رواية عاجر الفصل التاسع 9 بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل التاسع 9 بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل التاسع 9 بقلــم الكاتبـــة زينب ماجد  (حصريه في مدونة قصر الروايات)

 #الكاتبة_زينب_ماجد

#عاجر_الحلقة_٩

- يا مكتب يا المهددينك شني السالفة احجيلي

- احجيلج مو اليوم محد يخلصج من ايدي وعلي .. اليوم انعل اهلي كلهم لو خليتج اني تروحين تشتكين علي بالمكاتب

- خب يا مكاتب انت شبيك غير افتهم شصايرلك

- طمطمي والله وعلي لا ما احط عمامي وجعفر واخليهم يكسرون رجليج واديج فلا اطلع اسمي حيدر ساقطة ام المكاتب

سده بوجهي 

وخرت التليفون من اذاني مصوفرة 

يا مكاتب يا تهديد شصاير بالدنيا واني ما ادري ؟

خابرت على حازم .. رن .. رن 

لما راد يخلص الاتصال رد : ها الو

- ها حازم اكلك هذا حيدر خابراني

- اي

- يكلي مهددينه ومكاتب ومدري شنو

- ما جاي اسمعج صبا اني بالطريق

- بالطريق وين

- شنو ما اسمعج

- اكلك راح تجي للمحل اني طالعة للداخل

- شنووووه

- خب للداااااخل للدااااخل راح تجي

- ما جاي اسمعج نص ساعة واروح للمحل .. مع السلامة

- خب شنية 

سديته هذا الثاني الانطرش 

ديلا يحظي هسه شلي بهاي .. اني وين رايحة للمكاتب 

وين واصلة وشاكية ..

خاف حازم كايللهم ؟ 

ما ادري اسألنه واشوف 

طلعت للشارع وصلت ركبت كية وطلعت للداخل .

نزلت كدام المحل ماله 

دخلت لكيت واحد ضعيف و طويل يسمونه مصيول يطلع عمره ١٦ .. ١٧ سنة هيج وجهه متروس حب شباب ، وكفت انتجيت ع المكتب العالي مال حازم يوصل فوك بطني حديد .. حطيت ايدي وانتجيت : جا حازم وينه ؟

- ماهو .. كولي

- شوكت يجي

- شتريدين منه

- رايدته بشغلة

- شني هي الشغلة

- هسه انت ياهو ماتك .. تعرف شوكت يجي 

ولو هو كال نص ساعة واجي اني هم راسي مضروب هو غير كلالي .. بعد عليمن اسال

بس شني هسه انتظره .. خاف يطول !؟ 

- يلا هسه هي الدكتوره هيج هيج ب٤ يلا تجي واذا اتاخرت 

خلي اشوف مصيبتي بالاول

ضليت انتظره .. تعبت من الوكفة 

صحت : ما عدك كرسي

- بس هذا مال حازم

- شيعودلك حازم ؟

- ابن عمي .. ورجل اختي

- ها .. الله يثخن لبنكم 

خل اروحن عود شوف اجي بالليل من اخلن 

كاعد اهم اعدل بحجابي خاطر اطلع .. شفت سيارة حازم صفها ليغاد .. اجا .. تعدلت وضليت واكفة ما طوله اجا

تنهدت .. طب : ها سلامات الوجه بيه سبع لطامات

- يمعود طاحن رجليه تأخرت ردت امشي شنية

- جا بيدي غير جنت بالشغل كل يوم تصير بالوحدة ازاغل واحي ما يحجون بس اليوم للعشرة يلا داومت زحمة مو مال اطلع كبل وكت

- جا ليش مداوم متأخر

- مصيول .. لم الغراض اليمك ذني وانقلهن للسيارة يا يابه استعجل

وكف كدام مكتبه ، حجيت بصوت ناصي : شني متعارك ويا امل

- واحنا تصالحنا خاطر نتعارك .. مستمرين بالعركة بس جان عندي شغل 

معاملة بكاتب عدل وتأخرت

- محتارلي بكاتب عدل واني بنص الضيم جا مو كلفتك

- وانت ما عدج غير طلابة حازم رايدتني تفاك وراح كل اليضدج تكليلي ذاك وكون ازرگة بطلقة

- جا حجيك امس وين راح واني واني ونامي ووعد عيناج

- هسه غير اعرف شصاير وجاية تلطمين وتردحين على افادي ؟

-غير ما تدري .. يام حسين جنت بوحدة طحتي باثنين

- ليش

- جماعة مخابرين مهددين هنوب الباب لو تشوفه ضيم مكتوب عليه مطلوب

- ااااخ ياهو الكاتب هيج

- شمدريني وذاك متسودن مهددين

- ياهو

- هي شني غير حويدر من دهر الدهرة كون

- اي وياهو المهدده

- واني شمدريني

- جا اذا ما تدرين وما تعرفين عليمن جاي اتلطمين

- غير خابراني يكلي اليوم اخابر عمامي وجعفر ونحطج ونكتلج

- وليش يكتلج

- عسباله اني الرايحة مشتكية

- وانت رايحة

- لا والعباس شمالك حازم مو الفجر اني ابجي ومحتارة يمتى مشيت

- جا اذا لا رايحة ولا ماشية ولا شاكية خايفة منين

- غير تاهميني اني الرايحة

- والمخابره كايله اختك مخابرتنا

- شمدرينا حيدر تاهمني على اساس المكتب مخابره اني شاكيتلهم ومهددينه ما يبيع البيت

- من كل عقلج مكتب السيد يخابره ويكله مرة اجتنا وشكتلنا لو يورطون مرة بشغلهم شمالج انت عقلج عقل ذبانة

- واني اشم ايدي شكايليله غير هو يكول

- اخيج هذا حضينة تلاكينه من مخابرينه خارطة عده الوضعية ومن الخوف راجع عليج يهدد براسج ذني سوالف المخانـ /يث الما يكدر اعلى الزلم يسطر فوك روس النسوان

-انت تعرفهم عليك العباس

-عمي ادخيل العباس لا تورطينا انا ياهو مالتي زلمة راعي عايلة لا اعرفهم ولا يعرفوني

-وهسه شلون كلي

-دخيل العباس شكثر تلطمين ولج بويه مو انحلت بعد محتارة ليييش

- جا ما تشوفه ذب حركته بيه ومتحلفلي هو وعمامي

- علييييمن انت لا رايحة ولا شاكية حطي القران وطبي وحلفي وبري نفسج بعد تتراجفين وترعشين ووجهج جنه وجه فاره راكض وراها عتوي شمالح

- حازم شني فارة شني عتوي دخيل بختك جنت تركض وياها و تشبهني بيها

تبسم : اي مو شكيتيني شك بت الاوادم ما طولها سالفتج انحلت والمكتب مخابره ومانعينه هاهيه ارتاحي وروحي اشتغلي وصفي بالج واركدي بهالخوف والتوتر راح تتمرضين وعلي تتمرضين ريحي بالج نعلت ابوهم يهدد شنو

-هاه

-ووجعاه

-يا دهر الوجعاه علي ؟

ما رد جر المفاتيح من الدخل وكام يقفل بيه وكتله : هو هم صوجي متعنيتلك وجاية ما فالح غير تقلد وتعيب علي

-جا من انا بلا نفع ولا دفع مخابرتني ويا طكة البريج شني شكالولج علي ديج

- اكلك حكة صدك امس من خابرتك شو ما صارف من رصيدي هواي

- عاد مو هم احتار برصيدج انصرف لو لا كافي عليج طراكيعج لهنا وكافي ايناف بوس ايدج ايييييناف

- ايناف شنو ؟

- ايناف ما تعرفيلها

- اي غير اعرف شنية لو هم تعيب عليّ

مصيول : شوكت نروح ؟

- اصعد بالسيارة جايك 

اندارلي : انت بيا صف ومبطلة

- سادس ما خلصته بطلاني ابوي الله يرحمه جان يصيح البت مكانها ببيت زلمتها المرة الزينة التطيع الزلمة وتلمه تالي شحصلت من الزلم امداهم وامدا خيرهم

هو كاعد يلم حتى يطلع ذب السويج من ايده : شنوه ياهو الامداهم

- الزلم يمعود

- خاب اسطرج هسه واكسر سنونج شو ما تعرفين تحجين

- يا شمالك واني عليك

- جا واني شنو طنطة كبالج معلكهن

- يا دهر اني اقصد الزلم المو زينة انت ياهو مالتك

- جا كولي الزلم المو زينة مو تكولين امدا الزلم وتسكتين

- وانت تحسب علي .. اروحن دخت منك وعلي ما تنجرع

- انا الدوختج !!!؟

- تأخرت يمعود خل اروحن

- روحي وهو ياهو اللازمج

- بيبياي

- دصعدي اذبج كبال العيادة بعد عليمن تمشين ما طولج متأخرة

- ديلا علوا بس استعجل

- فوكاها هي التستعجل .. يا حول الله

- الله يساعد مرتك عليك ما تلام من تكول يدرم هواي

سد المحل ونزل الكبنك وكال : هاي هي تكول هيج

- جا جذب والله صدك

- دمشي امشي انت وجبتج الاثرية هاي

- خو حطيت كورك ويا جبتي

تبسم ومشى كبالي ورحت صعدت ليورا ، كتله : صدك شو علي اليوم ماكو

مصيول : ويا امه

وكف كبال العيادة نزلت وهو راح .. 

صعدت بسرعة غسلت العيادة وشغلت التدفئة .. 

لل٤ ومراجعين كلش اقلال .. بس اثنين سجلو

اجتي الدكتورة العيادة ما بيها بس خمس نفرات وحجز ٣ خلصتهم 

واطتني فلوس كالت : روحي جيبيلنا دجاجة من مطعم ليمونة خلي نتعشى اني وياج

نزلت ركض .. ركبت جبت دجاجة واجيت تعشيت وياها 

وهي تسولف عدها ندوة طبية بهولندا وتريد تروح والزيارة جاية .. فقررت تسد العيادة .. من بعد الزيارة تخلي صاحبتها تجي للعيادة تستلم بدالها ووصتني الفلوس والكشفيات يمي تنجمع من ترجع هي انطيها الها وتتقاسمها ويا الدكتورة اللي تكعد بمكانها

- يعني دكتورة باجر ما نفتح

- لا دا تشوفين ماكو مراجعين الناس كلها توجهت لزيارة الاربعين ونصب المواكب خلي استغل الزيارة واطلع احضر المؤتمر الطبي ما طول الشنغن عندي .

- هاه ، اي احسن

- ديري بالج انت هنا اريدج عيني و ايدي .. خاف تجي الدكتورة اريدج مو بس تكعدين على مكتبج هم تراقبين شغلها ويا المراجعين واي موضوع يثير استغرابج او خلل تبلغيني

- وشلون ابلغج

- من ارجع

- ها تمام

- مفاتيح العيادة راح يبقى يمج .. ما اوصيج

- لا بعيني ادللي

- يلا كملي عشاج ورتبي المكان واخذي راحتج .

- تامرين دكتورة

اخذت جنطتها ومشت واني كمت سويتلي قوري جاي وكعدت بالعيادة اكمل اكلي على يكفي واباوع على التلفيزيون .. اني انصي من اكو مراحعين بس اسمه تلفيزيون مشتغل بس هسه ..

 عليته شوية وكعدت اكل بس فكري مو يمه كلش

باوعت الساعة ٨ الا ثلث .. 

تنهدت .. دك التليفون .. فزيت باوعته ( حازم ابو الانشائية ) 

رديت : الو

- ها شلونج

- شلوني 

تنهدت

- بعدج ترعشين ؟

- لا مو سالفة ارعش بس حازم والعباس اخاف لا ارجع وحتى لو اكله ما رايحة وشاكية يكتلني واني خاوية وعلي احس جسمي بايد ما بيه طكة

- اي هسه لا تشيلين هم فكري بالزين وعوفي الاوهام الشينة 

ما طول انحلت وما يكدر بعد يبيع البيت الباقي سهل يا صبا

- اي ، الحمدلله شكول الله يشوف ويباوع حالي

- ترا الدنيا بردت حيل كامت تكص كص

- اي كاعد اسمع .. الهوى عالي

- مو بس هوى وبرد كلش بارد الله يساعد الزوار شلون حال المشايا بهالبرد ..

-الله يسهل الزايرة عليهم .. هنوب الدكتورة راح تسافر لهولندا .. يعني خاف جنت اشرد بالبيت واكضي وكتي هنا .. هسه لازم اكابل حيدر ويا صياحه ويا عراكه

- بعلي لو المطي يعيش وياج يحتار

- ليش تكول هيج

- ولج مو امس تصيحين اني جاي اتعب تعب المطي وما الحك ومحد حاس بيه دارتاحي

- ويا راحة وحيدر موجود

- اي غير ما بقاله يومين ويرد يلتحق كافي تفكير يا بويه ارحمي نفسج

- هاليومين ما اريد اكابله ولا اريد اشوفه

- اطلعي للزيارة مشي .. عمي تعاي وياي

- اجي وياك شني

- عدنا موكب جاي من عون راح اخذ العائلة ونخدم غاد اذا تريدين امشي وياي .. واليخابرج ويسالج كليله رايحة زايرة.

- هاه .. ما ادري .. انتم شوكت تروحون ؟

- باجر الصبح نغبش

- بيش الساعة يعني

- ٦ نطلع

- جا خوش .. اعد راح اضل بالعيادة ما اروح

- بالعباس فد جبانة تخافين لا تروحين ويكتلج مو

- اي والله اقلها اغيب يومين تلاثة تبرد السالفة يصير الحجي بارد مو مثل هسه من يريد يحاسبني ويحجي بحركة

- دباتي بالعيادة وباجر الصبح حضري روحج تروحين ويانا ..

- راح اخذ امي وجهالي دنيا وسجاد واخوي بسيارة ثانية راح يطلع بعائلته

- جا ومرتك

- تكول عدي شغل عفت وياها علي يجون سوا

- اكلك خاف عيب اجي

- هسه عيب منين متكليلي

- ولو سالت امك مين اعرفك وليش جايبني

- واحنا طالعين سفرة اكلها مرة عدها حاجة وايدة تخدم الحسين سلام الله عليه وتطلب حاجتها جا هسه تعلميني شحاجي امي شبيج انت

-هاه .. ديلا لعد احسبني وياكم وراح اكتب لحيدر رسالة خاف يكول طلعت وما ادري لو ما عندي علم

-هاهية وانت هم لا تظلين تفكرين هواي والعباس موزين عليج فكري باوب عبدلله وشلون تخدمنيه ترا واكفلج وكفة والعباس ومغركج بخيره بس انت ما جاي تحسين فكري شكثر مراد اطاج من بدا محرم وليجاي

-اي والله

- يلا بويه ديري بالج على نفسج .. وادفي ترا باردة حيل

- ان شاءالله 

سديت و اخذت نفس .. 

جا هسه لو ما حازم وياي بهالمحنة ويخابر وينشد عني ويشيل همي احد يدري عني متت عدلت شصار ما صار وياي .. عمي واخوتي ما فالحين بغير يغلطون ويهددون ونكتل ونعمل .. ما عمري سمعتلي كلمة طيبة من واحدهم ..

 شيخسرون لو كالولي مثل ما كالي حازم هسه ( ديري بالج على نفس ) خاطر احس احد مهتم لامري احد يخاف عليه .. 

ليش شحت الكلمة الطيبة بلساناتهم 

وجفت المحبة بكلوبهم ليش ؟

هاي عود كالي لا تفكرين 

اكوم اروح ازرك للبيت ما طول حيدر ما موجود بهالوكت .. اجيب ثوب وعباية خو ما اروحن بملابسي هاي زحمة ..

نزلت وطلعت من العيادة البرد يأذي 

تكول مو نسمة هوى سجاجين ويذبح هلكد ما بارد .. 

واني جبة وجواها ثوب ..خفيف يا يمة طكطكن اعظامي من البرد ركبت ومشيت لحد ما وصلت البيت ادية ورجلية ما احس بيهن

عاد اخذت ستريج وفوكاه بجامة ولبست جواريب صوف وصعدتهن فوك البجامة و ثوب قديفة ثخين وحجاب الاميرة وفوكاه شال .. ولبست العباية .. طلعت شسمني .. بس هيج يلا اسيطر من البرد ..

اخذت علاكة باحتياجاتي ورجعت للعيادة .. تلفلفت بعباتي 

وكتبت لحيدر ( اني راح اروحن للزيارة ) 

خابرني كالي : باجر ارجع اذا ما الكاج اذبحج

- تذبحني ليش شني حقك تزور واني لا رايدة اروح اطلب امرادي

- تروحين لمكتب السيد صبا وتشتكين علي

- اكلك هو بكيفك تتهمني اني لا رايحة ولا واصلة ولا شاكية والخابراك اطيني رقمة حتى اعرف شوكت اني رايحتلهم وطالبة منهم

- تنكرين

- انكر شني خايفة ما رايحة

- جا ياهو الاله مصلحة يمنع بيعة البيت

- وانا ياهو ماتي شوف روحك يمن حاجي منو اليكرهك ورايد يخرب عليك كلشي وذابة براسي

- تمشيهن علي وعلي ماكو غيرج بس دخل ارجع لا ما اعلمج وعلي لا ابجيج دم وعلي

سديت الخط منه واني ادعي عليه طكك علي وفكاني منك 

من امده حظي وقسمتي على هيج اخوة ما بيهم خير ..

خابرت على عمي .. رد : خير شرايدة بعد

- رايدة اكلك رايحة للامام اخدم غاد اطلب امراد وازور

- روحي عساج لا رجعتي ولا رديتي

- اي اني كتلك وكلت لحيدر خاف باجر عكبة اتطلعولكم زاغورة وتسووني امشي على حل شعري رايحة اطلب امراد

- كلعة مردي

- ان شالله وافتك ناخية علية 

مع السلامة 

سديته بساع ..

التفيت بعباتي ونمت .. 

الصبح خمسة ونص دك عليه حازم .. رديت النعاس بعيوني : ها

- ها صباح الخير نص ساعة واوكف كدام العيادة من اخابرج نزلي تمام

- ماشي

كمت غسلت وجهي ولفيت حجابي بس بعده النعاس بعيني رجعت كعدت واغفي .. لحد ما دك قفلت العيادة ونزلت الجو يكتل كتل .. لفيت العباية على خشمي ونزلت للشارع .. صعدت بسيارته وكلت : السلام عليكم

ردو هو وامه كاعدة يمه بالصدر 

تحرك ومشى .. وامه كامت تسألني : بيتج مو بالشماعية لو هنا

- لا غاد بالشماعية خالة

- جا شو هنا

- اي اشتغل ويا الدكتورة ووصتني ع العيادة

- اتباتين ابغير بيتج بالعيادة اهلج يرضون

- اهلي ميتين والعيادة امان بس للدكتورة ما يفوتلها غريب لو مو امان جا ما نمت بيها

حازم : خابرتي حيدر

- اي خابر ويعني مثل الاول ما تغير شي

- لا تهتمين خلي يولي

- ان شاءالله

باوعت بته دنيا غافية وسجاد واكف ويباوع .. رجعت راسي وكمت اغفي .. لحد ما طبيت بنومة ما حسيت غير احنا بالمسيب 

سيطرات بكل مكان و سجاد يلح جوعان وامه تريد مي تشرب دواها 

صف سيارته كدام موكب .. وراح نزل شويا واجا كال : انزلوا خلي نتريك

نزلنا وياه .. دخلونا بجادر النسوان قدمولنا جبن وبيض وسياح وجاي واتريكنا .. رجعنا صعدنا .. هو بقى يحجي ويا الزلمة واجا وشايل كوب جاي حار اندار : يكفيج بالطريق لو يكفي

ابتسمت : لا والله وين سفتين يخلص

- ناقصج بس جكارة وتكمل سالفتج

- ها ابو علي جا من هسه

ضل يضحك امه ما تحجي .. 

وصلنا الموكب غاد .. ٤ جوادر كل جادر ابابه صورة جبيرة للسيد الصدر وابنه سيد مقتدى ومكبر صوت جبير يرج الكاع يصدح

 ( خل يذب حو/ ها نحور الزائرين نعتنيك اموات نمشي يا حسين .. ما نهاب الموت في حب الحسين )

احنا النسوان انعزلنا عن الزلم .. 

اخذتنا مرة اني وبته وكالت تعالن وياي رحنا ورا كاعد يطبخون و يخبزون للامام .. ناس تثرم مخضر ناس تصلخ لحم ناس تخبز

اني كابلت وحدة ع التنور كمت افتح القبق واشلع خبز 

بعدين وكفت اطرك واخبز بالتنور .. وبالساعتين اني على فد وكفة 

طلبت مرادي من الامام الحسين واني بطريق خدمته .. 

والتهيت ويا النسوان اخدم

المنطقة الاحنة بيها خطرة والامن بيها مو تمام 

و الشرطة والسيطرات منين ما تصد تلكى لان هنا الزوار يتعرضون لهواي تعرضات ..

لحد ما صار الليل .. خفت الزوار والناس من البرد كلها كامت تلوذ بالخيم والنجر اليحصله مكان بخيمة .. واحنا خدام مو مال ناخذ المكان ونعوف الزوار بلا مكان .. فخدام الموكب كالولنا انسحبوا اتركوا الجادر للزاور .

احتاريت وين انام .. 

ظهري ما كاعد يعيني .. تعبت حيل 

حتى ام حازم وبته ما شفتهم بس هو كم مرة لمحته ويا الزلم من بعيد.

للثنتين بالليل اريد مكان اختل بيه من البرد ماكو 

دخيلك يالعباس ذيج الليلة كصتنا كص من البرد .. 

ملتفة بعباتي وكاعدتلي على دجة واغفي .. اجاني صوت حازم على يمنتي : جا كاعدة هنا

-وين اروح

-النسوان راحن للبيت غاد بس بعد مسافة ما رحتي وياهن

-وشمدريني محد كلالي

-اخذج

- ياريت بلكي الكالي مكان متت من البرد

حجه واحد : البيت حتى الحوش انملى ونايمين بيه

حازم : زين بطانية ماكو جا المرة هاي شلون تموت من البرد

- خل اشوفلك بلكت الكالها بطانية

-اي والله بعد اخيك خادم الحسين ان شاءالله

راح افتر بين الزوار .. من حق كل زائر بطانية وحدة لان العدد هواية وزاير طابك بطانيتين كاله : خوية اطبك بطانيتك وانطيني الثانية اكو غيرك محتاجها مقبولة الزيارة ان شاءالله

انطى البطانية الحازم كتله : من ١٠ ولهسه ادورلي بطانية ما حصلت من زمان تعال ودبرلي

ابتسم : وين راح تنامين

-شمدرين عسى ما بالشارع بس خلى اغفى متت

-اني نمت بسيارتي اذا تريدين روحي واني راح اصل ويا الولد هنا سهران

- هاه

- والله

مشى كدامي وفتح سيارته ونزل جنطته من الصندوك كالي : خليها جوا راسج ونامي ومن تحتاجين شي اني هناك راح اكعد

-مشكور يطيك العافية 

سديت السيارة وحطيت وادفيت ونمت شلون نومة 

مثل الميت ذبيت روحي ..

كعدت الفجر بعدها الشمس ما طالعة الجو ضباب .. 

باوعت حازم نايم كعدة كدام اكو دجة مال عمود ويا الحايط كاعد ومتلفلف ومرجع راسه .

شعور غريب من اباوعه ما احسه رجال غريب 

ولا كأنه ميعولي وما اعرفه وانسان ساعدني وواكف وياي 

احسه انسان اعرفه وشكله وملامحه تحسسني بامان من اباوعه 

فجأة تحس انسان غريب اقرب الك من كل اهلك العاشرتهم عمر

ما اعرف شلون شعور 

بس هذا الجاي احسه ويا حازم 

ما بينا صفة واضحة لا اني ويا نحب بعض لا نعترف بالصداقة حتى نكول صديق .. لا هو اقاربي لا هو اي شي بس هو اقرب من كلشي .

كعدت فتحت الباب مال السيارة وجريت البطانية 

ومشيت دا اخليها عليه .. فز : ها

-جا نايم هنا لو كايلي انزل ونام بسيارتك

كعد كام يمط بجسمه ويباوع منا ومنا وهو يصحى كال : الاهل اجو

-هستوني كعدت

-بيش الساعة

-تليفوني طافي ما ادري بس يمكن ب٦

هز راسه : راح تنامين بعد

-لا نام بالسيارة اذا تريد

شال البطانيتين وفت السيارة ونام بمكاني واني رحت ويا خدام الموكب وزرت عباتي ووكفت ويا حجية تمد سياح .. كامت تعلمني اتذب بالسراحية واني امدها وهي تعدل وراي ..

ويشيلوها ويكصصوها ويوزعوها للزوار ويا بيض مكلي وجاي حار 

الحجية استلطفتني طلعت هم من المدينة وجاية هنا ويا ابنها للموكب تخدم كامت تسالني وتستفسر مني من عرفت اني عاجر واهلي ميتين انمردت عليه مرد كامت كل شوية تصيح : اويلاخ 

اخر شي كالت : دتعاي عدي وعلي البيت بطرك اني وابني ومرته وجهاله غرفتنا جبيرة نعيش اني وياج ونقسم اكلتنا وسالفتنا ونومتنا

كمت اضحك وياها: لا خالة الحمدلله عندي بيت

-جا مو تكولين اخوج رايد يبيعه ومهددج

-تكضي وربج يحلها ما يضل حمل مطروح

-يسهل امرج يا خالة ويعينج على هالمصاب يمة يتيمة وخوانها موش خوان اويلاخ يكلبي

كمت اتونس على سوالفها 

انصاح اسمي : صباااا

انداريت امل مرت حازم : ها

تأشرلي عود اجيها ، صحت : كاعد اشتغل تعااااي

- عوفي البيدج بساع

- يا كلاب هاي شو تصيح بامرة

اتجاهلتها كامت تصيح : مو احاجيييج ويامن احجي ويا الحايط

اللي بالموكب انتبهولها كتلها : خية اليريدني يجيني ما تشوفين شغل بيدي وصياح لا تصيحين فدوة ما كاعدين بشارع

ضاجت مني حيل كملنا اني والحجية كل الجدر مال عجين السياح وبقت اخر وحدة كالتي : نتريك بيها اني وياج والبنيات

جرينا حصير وسوينا كعدة وكعدنا ناكل بس نسوان 

هي واكفة ليغاد وام حازم يمها ..

 كملنا الريوك .. وكالو ساعتين استراحو على ما يجيبون مسواك الغدا خاطر نبدي شغل لغذا الزوار .

اني كابلت القوري مال الجاي واصب ، اجاني حازم صاح : خوش حصلتيلج امچين منيشنته يم القوري

ضحكت : اي بالعباس الجاي مالهم اطيب من مالتنا حيل مهيل وبيه طعم يخبل لزكت يمالقوري بودي اعيش بوسطة .. هيج الله يوفقني واتزوجلي قوري .

ضحك : يعابيج العباس ولج مو خدام وجاين نخدم زوار ليش تضحكينا

- جا مو ضحك غوا .. باجر تكضي الزيارة حرامات ونرد

- ان شاءالله تكضي بخير وسلامة ، هم احد خابراج

- لا فاتحة التليفون ولا ادري عن احد شي

- جا لو صار شي لو رادوج

- وشعدي مهم بنصهم ولد تلد خاطر اخاف واهتم يمعود

- هم صدك ديلا اذا احتاجيتي شي ترا اني هناك بذيج الخيمة

- الله يتقبل منك الخدمة

- من الجميع ان شاءالله 

مشى وبسرعة وراه اجت مرته كالت : شنهي جيتج ويا حازم ليجاي !؟

- كلالي اكو موكب ورايحين نخدم بيه تروحين كتله ياريت

- وبسرعة لجيتي روحج يوم الكاج ابيتي يوم جايبج ويانا ليجاي 

خو التليفونات والمخابرات .. كام يسكن الدوانية خاطر لحد يوصله ويكربه

- خيه هسه اني شعلي .. هي ياهي الاحت وكالت اريد ازوج رجلي واريد اخلص منه

- واطي لشكولاتج فدوة لالله

- واني ما كايلتلج اطيني ولا رايدة والزلمة ساعداني ووكفلي ويطلبني دين

- ساعداج لسواد عيونج ؟

- انت ليش جاية اتحاسبيني خو روحي واحجي وياه

- ابعدي منه ولو شفتج ادورين حواليه وعلي لا اروح واشهرج واخزيج بنص عمامج

- شوف الوعد شو ياهو الكام وكام يهدد ويتواعد خاب ما تولين

-لا تغلطين لا افرك السانج

-والله يا حبيبة لا اني گليلة شر ولا اني مدمغة احترمي روحج واعرفي شلون تحاجيني مساعة تزمخين وانت تصيحين شني جاهل عدج اني

-وتروحين فدوة للجاهل اقلها ما متلزك بالزلم مثلج

- ما طولج هيج صيري سباعية وانداري لبيتج ولمي رجلج وجهالج وداريهم باقي ابنج يتشكرني وعوزة يبوس ايدي على تمنات وتبسي وجاية تصيح رجلي بايكته .. شو دميلي عني .

عفتها وكمت .. رحت لغير موكب حطيت ايدي ويا النسوان وكمت اشتغل 

اجا عليه علي ابن حازم كال : ابوي يريدج

كتله : كله جاي تشتغل

مشى عني من كملت الغدا وياهم رجعت لذاك الموكب شافني حازم كال : شصاير

-ما ادري انت كول شصاير ؟

- امي كالت على اساس متعاركة ويا امل شنو القصة

- اني متعاركة

جاي احجي ومنحس الا هوسة والزوار تركض والمواكب كلها تراجعت والشرطة تصيح وناس تصيح انتحاري وناس سيارة مفخخة

ركضت بسرعة واطيت وجهي للبيوت .. 

ارهابي وكضوا القوات الامنية ..

 بس الخوف دب بكلوب الزوار .. 

اهل المواكب كامو يرفعون المكبرات الصوتية ( لبيك يا حسين ) 

كامت الزوار تمشي وتصيح لبيك يا حسين وتكمل مسير لكربلاء

بس كمت ارجف هسه اذا اموت هنا منو يدري بيه ومنو يندلني 

هسه على اساس شلون عيشة عايشة حتى اخاف من الموت شفايتلي اموت واني خادمة للحسين والله واهل البيت يتولوني .. ولا ارد واكابل اخوتي وعمامي .. على اساس عدي الاخاف عليه وارعش امداني هم غبرة

عاد رجعت اكمل شغل وشلت الخوف من كلبي 

ووكفت اخبز واكمل خبز

لهناك سمعنا انفجار صار وراح بيه ٨ شهداء زوار 

بس مو يمنه بكربلاء الناس خافت بس كملت مشي للامام .. واحنا استمرينا وكملنا خدمة

حازم جان كاعد وامه و مرته وجهالك واكفين يمه واخوه منتجي ويسولف وياه .. اخذت بطانية وكعدت بمكاني ويمي جمرية والحجية كاعدة واشرب جاي ..

صاح حازم : اذا اتريدين رجعي للسيارة

كلهم انداروا يباوعون عليه 

اشرتله بايدي لا

.....

محمد اخو حازم : هي منو هاي المرة ؟

امل : وحدة بلا اصلا لا صداد لا رداد

حازم : ولج مو بطريق الامام الحسين بعد وين اخليج وتنظفين

-جا مجذبه

-مجذبة خافي ربح باعراض الناس

- واني طعنت بيها كلت لا صداد لا رداد

-جا اذا المرة يتيمة الصداد والرداد منين تجيبه استحي كافي ترا بزعتينا

- وانت شعدك صايرلها محامي دفاع شعدك وياها

-وانت ياهو ماتج اني شعدي ما عدي التهي بشغلج وجمعي فلوس زايد وحطيهن على كلبج وادفي بيهن يفيدنج

-لا انت تفيدني

محمد : يا حجاية ردي المكانج صدك جذب هاي ليش هيج صايرين واحدكم ما طايق الثاني صلوا على محمد شبيكم

حازم : خلي يكون بعلم اذا ما عدلت من روحها وحسنت وضعها وحك هذا طريق ابا عبد الله احطلي مرة ... قطعته

- وتهددني بالمرة انت اني من ذاتي كتلك اتزوج والله ما اهتم ولا تحركلي شعرة من راسي بس هاي ما اطببها ابيتج

- من يصير بيتج عود متفاهم

حجت امه : وانت ناري تخطب هاي

- يمه لا تصفين انت هم

محمد : اذا امل راضيتله يتزوج وما رايدة تصلح وضعهم يمه بعد السالفة يمهم شتسويلهم

امه : عاجر يمه ما تخلف

محمد : والزلمة رايد بزر عده الولد وعده البت

حازم : يمه دخيل بختج انت تخوطين بصف السالفة

- لا والله البت ما اريدها يمه

حازم : واني كلت اتزوج كتلج تعاي اخطبيلي

- جا مو تكول احطلي مرة

- لو ردت بعدني ما موازن امري

- وهاي شني وضعك وياها

- يمه عوفي موضوعها يمي لا تحجين بيه ولا تدخلين

- جا غير نعرف شنو السالفة

- ماكو كل سالفة والموضوع يخصني محد اله خص ويدخل

امل :- ليش بالله لو اتزوجت وين تجيبها

اتجاهل وما جاوب 

حجت : اني رضيت تتزوج بس الاختارها اللي اتناسب وضعنا وجهالنا مو التهجم بيتنا وهاي مبينة هجامة بيوت .

حازم : اسولفلج وياها ان شاءالله

- والله لو اخذتها ساعة ما اضل على ذمتك

- الله وياج ومحمد وعلي شني اتهددين انت

محمد : يعني ناوي

- خوية هي شني كلساع اخوط بسالفتي كلت بعدني ما حاسم امري ، وهاي مرة مرت الثانية من واحدكم يوكف كبالي ويكلي ارضى وما ارضى وهيج تسوي وهيج لازم تعمل بالعباس اشكه وصلتين اسوي

حجت امه ؛ خلف الله عليك 

عافته ومشت وامل مست وراها والجهال .. بقى بس محمد 

حجه : احجي الصدك البت هاي شنو سالفتك وياها ناوي وياها علي

- لا والعباس اني روحي ما اعرف شريد بس ما ادري شكاعد يصير وياي

-ليش

-ما ادري جنت لو احط راسي ع المخدة افكر بضيم البيت والجهال والمرة والف حسبة تطرى من شهرين وليجاي ما حطيت راسي لا ما اتربعت هالمرة ابالي وشايل همها وافكر ها كلت ها شربت ها جاعت ها تأذت اكل لروحي ياهو ماتي ..

وحتى هي المرة نفسها اتضايكت مني ومن حسابي الها اتعارك وياها على امور ما تخصني وهي تكلي شعليك واصفن واگل لروحي شعلين واندار والكا روحي تتمحرگ ومهتمة بامرها

ما عادت روحي بامر ولا عقلي بكيفي ولا اكدر ادير نفسي 

يومين دارت عني وزعلت كمت الليل ما انامة اكل الروحي خب يطبها مرض خل تزعل والاكي روحي متعنية تشتري تلفزيون حتى تروح تراضيها واشوفها واطمن عليها ..

 انت كلي الحل شنو

-معناتها تحبها حازم

-خاب يا حب انت، تعرفني زلمة مالي بهالسوالف واستصغر كلمن يحجي بالحب وهالامور ما تليق بالرجل بس هذا ما ادري غباء مدري شيطان والله ما ادري

- خوية تخادع روحك انت تحب

-لا يا حب يمعود ، لا احبها ولا الي غرض بيها

- صح واضح عاشت ايدك .

ضرب على جتفه ومشى وحازم مستمر يباوع لصبا 

استغفر ربه واندار عنها وكام يكمل شغله ... وهي مكابلة الحجي تشرب جاي .

صبا : لليت بقيت بمكاني كاعدة ع الحصيرة بس الجو بارد والزاور تارسين الجوادر والمواكب .. والحجية كامت راحت بسيارة ابنها تنام مالها مكان .. واني ضليت بمكاني اواسي روحي واكول : بس اليوم بس اليوم وباجر بحيل الله نتوجه نزور وارجع انام بالبيت وادفى وارتاح واتمدد براحتي

وحاطة راسي ع العمود منتجية وما طالع مني غير شوية من وجهي 

احاني صوت حازم : ما تكومين وياهن للبيت تنامين غاد

- حازم كل وحدة حاجزة مكانها وكل وحدة تصيح هذا مكاني من البارحة

- جا كومي للسيارة

- لا خليني هنا

- دكومي بابا تتمرضين

- يمعود واذا اتمرضت فد مندلة

- انت ليش تتعاندين ويا روحج

- حازم مرتك ما راغبتني مو ادور انام بسيارتك

- وتتنطرين رغبتها شمالج انت ياهو ماتج بيها

- عوفني بمكاني

- الجاي حار ؟

وخرت راسي : طفى الجمر يمكن 

لزمت الكتلي بارد اي

راح جاب خشب ونفط .. وعلك الخشب نار وهو كام يصب .. 

حطيت راسي ع الحايط وغفيت من دفيت شوية

حسيت عليه كام ورجع السيارة كدام المكان اللي اني كاعدة بيه .. وكعد بالسيارة .. وفاتح الباب ..

كعدت الفجر على صوت امه كايمة رايدة مي تتوضا وما لاكية بالبيت جاية للموكب تاخذ من البوري مال الشارع الساحبي للموكب يضخ قوي بس بالبيوت انكطع الماي .. من اجت شافت حازم حاط سيارة كبال المكان الاني كاعدة بيه

صايرة على يمنتي الحايط ويساري الخيمة مال الجاي وكدامي سيارة حازم وواري الشارع اليطلع ع البيوت .. كالتله : عاقل مجنون كاعد بالسيارة وفاتح باب السيارة بهالبرد

فتح عينه اني مثل المغمضة عيني حتى ما احسسهم كاعدة 

باوعلي وكاللها : جا شعدج هنا الشمس بعدها ما طالعه

عافته ومشت تتوضى ..

اجت ع الحصير الكاعدة عليها وكفت صلت وتربتها بيدها .. 

حازم كاعد باوع عليها .. كملت صلاتها وكامت تسبح وكامتله كالتله: شبيك يمه استخفيت جا اكول انت ابني الحوك

- شني شبيج يمه

- مكابلها وعينك ما تزيح عنها شنهي معناتها ما تستحي

- مكابلمن يمه رحمة الوالديج دخل اكمل نومتي

سدت باب سيارته واجت علية 

ظلمة الدنيا بعدها رفستني برجلها عود تكعدني .. فزيت كتلها : شبيج خالة

- شعدج نايمةهنا

- جا وين انام

- ما عدج اهل انت محد يسال عنج

- خالة شرايدة

- امشي منا ياله

- ووين اروح دا تشوفين الزلم والنسوان متلفلفة ونايمة بالشوارع

- اسمعي ولج لا عبالج اني غمة وما عرف ترا اعرف كل الزين انت مشوبشة على ابني ورايدته واني وحدة عاجر وبلايا اصل مثلج ما اريدنها

- ومنهو الرايد ابنج ومن السامحلج تجين وتغلطين خالة استحي على شيباتج ما اريد اتجاوز عليج بس لا يمج اني ولا بكربج خاطر ترفسين وتغلطين علي

- منهي هاي الما تستحي على شيباتها وووولج

اكتلي جبيري يمي ضال بيه بس بثل شو هاي لزمته وعطرته براسي 

فزيت ودفعتها وكعت المرة وكامت تصرخ .. وكمت لحيلي وهي

 تصيح : يمااااي كتلتي البت يممممممه ... ولك احويزم تعال ليه كتلت امممممممك

- جا هو حظي وين كعد خاطر يكعد وياج .. هسه اني يمج بكربج دميلي عني

على صريخها اجا الرجال ليغاد وهو يكللها خير حجية 

عفتها ومشيت بس اح براسي اذتني بضربتها راسي كله انرض

استهضمت جا حتى هاي كادرتلي واطكني .. وين ما احطها سودة مصخمة .

دموعي صبت 

مشيت توضيت وهم التموا عليها حتى حازم اجاها وهي تكلهم طكتني خالة وكالتلي هيج وبربدتني

تقربت منها وكتلها : المن جاية تخدمين الحسين وانت تجذبين الحسين لا يريدج ولا يريد خدمتج عمي

حازم صاح : اسسسسس صوووتج

-وانت ياهو حتى تكلي اس رد امك عني بدال ما كاعد تصيح علي

حجه الرجال : شصاير غير نفتهم شصاير

- شمدريني نايمة واجت رفستني اتكلي شني تنامين هنا والله ابنها نايم بالسيارة جا اني يم ابنها بكربة تمشي وتتهم بالعالم وتغلط مو عيب

حازم كام يخزرني ويصيح : ولج اسكتي ولج اسكتيييي

-سكت اهلك عني من تريدني اسكت جا حتى انت كدرتك عليه

كام يزمخ بيه ويخزر عفته ومشيت رحت بالخيمة مالت الجاي جريت سفرة وصيت عليها .. بس عيوني كامت تجري

رحت وكفت على الريوك بس الرجل خفت ع المواكب نص المواكب نزلت جوادرها .. وبقى كم جادر بس بعد زوار تمشي ونخدمها

بس دموعي ما نشفت 

تقربت من امل كالتلي : هسه اتطلعين من الموكب لو شفتج دقيقة هنا لا اشهرج واخزيج

- انتم واحدكم ما يعرف يحجي حجي وعود هي زينية من امر و اغلط ع الناس .. اسمعي لا عبالج واح امشي خوف منج بس وجوهكم الزفرة لعبت نفسي والمومب البيه هيج وجوه وعلي ولا يعجبني اضلن بيه .

عفت والحجية كامت تدافع عني وتتعارك ويا امل وامل تتصايح وياها 

شافني حازم طلعت من موكب النسوان .. وامشي بهمة لحكتني الحجية كالتلي خالة : لا تمشين نروح اني وياج عكب الظهر مالج غرض بهاي

-فدوة لعينج خالة بس اختنكت خل اتعنى بعد للامام هم ياله اوصله وارد لبيتي

-لا يخالة سودة بوجهي لا تنهضمين خل تولي

وكف حازم : وين رايحة فوتي جوا

-مع السلامة خالة

كضتني وهو يكلي : انت ليش تعاندين

-مرتك جاي تهدد تشهر وتخزي وامك تكتل الصبح خوية اني كاربتك عدي شي وياك ترا والله البيه كافيني اذا مالي والي ومن خسرتي احتميت بيك تساعدني وشافوها علي شينة عمي رحم الله والديك حتى مساعدتك ما اريدنها فكوني

-لا تبجين وفوتي جوا اني احلها

- وضعها وياك ما حليته تريد تحل وضعها وياي شو دخليني اروح رحمة لاهلك .

- شوفي لحد هسه اني ما مستخدم وياج غير لغة بالقران لا ما مشيتي وصعدتي بالسيارة اشوفين مني غير وجه

- هم انت صفيت وياهم تهدد

-صبا ما جاي اهدد عالم منا

كامت المرة تكله : خالة هسه اني اهديها واسكتها بس روح لم ذيج عمي لا تنكدر ولا تندكر

عافني وراح والمرة ضلت لازمة بيه 

كتلها خالة اني من الاستس جيتي غلط بس كلت اخدم الامام واطلب امرادي بلكت امري يتعدل تعدي مصيبتي على خير بس بعد هو المنحوس منحوس وين ما اروح حظي ويا المشاكل مغناطيس

احجي وانتبهت وهو يحجي وياها لزمها وعتها 

وهي اتضايقت وكامت تصيح وهو صار عصبي .. واخوه محمد ادخل بيناتهم .. وجر مرت حازم لسيارته واخذ مرته وامه وحازم مشى لسيارته

صارت السالفة طين بيناتهم .. 

اريد امشي والحجية كاضة بيه لحد ما اجا حازم 

كال امشي .. كتله : انت مسؤل عني 

ترا ذيج مرتك مو اني خليني وروح ليش محتار بيه

- بابا انت اجيتي وياي ترجعين وحدج شلووون صار انفجار اصخام وجرى عليج شي شكل لروحي شكل لربي جبتها وذبيتها ..

 امشي خلي ارجعج وابري ذمتي وانعل اهلي بعد لو ادخلت بيج

الحجية ايدته كالت : خالة ماطولج جاية وياه حقة الزلمة بذمته لما يرجعج سالمة يلا .. امشي خلي يوصلج

- اريد اروح ازور

حجه : لج بابا مو جاي احجي وياج مثل الاوادم اطلعيني من طوررررري ليش امي خل ارجعج يا زيارة خليتن بيها زيارة انتن بس احنا غمان وجبناجن .. امشي

جرتني المرة صعدتني بسيارته .. 

وابنه علي وبنته دنيا ويانا .. كعدت ورا .. 

هو صعد بالسيارة وداسلها اني استهضمت حيل والعبرة وكفت بزردومي

اخذ بالساعة هو ساكت ما حجه ولا نطق ابد 

واني روحي طالعة .. وبعدنا ساعة كاملة واحنا شارع واحد واكفين بيه الازدحام يكتل

كتله : خليني انزل هنا على هالحساب لباجر ما نوصل شني جبتني استعبدتني ترا ماكو هيج

باوعلي بالمرايا : انت شبيج بابا

بس حجاها بجيت كأنما محتاجة واحد يطخني بكلمة 

كمت احجي شيش بيش : ما بيه اني اريد اروح عوفني يلا

- اعوفج وين بهالازدحام

- مالك علاقة

- صبا شصايرلج

- كافي كل نا واحد منكم ضاج غلط وصيح وضرب اني مو مدمغة لاحد والله اني تعبت

- والغلطان وياج ليش ما جيتي واطيتني اسمه لا انعلج سلفا سلفاه

- شتنعل عوفين اريد اروح

- وين تريدين تروحين مو ماخذج

- ما اريد ارجع لبغداد اني اريد ازور

- عمي صار راح اتوجه لكربلاء وشتأمرين اني حاضر بعدددد ؟ 

تزورون بابا ؟

اثنينهم كانما جانوا ينتظرون كامو يصيحون : اي اي نزور

لف وفات بشارع ورجع توجه بطريق كربلاء .. 

بالموت يلا كدرنا ندخل كربلاء من ورا الازدحام والسيطرات ..

كالوا لهنا حدكم صفوا السيارات وكملوا لكربلاء مشي .. 

حجه : ارتاحيتي ام دميعة وهاي راح نصف السيارة ونمشي 

ديلا

ابتسمت والجهال ضحكوا 

اخذت تليفوني من الشحن جان حاطة ع الشحن وخليته بجيبي 

نزلنا وهو يخابر .. حجه كمل ..

 بنته يمي واني اسأله : يا صف انت

- اول متوسط

- ها يعني عمرج ١٣

- اي طبيت بال١٣

- زين بالمدرسة

- لا ما اخبها بس من الضوجة اروحن اذا ابطل اكعد بالبيت

- يا ههه يعني مسويتها ونسة

- احسن

علي : هي غير كسلانة لا دراسة لا تنظف لا تغسل حتى سبح ما تسبح

- انت معليك جايف على اساس انت التسبح

ابتسمت من مداهرهم وكف حازم :

 الجماعة واصلين للبيت

- صدك رجعو يعني

- اي وام المشاكل راح توصل للزيارة

- شني كاعد تعايرني خو روح ارجع وعوفني

- دمشي امشي ارجع عوفني جا غير جاية وياي شلون اعوفج

- وابتليت اجيت وياك عمي اني مسؤلة عن نفسي مبري الذمة

- امس انفجار صار بكربلاء والوادم اتطشرت لو اتطشرتي وياهم شكول اني

- ومنو الراح يحاسبك علي حتى تكول ؟

- روحي

سكتت من حجاها 

وهوسوا روحه يلزم بايد جهاله واحد منا وواحد منا وكام يمشي واني وراه ..

مشينا مسافة وهو لازم بيهم المواكب بهالطريق للامام كتل 

شنو تشتهي روحك ما لذ وطاب قوزي مسكوف دولمة كبة حلويات مقبلات عصاير تكول جنة مو شارع .. واهل المواكب يتوسلون بالزوار والزوار هنا وصلوا مرحلة التعب يريدون بس يكملوني وصلون للامام .. والصايح يصيح : تفضل يزاير اتغدا يزاير 

ويتوسل عليك العباس تعال اتغدا .

دنيا بته رادت عصير وكفها يمي وراح جاب عصير برتقال طبيعي وجابلي كوب جاي من اللي بصفة اخذته .. وعلي ابنه اخذ ماعون وكعد ياكل .. وهو وكف يدخن جكارة وبته راحت تحجي ويا اخوها وتشاركه بالاكل

حجيت : حازم

- ها يابه

- خلي نتعاهد من نرجع من زيارة الإمام الحسين كل واحد بطريق لا اني اذيك واذي عائلتك ولا عائلتك تأذيني وتزيد بمشاكلي

- هالامور لتفكرين بيها

- لا اترجاك خلي نتفق

- براحتج اذا تحسين اني مضايقج وجاي اسببلج اذية من حقج خو اني تهمني مصلحتج الله شاهد وهذا طريق الحسين كل نيتي وياج اساعدج .. مالي بيها غير نية

- اني اعرف انت الوحيد من بين الكل نيتك صافية وياي وتفكراي وتشيل همي بس .. 

سكتت

كام يذب الدخان من صدره ويتنهد 

حجيت : طريقنا مو واحد ليش نعذب نفسنا 

ودا تشوف .. مثل الكاعد يمشي بكاع وغرة شما تقدمت تغور اكثر

اني اخاف لا نوصل لنقطة صعب نرجع منها وصعب نكمل بعدها 

دا افكر ...

قاطعني : لا تفكرين ولا تخافين .. انت تثقين بيه ؟ اذا تثقين بيه امني ولا تحطين ابالج لا خوف ولا هم تفكرين بيه عوفيلي هالامور انا احيرن بيها

- حازم اعوفلك شلون

- لا تاخذين قرار امشي هيج وعوفي كلشي لله .. هو الله يرتب الامور بحكمته .

جهاله وكفوا سكتت هو شمر الجكارة و داسها وكاللهم : ها بابا شبعتوا

- اي

مشينا .. تنهدت 

بكل خطوة يدورنا تعاي منا 

تعاي جاي سيارة .. لا تفوتين متاك زلم 

تعاي لهنا نار .. ميلي من هذا الموكب 

جعتي .. اجيبلج مي .. هاج هذا جاي 

محتاجة حمام .. تعبتي من المشي .. نكعد نرتاح 

يدورني ويهتم ويخاف وكاني وحدة من عائلته .

مو بيدي هالشعور فاقدته حتى من جانوا اهلي عايشين 

زوجوني بعمر ١٣ سنة لو اجيتهم مضروبه يرجعني ابوي بنفس اليوم 

محد بعمري اهتملي محد بعمري دورني لو كال وين راحت وين اجت وين مشت لو فكر هذا خطر عليه لو هذا الشي يأذيني .. عمري صغير بس الصعوبات كلها وكعت واتاذيت وعديت منها وحدي محد كالي هاج ايدي وكومي .. حازم جانت اول ايد نظيفة وامان تنمدلي بدون غاية .

وصلنا الإمام الحسين يريد يصير المغرب 

باوعني عاقدة حواجبي كالي : شنو تعبتي

جاوبنا اني وبنته : حيل

ضحك : عمت عيني عليكم يلا الحمدلله صلنا هذا الامام زوروه خاطر نصلي المغرب بعد ونتوكل نرجع .

جبالنا بطالة مي .. اتوضينا وكعدنا زرنا بمكانها 

همستلي بته : بعد ما اكدر امشي مشكت واستحي اكل لبابا

- خب اني هم واستحي

- وهسه شلون راح نمشي

- خلي نرتاح شوية ساعة ونكوم

عافنا ساعة صلينا المغرب وخلصنا بس من كعدنا ثكلنا التعب كله طلع علينا .. هو وابنه واكفين واني ودنيا كاعدين وامددين رجلينا 

كال : يلا شني نبات هنا يلا كومن

حجت دنيا : بابا كلش ما اكدر والله

حجيت : اي بالعباس كلش

باوع النا .. حجه : شني مشگتن

طكتها ضحكه الفطيرة وتكلي : يا عرف بينا 

ضربتها : دسكتي انت الفضحتينا

كام يضحك من كل كلبه يريد يسكت ما يكدر 

اني لفيت وجهي من الفشلة وكمت حتى اثبتله العكس

باوع عليه كال : تكدرين تمشين

- يا حا شبيه صدك جذب كلشي ما بيه

- منأكدة ؟

- دمشي يمعودة صدك جذب 

شو مشينا ورجلينة انفتحن من كيفن صرت جني وحدة بيه كساح

شو باوعني وهو وابنه بجو من الضحك 

لفيت وجهي وكتلهم : بعد هاهية اني لهنا وارجع لبيتي انتم كملوا

- دتعاي دتعاي تمشي هي

لزم بابو عربانة وكاله : صعدهن

- يا اصعد بعربانة شبيك

- دصعدي هسه ليش تخلينا نحجي اصعدي

والله شو جني جنت انتظر حجايته هاي شبخت بعباتي وكعدت بالعربانة اني وبته وابو العربانة طار بينا طيار نصعد وننزل .. غطيت روحي بالعباسة من الفشلة حتى لحد يعرفين

لحد ما وصلنا لمكان .. نزلن وهم صعدنا عربانة ثانية وصلتنا للسيارة 

صعدنا بالسيارة .. ذبينا ارواحنا مثل الموتى ما درينا بالطريق شلونه .. ابنه بالصدر ودع واني وبته وحدة ترفع وحدة تكبس بالشخير

وهو كاعد يسوق ويدك جكاير 

ما حسيت الا هو يكعد بجهاله .. فزيت اباوع 

هذا باب بيتهم .. يا شوكت وصلنا .. شكد نمنا معقولة نمنا الطريق كله

كام يشيل بجهاله شيول ويدخل بيهم 

اني نزلت من سيارته حتى اروحن بعد وفتحت التليفون 

اول ما فتحته اجن رسايل 

مخابرين علي وجعفر دازلي ( ساقطة اليوم الزمج لو لا طالعة ويا حويزم ومحد يدري عنج ) ( وين خذاج وشجاي تسوين وياه اليوم ندفنج والله )

....... #يتبع

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا