

- لا مطلقة 

- عندج اطفال 

- لا عندي اطفال ولا زوج ولا داده ولا ماما ولا بابا .. 

- هههههه وان جان امر مؤسف بس كلش ايجابي بالنسبة اليه لان تعرفين اللي عدها اهل والتزامات تكون اعذارها هواية .. فلهذا مصائب قوم عند قوما فوائد 

- يييي دكتوره اذا على مصايبي راح تستفادين هواي لان احتمال ايام مو بس اطول بالعيادة ولا يمكن ابات بيها 

- هههههه لا سامح الله ... شتحتاجين كولي واعتبري المكان مكانج واهلا وسهلا بيج . 

كمت نظفت غرفتها من البقايا اللي تستعملهم ويا المرضى لفيتهم وكملت العيادة ونزلت .. لكيت اسعد منتظر بس ما باوعني داير ليغاد 

لفيت عباتي على وجهي وعبرت وكفت كيا ورجعت 

فتحت التليفون .. الرقم الغريب نفسه هم داك 

كتبتله ( منو ؟ ) 

ما جاني جواب .. لفيت راسي ونمت 

لثاني يوم كعدت الصبح كملت خياط وكمت سويتلي غده .. 

لان البارحة حيل جعت لحد ما اجيت وهاي اذا اضل يومية ادز من الشارع الراتب يخلص بس ع الاكل .. اخذه بحافظات وياي احسن 

سويت تمن وتبسي وزلاطة 

بس التبسي ما حمسته بدهن .. حمست لية  لحد ما صارت ذابت حمست المعجون بيها وذبيت كل الخضروات صارت ريحتها تجيب التايه ..

كعد حيدر راد اصبله 

صبيتله وكتله : بعد محتاج شي اني راح اروح 

- لا ما محتاج الله وياج 

لبست الجبة ومشيت من يم حيدر شافني ما حجه توقعته راح يكلي ليش نازعة العباية يحاسبني بس ما حجه .. هم زين 

طلعت للداخل .. جبت الطريق كله افكر من وصل شارع بيت عمي كتله نازل .. مزلت وبالي سارح طبيت فرع عمي .. لحد ما صفنت .. اني وين جاية والمن نزلت بعد 

انداريت .. ورجعت للشارع العام .. 

لكيت حازم وابنه كاعد ينزلون الكبنك يقفلون .. 

عفته وراي ومشيت صاح : السلام لـ الله لو حتى الله ما تعرفينه 

انداريت : وياي 

- شني هاي شلابسة شمصخمة خير بويه شو بعدج ما اشتغلتي تعريتي 

- مني هاي التعرت ؟ 

- جا عباتج وين 

- والما تلبس عباية بعيونك عريانة ! 

- جا التذب عبايتها وتلبس لزك شيسمونها 

- يا لزك هاي شعرضها لزكتها بعد 

وبعدين تعال جاي انت ياهو ماتك راح تكتلني ياهووو ماتك 

- دصعدي اصعدي خلي اوصلج 

- الحمدلله الله حط عدي رجلين ما احتاج احد يمشيني 

- بالعباس صايرة شخاطة شحده اليطخها توج بوجه النار 

عفته وانداريت صاح : تعاي تعاي اصعدي عيني فرحانة بروحها تتكلب نازعة العباية 

- يا يمة راح اكتل روحي والعباس .. 

خب انت شعليييك 

- امشي 

- ما اريد 

- جا اطيني الخمسمية هسه 

- ما ناسيتها بس استلم من الدكتوره اكملهن واطيهن هسه 

- دمشي اكلاوجيه امشي صعدي تكمل هي ام الوصخ .. امشي 

- يا دهر مني هاي ام الوصخ 

خب انت تلحكني تلحك نظافتي نظافة بيتك 

عساني من جربتك ونمت ابيتك وين ما تكعد الزوالي تلزك من الخيس والچعچ تكول كاعد بافريقيا وحسرة عليكم الماي مو ببلد بيه نهرين هسه دخليني ساكتة ليش تحچيني واطلع البگلبي . 

- لا اني اشهد ساكته .. اصعدي 

رجعت امشي .. صعد سيارته وكام يطوطلي بنص الشارع 

نزلت وركبت ورا .. دايره عنه .. حجه : حاصرة روحها اليوم ما تتحاجه يابه 

- حاصرة روحي انت ياهو ماتك ؟ 

ما يباوعلي باوع بالطريق نزلني كبال باب العيادة بالضبط كتله : مشكور 

نزلت وصعدت للعيادة غسلت الكاع نظفت الميز حطيت فرش جديد ع السديات ..شغلت تدفئة بغرفة الدكتورة جعت اتذكرت الاكل مالي .. جان بيدي وين حطيته !؟ 

دورته ما هو عفته 

لحد ما كاموا المراجعين يجون .. ب٤ اجت الدكتورة كالتلي : اكو بالترك ذاك طباخ صغير اذا تكدرين سولنا جاي وصبيلي كوبي باللوكر مالي 

ااااالله حبيت الدكتورة من طلعت تحب الجاي مثلي 

كمت سويت وصبيتلها .. 

دك التليفون .. حازم ما جاوبته 

رد كتبلي ( عاشت ايدج اليوم جان غدانا اني والجهال على حسابج ) 

خابرته .. رد : واكلتوا اكلي 

- اي بالعباس وفد طيب خرب عرضج مو طبخ ضيم وعلي 

- ما دام الجهال اكلوا الف عافية 

- واني سم وزهر مر مو 

- لا اسم الله ليش 

- جا ذكرتي الجهال وغلستي عليّ 

-عمي بالعافية كلكم بس خل اروح اكمل شغلي . 

سديته منه ورجعت امشي المراجعين مريض مريض حسب الرقم .. ما اخذ من المريض حتى ادخله كبل الاخر ولا احجز للي يخابر لإن شنو ذنب الكاعد ومنتظر وتعبان والله غيره حاجز وهو بالبيت لو غيره ينطي فلوس ويطب قبل الكاعد منتظر . 

شوية ودخل علي ابن حازم حطلي ماعون كباب وخبز : شنو هاي 

- بابا دزلجياه غدا ويكول اعذرينا اكلنا 

- لا يا يا حبيبي بالعافية اخذه كله ماكو داعي 

- لا عادي هو راد يشتريلنا كباب بس اتغدينا باكلج بس والله كلش طيب 

- الف عافية يا حبيبي تريد اسويلكم بعد 

ضحك : اي 

- ههههه صدك ليش ماما ما رجعت ؟ 

- لا بعدها وحتى لو رجعت ما تطبخ النا هيج خطية ترجع تعبانة . 

- لعد شتاكلون 

- تسولنا طماطة بتيتة .. جبن وجاي 

- وهسه باقين بدونهن حتى 

- لا بابا كاعد يجيب النا كباب دجاج هيج مرات نروح بيت عمي ناكل يم بيبي .

- ها .. يلا بالعافية ابوك ينتظرك 

-لا راح كال تعال وراي 

- دروح حبيبي لتتاخر ويحجي عليك 

-مع السلامة 

ضحكت : بيباي 

مشى واني اباوع وراي 

رجع دك الرقم الغريب قطع صفنتي رديت : الو 

-الو ها صبا شلونج 

-ومنو انت 

-اني حسن شبيج 

- وشعدك مخابرني

-ما يصير نسأل عنج ؟ 

- اعرفك تعرفني تسأل عني ؟ 

- ليش هيج تحاجيني انا بس ردت اسمع اخبارج 

-والله عاد ما ضل احد ما كامت تهمه اخباري من يوم كعدت بهالمهجوم ولليوم كبل كنت مشمورة بصريفة اريدلي شريف يسأل عني ماكو 

- صخام بوجهي اني اسال عليج صدك جذب 

-من الله يصخم وجهك ان شاءالله دنيا واخرة 

سديته بوجهه .. رجع خابر ما كمت ارد بس سجلت على اسمه ( اللزكة ) خاف اغلط وحسبالي رقم غريب وارد عليه .

رجع خابرني من غير رقم رديت لكيته هو 

سديته وكتبت عليه لزكة ٢ 

كضيت شغلي ومشيت لوفاء من الباب كتلها : حسن شعده يخابرني 

-شيريد منج 

-يسال عن اخباري يكلي 

-لا عشتو شكو 

- شمدري كليله كافي صارله تلث تيام يرن بس حيدر يجاوب يغلس ما يرد ومن رديت حجه 

-اني ارزله خلي يولي بس انت لا تردين علي بعد 

- شرد انت سجلته حتى اعرف الرقم وما اريد عليه بالغلط . 

شفتها عقدت وجهه سلمت وطلعت 

نزلت كاعد افتح الباب اسعد بالاستقبال كاعد صاح علي 

رجعتله : ها شني شلون شغلج 

-الحمدلله زين والدكتورة خوش مرة يطيك العافية 

-خادم اني ادللي .. نازعة العباية تخبل عليج الجبة مزغرتج 

ما جاوبته بس ابتسمت جفيان شر حجه: رايحة للبيت 

-اي والله تأخرت 

-جا صبري اكوم اجيب التليفون واجيج 

- لا يطيك العافية اني اروح 

كام للغرفة اني لزمت الباب وطلعت كبل للشارع ركبت ومشيت للبيت نزعت الجبة وكعدت باوعت على ميز التلفيزيو ماشة زركة 

شلتها داورتها : منين هاي شو هو اني بطرك روحي منين اجتني ماشة ملونة ..

مشيت للمطبخ لكيت مواعين وطبخ 

والطباخ وصخ .. استفقدت الثلاجة .. منقصة 

من اجا حيد نكر وسواني متوهمة واني الطابخة وناسية 

سكتت 

ثاني يوم تكرر الموضوع 

ما ارتاحيت للسالفة 

التحق حيدر كمت ما اشوف هالامور .. 

داومت الدكتورة انطتني راتبي واثنت عليه 

شكرتها وطلعت حيل فرحانة .. سويت ثواب لابو عبد الله دجاج وتمن وبرياني ووزعتهن اماعين ع الناس عن اول راتب الله يرزقني .. 

جانت ايام ابو عبدلله خير عليه اول يوم بمحرم كعدت ابيت واول يرم بصفر اشتغلت وصار عدي راتب .. حيل فرحت ووزعت بثوابه من كلب صافي وراضي

وعزلتلي دجاجة طبختها ثاني يوم مركة احمر وتمن اصر وحشو برياني وكليت الدجاج وخليته فوك الحشو واخذت المرك وياي .. واخذت فلوس حازم كملتهن ومشيت للداخل 

الطريق كله جبته افكر بالامور الغريبة الابيتي 

معقولة حيدر جاي بجيب نسوان للبيت لو اكو غير شي ؟ 

وصلت غاد انعثل بالجدورة وشايلتهن على كلبي 

دخلت هو يريد يعزل كال يا الله حطيت الجدورة واني افكر بالسالفة البالي حجيت : اكلك كاعد اشوف امور غريبة ابيتي 

باوع عليه ع الجدورة : وعليكم السلام ورحمة الله وبركاته

حجاها وهو يروح للجدوره : شني هاي 

-هسه عوف هاي صدك والله مرة الكى ماشة لو الكا مواعين موصخة والفراش مخربط عود شنو هاي شتكول 

-جني 

حجاها ويفتح بالجدورة 

-كاعد احجي صدك ليش كلها عدك استهزاء وكهكهة 

ولو اني صوجي انت ياهو ماتك واحجيلك اسراري 

امي هم شاخطة 

- جا اذا ياهو ماتي المن جاية ومتعنية تسولفين 

-ما متعنية اسولف اتعنيت اجيبلك ثواب واطيك الفلوس 

هاك رحم الله والديك 

-شنو هذا الثواب وشني ذني الفلوس 

-الاكل ثوبت للامام وعزلتلك انت والجهال خطية وذني فلوسك كملتهن

- واني الفلوس مو اطيتجياهن ثواب شو ما تستحين 

-ثوابك واصل 

-جا شيلي جدورتج ثوابج واصل 

-مو الك للجهال 

-واني هم مو الج 

تبسمت : جا المن 

-مالج غرض هيج لوحدة ابالي 

-دخذهن اخذهن 

-سد الباب مصيول وااخذ علي وامشي 

انداريت وراي : مصيول جديد هاذ ؟ شو ما شايفته كبل 

- يشتغل وياي .. 

-ها الله يزيد ويبارك ، اي اروحن اني بعد هم يلا افتح العيادة واغسلها

-لا اوصلك ولا توصلني ترا بعدنا لا متصالحين ولا متوالمين 

-واحنا يمتى توالمنا واتصالحنا خاطر نتوالم هسه ؟ امشي ترا جاي ادور بيج ثوابات 

-هاه 

-وعلي مرة مالج احد اكول تمشي بهالبرد خطية دخل اوصلنها لوجه الله تعالى لا عبالج نسيت سالفتج ذيج 

-يا وعساك مانسيت، جا ما طول هيج اني هم ادور بيك ثوابات 

- امشي جنج بريعصي ويمشي بجبتج هاي

-  خب كلاب اي والله بريعصي .. غير جني كمر بس انت تغار مني 

- اي وعلي اغار بس مو منج 

- اي والله كلها كالتلي حلوة تخبل علي بس انت التعيب 

- ومنو ذول الكلها 

- اولهم البالك 

جان كاعد يلم بالدخل ويحجي وياي بلا ميباوع من كتله هيج سد الدخل : منو البالي ؟

- مع السلامة 

- لا لا تعاي جاي 

- تعرفه تعرفه 

- لا شو احجي 

- نفسه العاركتني بسببه 

حجيتها و طلعت صاح : علي باب اقفل المحل وشمر المفاتيح 

احا وراي : تعاي لا تشردين شكالج 

- يا اشرد ليش خايفة 

-شكالج

-تأخرت 

-احاجيج 

-عود جيبلي الجدورة العصر

-صبا لا تخليني اعصابي تطلع بهالظهرية جاي احاجيج ردي

-تحاجيني بصفتك شنو ؟ مجاي تلاحظ انت الوحيد اللي يحاسبني واللي يحسب عليه !؟ اخوي ما جاي يهتم بگدك  انت مهتم بصفتك شنو غير اعرف !؟ 

-شكالج ؟ 

- لما انت تجاوب راح اجاوب ! 

-زين 

خلا ومشى لسيارته 

عفته وكملت مشي ما لحكني 

وصلت غاد بسرعة غسلت العيادة وبلست شغلي ..

العصر علي جابلي الجدورة خذيتهن وياي من رجعت . 

يومين رجع حيدر 

كال نزلنا ٥ ايام بيناتنا اتفقنا علمود زيارة الاربعين اليزور يلتحق وغيره ينزل حتى يمشي .. 

كتله هم زين .. 

ثاني يوم الظهر جنت جاي اطبخ اريد اطلع 

حيدر لح عليه .. روحي .. يلا اتأخرتي 

كتله الساعة وحدة شبيك اكمل واروح على كيفي شعدي 

اندكت الباب .. طلعله حيدر بقى وياه بالباب 

اخر شي صاح .. طبي بالحمام بسرعة 

دخلت للحمام .. والزلمة طب للبيت شافه واجا للمطبخ 

طلع للكراج 

طلعت ووكفت ورا الشباك اريد اسمع 

يكله : خمسة انطيك بيه 

وحيدر يكله : لا سبعة اني ماخذه بخمسة الله شاهد 

- لا سبعة هواي 

- بكيفك اذا ما تريده اني عدي اثنين مخابريني .. اشوفهم ونتفاهم 

- لا اني كتلك انسابتي هنا ورايد اكعد قريب منهم علمود المرة 

- سبعة الله شاهد وهاي الك اني ناوي بعشرة ابيعه 

- لا لا عليكفك وياي جا انا هم اخيك وعلي بس ٦ ملايين عدي وحاسب حسابي بخمسة 

- لا اعذرني قليل ما ترهم والله 

- ادبره لعد واخابرك بس لا تبيع انا شراي البيت بس خلي ادبر شلون واجي اكلك 

- انتظرك بس يومين وهاي الك لان مستعجل لازم خمسة ايام اني شايل 

- ان شاءالله 

طلع الولد اني اتخبلت .. 

دخل حيدر كتله : شنو هذا حيدر 

- هيج صاحبي رايد يشتري بهالمنطقة 

- يشتري بالمنطقة لو يشتري البيت 

- واذا اشترى البيت اني مو الي بيه مليون 

- يا مليون الالك بيه حيدر المليون مالي وانت اخذته شني جاي اتجذب وتصدك جذبتك 

بس حجيتها سطرني راشدي صفر اذاني : انت مالج علاقة بهالامور شكد الج بهذا البيت مليونين ابيعه وانطيجياهن ولا اتشوفيني وجهج 

- شنو تبيعه شنو تنطينياهن منو كايلك اريد ابيعه اني 

- اني اريد ابيعه انت ياهو مالتج 

- حيدر البيت بيتي 

- اي اطيج فلوسج 

- تبيعه بسبعة وتنطيني مليونين شنو صاير لوتي اني ما عرلت الكالي بيت .. ما ابيعه 

- واني رايد اتزوج واستقر وهذا البيت غرفة وحدة رايد ابيعه وازيد عليه حتى نشتري اكبر 

- حتى يصير الك واصبح اني كاعدة عندك وهم ترجع مثل جعفر تطردني وارد لصريفتي ويا عمي .. لا عيني الفلوس العدك اشتري بيهن بيت بعد مناشبني بهذا شنو 

- ما يكفن العدي 

- واني ياهو ماتي مايكفن احتار بيك انت زلمة تكدر تدبر امرك 

- واني هم اغم وكاعد انقشج انت شنو كجة مرحبا واناقشج ابيع واشتري اليعجبني وان ما عجبج بيا حايط صلب طخي راسج يطبج مرض 

- والله اكلب الدنيا 

- دفكي حلكج وشوفي شلون اشكه تكلب الدنيا هي 

- نشوف 

- لا تهددين صباااا 

كمت اخذت غراضي وطلعت للعيادة بس روحي تفور 

ما عرفت شلون اشتغل كل تركيز وانتباه ما عندي 

كضيت شغلي مريت على عمي .. 

كاعد بالدكان حجيتله كال : ما بيها شي لو اشتريتولكم بيت اكبر 

- بيت اكبر شنو اشتريت وتعبت وكاعد اشتغل وادفع اقصاد تالي يبيعه بسبعه وينطيني منه بس مليونين والباقي اله ويزيد عليه ويشريله بيت علمود يصير اله واني اصفى خطار ..  والله يا الله ما اريد 

- انت ليش ما اتحبين لخير الغيرج 

- عمي احب الخير الغيري شنو بيتي بيتي اني اشتريته شنو غيري شنو بطيك جا اني جايتك تعيني لو تصير عليه 

- اي غير حقه يريد يتزوج 

- واني شكو منو احتار بيه من ذبوني عندك حتى احتار بيه وين يتزوج ؟ 

- اسكتي وكصري الشر صبا ولا تسويلج سالفة ما دامه نجر وكدر يجيب بيه سعر زين خلي يبيع 

- عمي بيتي .. هي شنيه هم نزل وهم يدبج بالسطح بكيفه هو 

- جا غير اخوج 

- واخوي وينه عني من سنة اني عدك 

- راح تضلين اتزنين وتردحين بروسهم جيف ذبوج سنة 

- جا من اشتريت وكعدت واستقريت تطكروني ما يعرفوني بحاااالي 

- اخوتج عمي اخوتج جا هم غربة خطية هم رايد يتزوج وما يعرفج يكعدج وياه 

- يا والله مشكور اترجى منه يكعدني بعد ما جان هو الكاعد وياي 

- والله انت غاوية مشاكل وما تستحين .. مالي كل غرض بيج ولي ولو اجاني اكله عفية ابني عبن انت باطلة 

- اني باطلة لو الماخذ مني بيتي كافي والله ما جاي اشوف الراحة واركض والم الفلس ع الفلس حتى ارفي واعيش وانتم تاخذون مني اي مو حتى الله ما يرضاها 

كاتلين ارواحكم تريدون تروحون مشي للحسين وانتم الحسين لا تعرفونه ولا يعرفكم الله يطلع حوبتي بيكم ناخية الحسين الشهيد 

كام يغلط عليه : امشي دايحة طايحة الحظ نزعتي العباية واستهتري بعد محد كضج وكسر ركبتج 

- الحمدلله لا نزعت ستري ولا عرضت روحي لواحد وجاي اشتغل بحيلي وتعبي ما رخصت نفسي لاحد ولا رضيت ابقى مذلولة عدك .. 

- اكلي خ* طايحة الحظ اكوم ادرس راسج بالقن** 

- هو اني اجيتك عون طلعتلي فرعون 

- ياهو فرعون ولج تعااااي 

كاملي من الدكان عمتي خلتني وراها 

ويوسف واكف بالكراج ركض كضاه وكالي : صبا ابوي مريض ما بيه حيل مشاكل يا خوية 

- واني شكايلتله افزع وياي لو اطيني بيتك كل الردته يحجيله حجاية حق ويا حويدر لو هيج صارت حجاية الحق ثكيلة وما ترضيكم 

- انعل والديج والله ولك هدني اكضنها هددد 

- لا تهد ولا اطب بيتك ومشكور وجزاك الله الف خير يا اخو ابوي توكف كدام الله واعاتبنك من تصف ويا اخوتي علي والله لا يضيعلي حوبة 

كامت هدى تصيح : عزا العزاج كون ادورين بعمي حوبة ام الزلم نكرتي من لمج من الشارع وكرمج ابيته 

-لا ما انسى من حطني بغرفة ما يحط بيها الدجاج واني اشرفج واشرف عشيرتج يا طايحة الحظ بذال ما مركزة بيه وبحياتي حطي عيونج برجلج وراقبي 

كامت عمتي ادفع بيه 

وعمي يصيح ويوسف يصيح .. 

عفتهم وطلع فايرة روحي بالزايد 

المن اروح ؟ وعدمن اشتكي ؟ مالي غيرك ربي وحيدة بنص ديرة كلها جلاب  .. ساعدني .. ها يالحسين بجاه هاي مشايتك وهاي زوارك التطلع حوبتي بيهم كلهم دخيلتك اني . 

رجعت لبيتي لكيته هم نفس الحالة غراض .. ومواعين وسخة .. وما ادري شنو الفلم .. وحيدر ما اجا 

كمت ادور والفوف وافكر وما ادري بروحي 

جلفت البيت كله  الحمام الكاونتر جريت وغسلت الثلاجة طلعت ونظفت  الزولية مال الهول شلت ومسحت ورجعت نظفت البيت كله خليته مثل حرحارة ايدي .. 

وسديت الباب وشغلت الصوبة خاطر تدفى الغرفة صارت ثلج وسويت قوري جاي وكعدت يم الصوبة 

دايخة وراسي يوجعني وحيل متأذية 

وافكر وما الكه حل ما اكدر اواجهه ولا اني كدهم واوكف بوجهم شتصرف .. لو شكول ما راح يسمعوني وراح يجيرون علي بالزايد 

خل اشوفن حازم بس هو يعرفلهم ويعرف لزواغيرهم وشتصرف وياهم .. جريت التليفون وخابرته .. رن .. رن 

ما رد .. رجعت خابرته مرة اللخ 

رد : ها صبا شكو 

- دكعد بس نايم اكعد حير وياي 

- يمعودة باعي الساعة بيش رحمة لاهلج 

باوعتها الساعة ٤ ونص يا واني اكول تعبت ودخت اثاري طولت بالسهر : هسه شني احجي لو نايم ؟

- لا حول ولا قوة الا بالله 

- لا تكوم تزفر بوجهي روح الله لا يعوزني روح 

- صاير شي 

-هو شيصير وياي غير المصايب بس انت بحالي كاعد تحجي بصوت ناصي احتمال مرجع مرتك وخاتل و تخاف تحجي لا تلزمك كدرتك بس علي ليش تلبسين ليش تحجين ليش تصعدين بس هاي 

-بصفتي شنو احتار بيج بالله ؟ 

-اسال روحك اني الاكلك بصفتك شنو 

- هاه ، امري لله احجي عمي طلعنا وكعدنا والنومة طارت والجكارة هاي اااااا اها هم شغلنا احجي 

- حيدر 

-شبيه زر***ان 

-جايبلا واحد يريد يبيع البيت ب٧ وعود ينطيني منهن مليونين ويشتريله بيت ثاني وعوووود يكعدني وياه 

- حلو 

- وشنو الحلو بالله فهمني 

- كملي 

- شكمل هاي السالفة كلها حازم والله تعبت شكد ما اكول راح ارتاح يطيح حظي فرحت بالبيت طيحوا حظي فرحت بالشغل طيحوا حظي يعني والله كاعد اتعب تعب محد ديحس بيه واستلم ٣٠٠ نصهن انطيتهن لاسعد يبقلي ١٥٠ بين روحة وجية ومنا ومنا وعلي ما يضلي فلس منهن وتالي حتى البيت الجاي ادفع بيه نص فلوسي ياخذونه مني 

مو والله تعبت محد ديحس محد 

بجيت .. حجه : اي هسه انعلج ابوهم تبجين ليش 

- وشتكدر تسويلي اني حايرة 

- دلمي دموعج ام ادميعة تكول جاهل كاعد تبجي نغيوة 

- اكلك لا تعيب شنيييه هسه اني ناقصتك 

- جا لا تبجين اطلعين جنج اسماعيل ياسين من تبجين 

-ايع حازم شني هسه ابجي من ضيمي لو من هالتشبيه هذا شني اسماعيل ياسين 

-جا رحمة لو شايفة روحج احلى منك 

-حازم اني مخابرتك تزيد ضيمي لو تساعدني 

- دنامي هسه مسهرة عيونج نهارج تركضين وليلح تبجين ياهو يفيدج لو تمرضتي ؟ 

- ومسعدة اني غير من ضيمي شلون لو باعه 

-دنامي والصباح رباح 

ديحجي واجاه صوت : شني جديدة هاي مخابر الليل والتليفونات 

-روحي بعدين نحجي 

- هاي مرتك 

-اي .. بعدين 

-يعني رجعتو واني اكول ما فتحت خط اول مرة اثاري رجعت حياتك تعدلت اي مبروك اني اسفة ..

-اصبري 

كام من مكانه كتله : لا خل اروح بعد هم اتأخرت واريد انام واني مخابرتي غلط بس يمكن صدك كمت ما استحي ما ادري احتاريت 

- سهلة ان شاءالله نفكرلها بحل 

- روح لا هم تتعاركون انت ومرتك 

- رجعت بس ما اتصالحنا ترا .. 

- لا عيب 

-العيب من تروحين لذاك السكط وتشوفينه روحج شوفني ترى لابسة جبة وصايرة حلوة امدحني غازلني 

- حازم 

- ها 

- اغلط رزل صيح اني شما ادور والتفت ما الكا غيرك يحلي مشاكلي ويساعدني لتعوفني الله يخليك والله تعبت 

-انعلج ابوهم والله لا تشيلين هم اكضيها الج 

جريت المخدة وتمددت ولميت رجليه : شلون 

-نامي وخلي الشلون عليه اني اشيل همها 

- احنا مو متزاعلين 

- نكضي المشكلة وارد للزعل لا تخافين علي شروكي ما ينسى سالفته 

- روح نام بعد عود الصبح نحجي اني هم كطعت نومتك 

- مو مهم نامي انت 

- لا روح لا هم تصيرلك مشكلة ويا امل تصبح على خير 

- صبا

-ها 

- نامي ولا تفكرين لا بيه ولا بمشاكلج 

- مراح تنام 

احجيها واني كمت اغفي 

احس دفيت باهتمامه وسكنت ونعست 

حجه : من اسمعج نمتي وعفتي التفكير بهمومج راح ارتاح وانام 

اخذت نفس عميق غمضت عيني 

بين غمضت عيني والنوم جان ثواني 

فزيت ورا شوية رجلي حمت من الصوبة 

لكيته ساد الخط وكاتبلي ( انت مشكلة .. مشكلة جبيرة ابتليت بيها ) هاي الرسالة لو سامعتها من اي انسان بالدنيا جان حسيت بمعاير وانهظمت بس ما ادري ليش قريت الكلمات كأنما غزل واتبسمت 

طفيت الصوبة ونمت .. 

وبقيت نايمة ل١٢ الظهر يلا كعدت صليت وسويت اكل الي اخذه وياي .. لبست وطلعت واشوف على بابنا مكتوب بصبغ احمر ( مطلوب ) 

وع الحايط هم مكتوب ( مطلوب ) 

دخت شنو هاي كمت امشي اريد اوصل للشارع حتى اركب للداخل .. خابرني حيدر كال : ولج مخابرة منو علي المكتب خابرني يهددني لو بعت البيت يصكوني ولج انت المن رايحة شاكيتني ولج منو ذوله الهدوووني صباااااا ..... يتبع 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا