رواية عشق مختلف الفصل الثالث عشر والرابع عشر بقلم الكاتبه هدير محمد حصريه في مدونة قصر الروايات
رواية عشق مختلف الفصل الثالث عشر والرابع عشر بقلم الكاتبه هدير محمد حصريه في مدونة قصر الروايات
13=رواية عشق مختلف الحلقة الثالثة عشر
” قسمًا بالله… من الدقيقة دي لغاية ما امو*ت… مش هقربلك ولا هلمسك !!
نظر لها بغِل و ترك ايدها و اخذ ملابسه و خرج… رنا فضلت تستوعب هو قال ايه في الاخر… ده اقسم !!
قعدت رنا على الأرض بين الحاجات المتك*سرة و بدأت تعيط…
هيثم ذهب الى الغرفة الثانية… ارتدى ملابسه و اخذ هاتفه و نزل… رنا رأته من البلكونة و هو يذهب… كانت تبكي بشدة و مش مستوعبة كل اللي حصل ده…
” الو يا كارما…
* ايه ده هيثم ! وحشتني…
” انتي فين دلوقتي ؟
* أنا في البيت… بس بتسأل ليه ؟
” أنا هجيلك… أنا في الطريق اهو…
* لو عايزني اخرج ماشي مفيش مشكلة…
” لا خليكي… أنا جايلك…
قفل المكالمة… كارما اتفاجئت من كلامه و فرحت أوي… جهزت أكل و اشياء يشربوها… و ارتدت قميص نوم اسود قصير و قعدت مستنياه… و بعد شوية جه و فتحت الباب… اخدت الجاكت بتاعه… قعد على الانتريه سند رأسه على المخدة و غمض عيونه… جات كارما جلست بجانبه و قالت
* انت مضايق من حاجة ؟
” مش عايز اتكلم… أنا جاي اريح دماغي…
* ريح براحتك… أنت جيت للشخص الصح… اجبلك تاكل ؟
” هاتي…
دخلت المطبخ و جابتله فراح بانيه في سندويتشات فينو و بيبسي… بدأ ياكل و باصص للفراغ و ساكت…
* غريبة يعني انك جيت… من اول ما اتجوزت مشوفتش وشك… اشمعنا النهاردة افتكرتني ؟
” هتسألي يبقا امشي… انا مش جاي هنا عشان تسأليني الاسئلة دي…
* خلاص متتعصبش… دي شكلها زعلتك جامد…
” كارما… طول ما أنا قاعد هنا… متجبيش سيرتها و ملكيش دعوة بحياتي الزوجية و متسأليش عنها… تمام ؟
* تمام يا روحي خلاص متتضايقش…
اكل أكل و شرب البيبسي… كارما قربت منه و حطت رأسها على كتفه
* وحشتني أوي…
نظرت له في عيناه الحزينة… ملست على دقنه بإيدها و نظرت الى شفايفه و بدأت تقرب منها و لسه هتبو*سه… أدار وجهه للجانب الثاني نزع ايديها من عليه…
* مالك يا هيثم ؟
” تعبان شوية و مش فايق للكلام ده… ادخلي انتي جوه انا هنام…
* طب ما تيجي تنام جوه ؟
” لا… هنام هنا…
* تمام… براحتك…
دخلت كارما جوه و رمت نفسها على السرير و قالت بسعادة
* دي شكلها ضايقته أوي… جدعة والله… رجعلي اهو و جالي البيت… و شوية و شوية هيجيلي على السرير و هيبقى مِلكي أنا وبس !
قلع هيثم الكوتشي و اتمدد على الكنبة… حط ايده وراء رأسه و تنهد بزعل فضل يفتكر اللي حصل… اضايق و غمض عيونه لغاية ما راح في النوم…
* بس الفيلم كان تحفة
* حصل يا ماما نسرين…
– مش هنكر… الفيلم فعلا كان جامد… تاكلي فيشار يا سلمى ؟
قالتها ريم و هي مبتسمة ابتسامة قد تصل الى اذنها… استغربت سلمى من سعادتها تلك
* لا خلهولك… البيت هادي شكله هيثم لسه مجاش… هطلع اقعد مع رنا شوية…
قالت ذلك ثم ذهبت لغرفتها… طرقت الباب و لكن لم تجد رد… سمعت انين بكاء… قلقت على رنا و قررت فتح الباب… فتحته و دخلت… وجدت الغرفة مليئة بالزجاج و مبعثرة… و رنا جالسة وسط تلك الفوضى… ضامة نفسها و تبكي… قفلت سلمى باب الغرفة و مشيت وسط الزجاج حتى وصلت لها
* رنا ايه اللي حصل ؟
نظرت لها رنا بعيناها التي ذبلت من البكاء و لم ترد
* رنا ردي عليا…
‘ مش قادرة اتكلم والله…
* طيب اهدي… قومي تعالي معايا على اوضتي و هجيب حد يشيل الازاز ده…
سندتها سلمى حتى نهضت و ذهبت بها الى غرفتها… اخذتها على الحمام و غسلت وجهها ثم اجلستها على سريرها
* خلاص اهدي مفيش حاجة… هو هيثم رجع ؟
نظرت لها رنا و اومأت لها ايجابًا…
* هو اللي عمل كده في الأوضة ؟
‘ عمل كده بسببي…
* ليه ؟ ايه اللي حصل ؟
‘ مقدرش احكي…
* تمام خلاص مش مهم… اهدي بس انتي… هروح المطبخ اعملك كوباية لمون و جاية تاني
ذهبت سلمى للمطبخ و اعدت لها كوب عصير ليمون… و قبل ان تذهب لغرفتها… اخرجت هاتفها و اتصلت على هيثم… و لكن لم يرد… عاودت الاتصال مجددا و لم تجد منه ردًا…
* يوووه يا هيثم ما ترد… ايه اللي حصل ما بينكم بس…
عادت سلمى لغرفتها و مررت كوب الليمون ل رنا و اخذته منها و شربته… جلست بجانبها و ربتت على ضهرها برفق
* خلاص اهدي… كل حاجة هتتصلح…
‘ مفيش حاجة هتتصلح… هيثم بِعِد عني للابد
* لا متقوليش كده… هيثم ده روحه فيكي و بيحبك… كل مشكلة ليها حل متقلقيش… بعدين هيثم طيب والله و مش هيهون عليه زعلك… ساعتين كده و هتلاقيه راجعلك و معاه ورد و يصالحك…
‘ يصالحني ليه و انا اللي غلطانة ؟ أنا جر*حته… هو عمل كده بسببي و انا مقدرش ألومه… عنده حق…
* هرجع لنفس النقطة و اقولك هيثم بيحبك… اعمليله أكله بيحبها و هيتصالح على طول…
‘ ياريت لو الحوار بالبساطة دي… ( نزلت دمعة من عيناها و اكملت ) أنا خسرت هيثم !!
نظرت سلمى لها بحزن و اخذتها في حضنها… عانقتها رنا و زاد بكائها و سلمى تحاول تهدئتها
بعد قليل رجعت رنا لغرفتها بعد ان نظفها أحد الخدم… جلست على الكنبة… امسكت هاتفها اتصلت عليه و لم يرد… فتحت شات الواتس و رأت الرسائل و قالت بصوت مك*سور
‘ صدقني يا هيثم… انا مكتبتش الرسايل دي… مقصدش اجر*حك… ارجوك متسبنيش…
قفلت الهاتف و نظرت للسقف و تذكرت كلامه
” انتي علمتيني النهاردة درس مهم… هو إني ابطل احبك… إني ابطل اكون عبيط و اشيلك من قلبي… انتي وحشة جدا يا رنا… و قلبك مشو*ه و متستاهليش حبي ليكي… ولا تستاهلي اني ابصلك اصلا ” قسمًا بالله… من الدقيقة دي لغاية ما امو*ت… مش هقربلك ولا هلمسك !!
زاد بكائها و سندت رأسها للخلف و قالت
‘ يارب لا… انا ما صدقت لقيت حد بيحبني بجد… هو كمان بِعِد عني… ليه مبقاش عايشة حياة بسيطة و مستقرة زي أي حد… مطلبتش كتير والله… طلبت مجرد تعويض عن كل اللي حصلي من 4 سنين… كل ده حصل بسببي… بس مينفعش اخليه يقربلي من غير ما يعرف الحقيقة… مكنتش عايزة اخدعه عشان كده بعدته عني… بس انا زودتها… انا جر*حته !!
تاني يوم….
صحي هيثم… قام دخل الحمام… غسل وشه و خرج… لقي كارما في المطبخ… اول ما شافته ابتسمت و قالت
* هتفطر دلوقتي صح ؟
” ماشي…
* عشر دقايق بس و اكون خلصت…
ابتسملها ابتسامة خفيفة و رجع قعد في الصالة… بعد شوية جابت الفطار و حطته قدامه…
* يلا بالهناء و الشفاء…
بدأ ياكل و مكنش بيتكلم و هي لاحظت كده… اخدت معلقة من الكراميل و اكلته بنفسها…
” كارما انتي عارفة مبحبش حركات العيال دي… بعرف أكل لوحدي…
* شيفاك مش بتاكل كويس فقولت أكلك بنفسي…
” لا متتعبيش نفسك…
* ماشي زي ما تحب… رايح الشركة ؟
” اه…
حطت ايدها على جبينه و قالت
* أنت شكلك مصدع… تحب اعملك حاجة للصداع ؟
” لا…
قالها بلامبالاه و كمل أكل…
استيقظت رنا و هي لم تنم اساسا بل غفوت لا اكثر… لم تجد هيثم بالغرفة… لقد نام بالخارج… ألهذا الحد سيبتعد عنها ؟ تنهدت بحزن و دخلت الحمام غسلت وجهها… خرجت و رنت عليه…
كان هيثم في سيارته يقود ليذهب لشركته… رن هاتفه و كانت رنا… تنهدت بضيق و لم يرد و لكنها اتصلت مجددا… زهق من صوت الهاتف ف قفله
* الرقم الذي تطلبه غير متاح حاليا *
‘ يعني هو شافني بتصل راح قفل تليفونه !! اوووف… طيب هترجع امتى ؟ انا لازم اتكلم معاك…
* لا كده ظلم… يعني ايه عشان استثمر من شركتك يبقا ادفع 200 مليون ؟ ده غير ال 100 مليون التانين اللي هدفعهم في الشهر العقاري !!
” ده اللي عندي… مش عاجبك خلاص الباب اهو… افتحه و امشي…
* يا هيثم…
” اسمي مستر هيثم عاصم… هتصاحبني ههزقك…
* طب يا مستر هيثم… المبلغ كبير و كمان انت عايزه كاش…
” يعني أنت جاي تستثمر في أكبر شركة تصدير بترول على المستوى العربي و الأجنبي… و تقولي المبلغ كبير ؟ عيب عليك برضو… مش اد اللعب متلعبش… بسيطة اهو…
* طب ينفع ادفع 100 مليون للشهر العقاري و حضرتك تصبر عليا حبة كده ؟
” يعني الشهر العقاري ياخد فلوسه و ينام مرتاح… و أنا استنى ؟! ده حتى عيب في حقي و في اسم شركتي… ده كفاية إن شركتك هترفع و تظهر بسببي و تقولي اصبر على الفلوس؟…. حبيبي مش معاك فلوس يبقى متجيليش و تصدعني…
* اديني شهر بس…
” لو كنت قولت اديني اسبوعين مكنتش هوافق… قولت شهر فطبيعي مش هوافق… لما يكون معاك فلوس تعالى… لكن مش معاك يبقا تمشي… يعني بالعقل كده… أنا اشتغل في عقد و بنود و اعمل كوم اتصلات لاوروبا و ناس مهمة و موظفيني يشتغلوا زي النار عشان شركتك ده غير السفن اللي هتتحرك… كل ده ببلاش ؟!
* مش بقول ببلاش انا بقول اصبر عليا…
” طالما مفيش فلوس… مفيش شغل يا شريف…
* يا مستر هيثم…
” مقابلتك ليا خلصت… اللي بعده…
بصله شريف بغضب و خرج… هيثم حط رجله على المكتب و ولع سيجارة…
” يا ولاد الك*لب… كله عايز يعمل مشاريع بإسم شركتي و على قفا موظفيني و كمان ميدفعوش ! ده الناس بقية بج*حة صحيح…
دخل قاسم و قال وهو بيضحك
* طالما قاعد القعدة دي و شريف خرج متعصب كده يبقا اختلفتوا…
” حصل…
قالها وهو بيتبسم بشر و بيشد نفس من السيجارة… بص لجنبه اليمين و قال
” الناس بقية مستفزة… صح يا كيتي ؟
القطة نونوت و ركبت على رجله و قعدت على حجره و هو ملس عليها… قاسم قعد على الكنبة و قال
* قولي يا هيثم…
” ايه ؟
* هي مراتك مش بتغير من معاملتك للقطة ؟
الإبتسامة اختفت من وشه لما افتكرها…
* انا قولت حاجة غلط ؟
” احنا في مكان شغل… ف اقعد ساكت احسن…
* لا بجد مش بتغير… يعني انت بتحب القطة دي لدرجة انك بتجيبها هنا في الشركة و تقعدها في مكتبك…
” كيتي دي والله احسن من البني ادمين كتير اعرفهم… شايف كيوت ازاي…
* والله ليشوفك و انت ماسك سيجارة ب 100 دولار و قاعد قعدة الملوك دي و يشوف القطة وهي نايمة على رجلك يحصله error في دماغه…
” ملكش دعوة بكيتي…
* حاضر…
” بقولك ايه طالما انت فاضي كده و رايق… انزل هات علبتين تونة ل كيتي لاني نسيت افطرها… عايز بطنها تتنفخ زي البلونة…
* أنا عيوني لكيتي…
خرج قاسم هو و القطة و هيثم كمل شغله
دخلت كيتي المكتب و ركبت على الكرسي و قعدت تنونو كذا مرة وراء بعض
” كل ده عمله قاسم ؟ ده أنت ليك روقة… ده انا ههزقك
* والله ما عملت حاجة… اكلتها زي ما انت قولت…
” شربتها مية ؟
* نسيت…
” يا ك*لب… تعالى يا كيتي ( اخد كوباية بلاستيك و حط جواها مية ) اشربي يا نن عيوني…
* يارب صبرني…
” بتقول حاجة ؟
* لا والله…
ضحك هيثم… و قام قال
” طيب أنا همشي… لو فيه حاجة ابقا رن عليا…
* حاضر…
اخذ هيثم معطفه و خرج من الشركة… ركب سيارته و ذهب… لكنه لم يذهب للقصر بل ذهب لأحد الفنادق… دخل هيثم و توجه لموظفة الاستقبال
* اتفضل يا فندم…
” فيه نزيل هنا عندكم اسمه سيف محمد البارودي ؟
* آسفة يا فندم مينفعش اقول اي معلومة عن اي نزيل هنا في الفندق
نزع هيثم نظارته… نظر لها ببرود و قال
” و انا مش حد… جاوبي على سؤالي…
* والله يا فندم دي أوامر انا بنفذها مش اكتر
ضحك هيثم و وضع يده في جيبه… اخرج بطاقته و رفعها في وجهها
” قولتلك انا مش حد… انا هيثم عاصم البارودي… يعني تعملي اللي اقولك و مش تتناقشي معايا…
قالت البنت بتوتر
* استاذ هيثم نورت حضرتك…
” سيف محمد نزيل عندكم في الفندق ده ولا لا ؟
* لحظة اشوف في الأسماء…
وضع هيثم بطاقته في جيبه… نظر لها بحده و قال
” اسمه موجود ولا لا ؟
* موجود يا مستر هيثم…
” الأوضة رقم كام ؟
* الأوضة رقم 47… الدور السادس
توجه هيثم للاسانسير… دخله و ضغط على زازر الدور المطلوب… فتح باب الاسانسير و مشى حتى وصل للغرفة… جمع هيثم قضبته بغضب و طرق على الباب… فتح سيف و تفاجىء عندما رأى هيثم امامه… دفعه هيثم للداخل و دخل و اقفل الباب ورائه…
• انت رجعت امتى ؟
” يا بجاحتك… قاعد في فندق غالي و كمان بفلوسي…
• فلوسك ايه دي… دي فلوس ابويا يعني فلوسي
ضحك هيثم بسخرية و قال
” انا فاكر كويس اني قولتلك ان من اول ما ابوك كتب اسهمه و كل ثروته بإسمي انا… قولتلك فلوس ابوك في الحفظ و الصون و لحد الان محطتش ايدي فيها او اخدت منها جنيه حتى… يعني الفلوس اللي في الڤيزا بتاعتك دي فلوسي انا اللي بكسبها من الشركة… الفلوس اللي قاعد فيها في الفندق الفخم ده بتاعتي أنا…
• همشي و مش عايز حاجة منك…
” المفروض اقولك لا متمشيش و اترجاك عشان تقعد ؟ طيب امشي اهو…
اخذ سيف الجاكت بتاعه و لسه هيفتح الباب… هيثم مسك ايده و قال
” بس يكون في علمك… الڤيزا بتاعتك وقفتها… الخزنة بتاعتك اللي في البنك… اخدتها و ضميتها لخزنتي… يعني انت مش معاك ربع جنيه حتى
• ليه عملت كده ؟
” شكلك نسيت اني المتحكم في كل حاجة… مجرد اتصال واحد و خليتك على الحديدة…
• هتستفاد ايه يعني ؟
” بعتني ل دانيل أدريان ليه ؟ و عشان ايه ؟
• عشان بكر*هك…
” اسمها غيران مني يا ابن عمي… طالما الغيرة مولعة جواك كده من ناحيتي… مجتش ليه الشركة من زمان و اشتغلت في مِلك ابوك ؟ تعرف يا سيف… انت لما دخلت الشركة عشان تساعد دانيل… ايقنت انك فعلا غبي و مش بتفكر بدماغك… بتفكر بحاجة تانية انا مكسوف اقولها الصراحة…
• هيثم احترم نفسك !!
” و انت متحترمتش نفسك ليه ؟ روحت بعتني ل دانيل عشان تنتقم مني… ده على لما الشركة تفلس او يتحجز عليها… انا الوحيد كده اللي هتضر ؟ نسيت ان اسهم و املاك ابويا معايا ؟ يعني لو دانيل نجح في خطته انا و انت كنا هنغو*ر في دا*هية يا ذكي…
• اخلص و قول… عايز ايه يا هيثم ؟
” مش انا اللي عايز… انت عايز ايه مني بالضبط ؟
• هيثم اطلع بره…
” هم كلمتين… ابعد عني و اتقي شَري يا سيف ( طلع ورقه من جيبه و اكمل ) و عشان تبعد خُد اهو… عقد ملكية 50% من اسهم الشركة… ال 25 فرع بتوع ابوك نقلتهم بإسمك هم و الأملاك… خدهم اهو عشان ترتاح… مليش دعوة بيك ولا بيهم من اللحظة دي… عايز تبيعهم… تو*لع فيهم… انت حر… بس قسمًا عظمًا لو قربلتي او قربت على شركتي… ساعتها هسجنك… و هعملها عادي… زي ما انت بعتني بسهولة كده انا هسجنك…
رمى الورقة في وشه… عدل الجاكت بتاعه و قال
” حاجة اخيرة… عايز تيجي تعيش في القصر… تعالى عادي مش همانع لان القصر ده مش بتاعي لوحدي… مش عايز تيجي براحتك… بس متحتكش بيا ولا ليك اي علاقة بيا جوه القصر او براه و اعتبرني ميت… و شيل عيونك الو*سخة دي عن مراتي… عشان مهما عملت مش هخليك تاخدها…
ارتدى هيثم نظارته و خرج… سيف امسك الورقة و وجده بالفعل نقل له كل الأملاك بإسمه… و لكن لم يفرح… بل شعر بالحزن !!
في الليل… عاد هيثم للقصر… رأته رنا من الشرفة… ابتسمت و مسحت دموعها… دخلت الغرفة و في نفس اللحظة هو دخل…
‘ هيثم…
قالتها رنا بصوت مبوح من كثيرة البكاء… لم يبالي هيثم و دخل الحمام يستحم… جلست رنا و انتظرته حتى خرج…
‘ هيثم عايزة اتكلم معاك…
لم يرد عليها و ذهب للسرير اخذ وسادة و وضعها على الكنبة
‘ هيثم…
” ابعدي عني يا رنا… مش انتي عيزاني ابعد عنك ؟ اهو بعدت… يبقى تبعدي انتي كمان…
‘ ارجوك اهدى و اسمعني… في سوء تفاهم والله… خليني اوضحه…
وقف هيثم قصادها و قال بلامبالاه
” وضحي…
‘ انا مكتبتش الرسايل دي… ولا وعدتك بحاجة و بعد كده رجعت في كلامي زي ما انت مفكر… انا معرفش الرسايل دي جات ازاي في تليفوني… صدقني !
” اصدقك على أساس ايه بالضبط ؟
‘ انا مش بكذب والله…
” ولو نفترض انك صح مع ان ده محصلش يعني بس اهو نفترض و خلاص… خايفة ليه اني اقربلك ؟
‘ خايفة ازاي ؟
” خايفة اني المسك… في كل مرة حاولت فيها معاكي بعدتيني و بتديني اسباب لا تدخل العقل اصلا بس كنت بجاريكي في الكلام و خلاص… و اقول عادي متوترة مش أكتر… بس رد فعلك الاخير ده مكنش عادي… يلا وضحي…
ظلت صامتة بعض الوقت… ضحك هيثم بسخرية و قال
” ما توضحي… مش هو مجرد سوء تفاهم… وضحي يلا سوء التفاهم ده…
‘ مينفعش اقول…
” ليه ؟
‘ لو قولت هتبعد عني…
” من غير ما تقولي انا بعدت اصلا… ولا انتي نسيتي القسم اللي اقسمته ؟
نظرت له بحزن و تريد ان تبوح بكل ما بداخلها لكن لن تقدر على فعل ذلك…
” أنا اتجوزتك عشان مصلحة شركتي مش اكتر… مش هنكر إني حبيتك فعلا عشان كده مرضيتش نطلق و كملت معاكي… بصي يا رنا… الحياة تجارب… و انتي اول تجربة جواز ليا… كانت تجربة فاشلة بمعني الكلمة…
‘ جوازنا تجربة فاشلة !!
قالتها رنا بصدمة و الدموع متجمعة داخل عيناها…
” اه تجربة فاشلة… مالك متفاجئة ليه ؟
‘ بس انا بحبك يا هيثم…
” و انا بطلت احبك…
نزلت عليها تلك الجملة كالصاعقة… لم تستطع امساك دموعها اكثر من ذلك…
‘ يعني بطلت تحبني ؟
” يعني مش عايز حاجة منك ولا عايز نحب بعض…
‘ انت اناني على فكرة… مش عشان موافقتك تلمسني تتخلى عني بالسهولة دي…
” ايوة أنا اناني و بجري وراء شهو*اتي… ف بما اني بجري وراء شهو*اتي ف مش ألمسك… اي وحدة تتمنى اللي انتي رفضتيه ده… يلا روحي نامي و بطلي كلام عشان انا مصدع… و صح… كارما بتسلم عليكي…
‘ كارما !! انت امبارح كنت بايت عندها ؟!!
” اها… على فكرة… حضنها دافي اكتر من حضنك…
حست بصوت داخلها… انه قلبها قد كُ*سر… مسحت دموعها بكُم البلوڤر و قالت
‘ انت كده بتخالف الشروط… انا قولتلك قبل ما نتجوز اي بنت تعرفها تتقطع علاقتك بيها… و انت روحت نمت عندها امبارح…
” تصحيح بسيط… انا نمت معاها مش نمت عندها… اما حوار الشروط فكك منه… مش انا هيثم عاصم اللي يتحطله شروط
‘ انت كده بتخو*ني !!
تقدم منها و هي رجعت للوراء حتى وصلت للجدار… حاوطها بجسده و قال بإبتسامة مستفزة
” هيهمك يعني لو خو*نتك ؟
‘ اه هيهمني… لاني حبيتك بجد
” طالما حبتيني… مخلتنيش ليه اقرب منك ؟
‘ هيثم… والله العظيم مش انا اللي بعتلك الرسايل دي
” فكك من الرسايل… انا بتكلم على طريقة رفضك ليا… ليه رفضاني بالشكل ده ؟ متقوليش خايفة و متوترة… دي كلها حجج ملهاش اي تلاتين لازمة… ايه سبب رفضك ليا لدرجة انك مديتي ايدك عليا و بعدتي عني فورًا… ده اكيد وراه سبب كبير… في حاجة انتي مخبياها عليا ؟
‘ زي ايه ؟
ازاح شعرها للخلف و همس في اذنها
” مثلا… حد لمسك قبل كده
‘ ايه اللي انت بتقوله ده !!
” ما هو ده تفسير على كل اللي عملتيه… ولا انتي بتحافظي على نفسك عشان حد معين عايزة تروحيله… ف قولتي اتجوز هيثم و اقنعه اني بحبه و اخرج من وراه بقرشين…
‘ أنت ك*سرت قلبي بعد التفكير اللي بتفكر بيه عني ده… انا لو متجوزاك عشان فلوسك مكنتش هخليك تمسك ايدي حتى… هيثم فوق لنفسك و اعرف انت بتقول ايه و لمين…
” يبقى ايه سبب رفضك ليا ؟
‘ مقدرش اقول…
” سكوتك ده بيخليني افكر في حاجات اسوأ من اللي سمعتيه ده… قولي فيه ايه و وضحيلي كل حاجة…
نظرت للارض و ظلت صامتة… نفخ هيثم بضيق و قال بغضب
” امشي من قدامي لاني طايقك… مش عايز اشوف وشك طول ما انا موجود هنا…
نظرت له بحزن ولا تصدق ما قاله لها… تركها و استلقى على الكنبة بكل براحة… وقفت في نص الغرفة تنظر اليه و الدموع لا تتوقف من النزول و تحاول ان تجعل قلبها يستوعب كل كلمة قالها وهو قاصد ان يجر*حها… لم تستطع الجلوس معه بنفس الغرفة و تنفس نفس الاكسجين… شعرت ان قلبها يضيق بها و نبضات قلبها تقل… خرجت لشرفة الغرفة لتتنفس و تخرج ما في قلبها من حزن…
ضمت نفسها بيداها الاثنتين و تنظر في اللاشيء و دموعها تتساقط على وجهها…
كانت ريم في المطبخ تعد لنفسها مشروب ساخن… اعدته و اخذت بعض الحلوى و كيس شيبسي و ذهبت لغرفتها…
– والله نفسي اتفتحت على الاخر كده بعد ما شوفت هيثم مش طايقها و عايز يقت*لها… الغلبانة متعرفش ان هيثم اكتر حاجة بيكر*ها في حياته إن وحدة ترفضه… حطيتها في وش المدفع كده… زي ما عجبتك حنية هيثم… استحملي قسو*ته و وشه التاني يا بيبي…
دخلت شُرفة غرفتها و وضعت الهاند فري في اذنها و بدأت تأكل و تسمع الاغاني و مستمتعة بعد ان شتت علاقة هيثم ب رنا… نظرت إلى شرفة غرفة هيثم… وجدت رنا جالسة على الأرض تضم نفسها و تبكي… ارتسمت ابتسامة شماتة على شفتاها… دخلت غرفتها و ظلت ترقص فرحًا ان خطتها نجحت… بعد ان تعبت من الرقص ألقت نفسها على السرير
– تستاهلي… مش وحدة خدا*مة زيك تبقي مراته… خليه يعرفك مقامك كويس لغاية ما تمشي من هنا… ولا اقولك… انا هخليكي تمشي من القصر ده مش قادرة ترفعي رأسك عن الأرض…
وضعت ريم يدها في جيبها و اخذت الورقة التي فيه… فتحتها و امسكت بهاتفها… نقلت الرقم المكتوب داخل الورقة الى هاتفها و اتصلت عليه
– ألو… استاذ أحمد معايا ؟
• اه أنا… حضرتك مين ؟
– مش مهم تعرف انا مين… اخت حضرتك… رنا مصطفى… مش اسمها كده صح ؟
• انتي تعرفيها ؟! تعرفي مكانها ؟!
– اه اعرف مكانها…
• هاتي العنوان بسرعة…
– طيب استنى بس… احنا نتفق اتفاق صغير…
• اتفاق ايه ؟ بقولك قوليلي مكانها بسرعة…
– اسمعني الاول… هقولك مكانها… بس بعد ما اقولك… تنسى الرقم ده خاالص… ولا كأني اتصلت عليك ولا كلمتك حتى…
• تمان موافق و مش هقول لحد… هااا هي فين ؟
– هقفل دلوقتي و ابعتلك اللوكيشين… باي
اغلقت المكالمة و أرسلت له عنوان القصر في رسالة و رآها في الحال… ابتسمت ريم بشَر و قالت
– خليه يجي ياخدك و يرجعك الزبا*لة اللي جيتي منها…
تاني يوم…..
* هيثم ؟
” نعم يا امي…
* فين رنا ؟ منزلتش ليه تفطر معانا ؟
صمت قليلا ولا يعرف ماذا يقول…
* خلاص اهي نزلت…
نظر لها رآها تأتي و تسحب كُرسي و تجلس عليه… سلمى لاحظت ان رنا مازالت حزينة و الحزن واضح على وجهها… حتى ابتسامتها المعتادة اختفت… لم ينظر هيثم لها ولا يعيرها اي اهتمام و كأنها ليست موجودة… نسرين لاحظت ذلك و قالت
* مالكم يا أولاد ؟ فيه حاجة ؟
نظرت رنا لهيثم الذي لم ينظر إليها حتى و يأكل و كأن لا يوجد شىء
* رنا حبيبتي… شكلك تعبانة… في ايه مالك ؟
نظر هيثم ببرود ينتظر اجابتها مثل الباقي… قالت رنا و هي تحاول تظهر انها طبيعية
‘ لا مفيش حاجة… نسيت البلكونة مفتوحة ف اخدت شوية برد مش اكتر… انا تمام…
– اجبلك دواء للبرد ؟
قالت ذلك ريم و هي مبتسمة… لاحظت سلمى ان هناك شيء ما… فهذه أول مرة تتحدث مع رنا بدون ان تكون غاضبة مثل العادة…
‘ لا مش عايزة دواء… هشرب حاجة سخنة و هبقى تمام…
– اشربي زنجبيل… حلو اوي لنزلات البرد…
‘ تمام
* ما شاء الله يا ريم… وشك منور اوي النهاردة…
قالت ذلك سلمى… نظرت لها ريم و هي على نفس الإبتسامة و قالت
– عملت شوية ماسكات للوش… تحفة أوي… هديكي الطريقة يا سلمى متقلقيش…
* اديني و ماله…
رن جرس القصر… كانت سلمى ستقوم و تفتح لكن اوقفها هيثم و قال
” قومي يا رنا افتحي…
نظرت له رنا لوهلة و هو غير مهتم بنظراتها… لم تتكلم و ذهبت فتحت الباب… تسمرت مكانها عندما رأته و الخوف تسلل الى قلبها… أنه أخاها !!
نظر لها بغضب و امسكها من شعرها و قال بغضب و بصوت عالي
• يا بنت ال ******… بقا انا قالب عليكي الدنيا و في الآخر تطلعي قاعدة هنا !!
سمعوا جميعهم صوته العالي و قاموا بما فيهم هيثم… هيثم عندما رآه يشدها من شعرها و يشت*مها و هي تتأ*لم… غضب كثيرا و عروق يده برزت… جمع قبضته بغضب و ضر*به بالبوكس في وجهه… رجع احمد للوراء و رنا فلتت منه و اختبأت في ظهر هيثم… هيثم امسك احمد من قميصه و دفعه للجدار بقوة و قال بغضب
” ازاي تجيلك الجراءة تمد ايدك عليها !!
• انت مين ؟
” انت اللي مين و جاي هنا ليه ؟
• انا اخوها…
تعجبوا كلهم و قالت ريم بمثيل التفاجىء
– اخوها ازاي… رنا قالت ان اهلها متوفيين و معندهاش اخوات !!
• بتتبري من عيلتك يا و*سخة…. والله لوريكي…
” كلامك يبقى معايا انا مش معاها هي…
• و انت تبقى مين بقا عشان اتكلم معاك ؟
” أنا جوزها…
ضحك احمد بهستيرية لدرجة ان عيناه دمعت…
• جوزها !! ( نظر الى رنا و اكمل ) و ده بقا اتجوزتيه بالبطاقة الحقيقية ولا المز*وة يا حبيبة اخوكي…
” بقولك كلمني انا… انت جاي هنا ليه ؟
• انا مجرد انسان عادي على باب الله جاي اخدها و كفاية مصايب لحد كده… و معرفش ان الهانم ضحكت عليك انت كمان و خلاتك تعيشها في العِز ده كله… بجد انت غلبان أوي…
” قصدك ايه ؟
• اختي اللي انا بتكسف اقول عليها اختي… بتضحك على الرجالة… و للأسف ضحكت عليك انت كمان… و جاي اخدها عشان الحقك قبل ما تضرك زي ما عملت مع الأول…
” أول ايه ؟
• هي كمان مقالتش ليك انها كانت متجوزة قبل كده ؟
اتصدم هيثم و نظر لها… ضغطت رنا على يدها و نظرت للارض و دموعها تتساقط… قال هيثم موجه كلامه لها
” الكلام ده حقيقي ؟
• ايوة حقيقي… كانت متجوزة قبل كده… بس كان غلبان و مش مقتدر ماديًا زيك كده… و هي كان نفسها في واحد يرمي الفلوس عليها رمي كده زي الرز… ف خا*نته و لما عرف راحت هربت منه و بعتلي ورقة طلاقها… و بقالها 4 سنين هربانة و زو*رت البطاقة اللي انت اتجوزتها بيها و غيرت هويتها الحقيقية !!
يتبع….
14=رواية عشق مختلف الحلقة الرابعة عشر
• هي كمان مقالتش ليك انها كانت متجوزة قبل كده ؟
اتصدم هيثم و نظر لها… ضغطت رنا على يدها و نظرت للارض و دموعها تتساقط… قال هيثم موجه كلامه لها
” الكلام ده حقيقي ؟
• ايوة حقيقي… كانت متجوزة قبل كده… بس كان غلبان و مش مقتدر ماديًا زيك كده… و هي كان نفسها في واحد يرمي الفلوس عليها رمي كده زي الرز… ف خا*نته و لما عرف راحت هربت منه و بعتلي ورقة طلاقها… و بقالها 4 سنين هربانة و زو*رت البطاقة اللي انت اتجوزتها بيها و غيرت هويتها الحقيقية !!
تفاجئوا كلهم و نظروا إليها… رنا لم تتكلم و كانت تبكي فقط
” الكلام اللي قاله ده صح ؟
قالها هيثم و هو ينتظر منها ان تكذب كل ما قاله احمد لكي يوقفه عن حده و لكن ظلت صامتة
• مش هتقدر تتكلم طبعا بعد ما كلكم عرفتوا حقيقتها الو*سخة… جبتي العا*ر ل عليتنا و هربتي مني كتير بس المرة دي مش هتهربي و هقت*لك و هنضف اسم العيلة اللي و*سختيه بقذا*رتك…
غضب هيثم كثيرا و أكال عليه بلكمة اخرى اوقعته أرضًا
” قولتلك طالما انا بتكلم انت متفتحش بوقك بكلمة !!
قال ذلك ثم نادى على الأمن و جاؤوا اخذوه… نظر هيثم الى رنا التي لم تتحرك من مكانها و عيناها في الأرض…
” الكلام اللي قاله ده صح ؟ انتي كنتي متجوزة قبل كده ؟
سقطت دمعة من عيناها و اومأت إيجابًا… مسح هيثم وجهه بيده و يحاول يستوعب ذلك… كيف لم تقل ليه ؟
” هربتي من عيلتك 4 سنين فعلا و البطاقة بتاعتك اللي معاكي مز*وة ؟
حركت رأسها إيجابًا لتأكد ذلك امامهم جميعًا… احمرت عينا هيثم من الغضب و حاول تمالك نفسه امام والدته التي لم تحتمل ذلك الحديث و توجهت لغرفتها و هي حزينة… تقدمت سلمى من رنا و قالت بعدم تصديق
* ازاي متكلمتيش و خبيتي كل ده ؟ و ليه عملتي كده ؟
لم ترفع رنا عيناها من الأرض و ظلت على ذلك
قالت ريم بحزن
– متجوزة قبل كده و خو*نتيه و هربتي من عيلتك 4 سنين ! لا كده غلط أوي يا رنا… انتي ملقتيش حد يربيكي ولا ايه ؟
نظرت لها رنا بصدمة… كأن كل الذي قيل لها ليس بشيء أمام جملتها… جمعت رنا قبضتها بغضب و تقدمت منها… ريم كانت تبتسم بشماتة عليها… و سرعان ما صفعتها رنا بالقلم على وجهها و قالت
‘ انا متربية غصب عنك يا ريم… انتي مين عشان تقولي عليا كده بالبجا*حة دي ؟
تفاجئت ريم و احست ان كبريائها قد سقط منها… احمرت عيناها و تقدمت منها لترد القلم لكن رنا امسكت يدها و قالت
‘ انا اضر*بك و امسح بيكي الأرض أما انتي لا… متقدريش اصلا تعمليها… يا بت انا اصلا تربية شوارع… وشك اللي فرحانة بيه ده اقدر اشوهولك في دقيقة وحدة…
دفعتها رنا بقوة حتى وقعت على الأرض و أشارت لها بإصبعها و قالت بتحذير
‘ اياكي ثم اياكي تجربي تاني تتطاولي على اخلاقي اللي هي اصلا احسن من اخلاقك…
اتصدمت ريم من جراءاتها تلك و خافت منها ف بكت و قالت ل هيثم
– شايف مراتك عملت فيا !! بتمد ايدها عليا و عاملة فيها شريفة و هي أساسا مدوراها مع الرجالة…
” ريم اخرسي !!
قالها هيثم بزعم و غضب… سكتت ريم… نظرت رنا ل هيثم و لم تتكلم و ذهبت لغرفتها… ذهب ورائها هيثم و اقفل الباب عليهم
” اللي جه ده فعلا يبقى اخوكي ؟
‘ اه اخويا…
” و الكلام اللي قاله ده فعلا صح ؟
‘ ايوة صح…
” طالما الكلام ده صح فأنا مش مستغرب بجا*حتك في الرد عليا بالطريقة دي… و بحاول على اد ما اقدر ابقا هادي و مسيطر على أعصابي بالعافية…
‘ لو مسيطرتش على اعصابك يعني هتعمل ايه ؟ هتضر*بني ؟ مش هستغرب طبعا… كلكم كده وحشين…
” خونتي جوزك السابق فعلا ؟
‘ ايوة خو*نته… هيهمك يعني ؟
” اه هيمهني… لاني حبيتك…
‘ حبتني اه ! لا بجد ضحكتني يا هيثم… حب ايه ده بالظبط ؟ انت لسه من يوم كنت عند كارما… نمت معاها… خو*نتني معاها… مهمكش انا هحس بإيه لما اعرف كده ؟
” مش انتي اللي تتكلمي على الخيا*نة… بصي لنفسك الأول و بعد كده تعالي حاسبيني…
‘ مين قالك اني بحاسبك ؟ هيثم انت خو*نتني في أول مشكلة حصلت ما بينا… سيبتني لوحدي و روحت لوحدة غيري… كل ده عشان موافقتش اكون خاضعة لرغباتك القذ*رة…
ضحك بسخرية و قال
” شوف مين اللي بتتكلم على القذا*رة و هي عاملة مصايب… و انتي اصلا مخضعتيش ليا عشان خوفتي اكشف انك مش بنت و وحدة وحدة اعرف كل اللي مخبياه ده… طول الفترة دي انتي خدعتيني و كذبتي عليا طول الفترة اللي فاتت دي…
‘ حصل انت صح… انا خدعتك و كذبت عليك و خو*نت جوزي السابق و لما عرف روحت هربت من اهلي… حلو كده يا هيثم ولا عايز حاجة تاني ؟
” انتي ازاي بتتكلمي كده بدون ذرة خجل حتى…
‘ ما انا فا*جرة بقا… هتكلم ازاي يعني…
” مش مصدق ان انتي دي…
‘ ولا انا مش مصدقة ان انت ده… انت وحش يا هيثم و بتتعمد تظهرلي الاوحش…
” على أساس انتي ملاك يعني !!
‘ على الأقل ما خو*نتكش ولا بصيت لواحد غيرك من أول ما اتجوزتك… امبارح قولت كلام ليا تعمدت تقوله عشان تجر*حني… تعرف انا حسيت بإيه ؟ حسيت ب اد ايه انا غبية لاني حبيت واحد زيك… قولت عليا اني قلبي مشو*ه… و صدقت في كده… فعلا قلبي مشو*ه… اتشو*ه بسببك و بسبب افعال غيرك… و قولت كمان اني مستاهلش انك تبصلي… عندك حق برضو… لاني مش ضمن العا*هرات اللي انت تعرفهم عشان تبصلي… انت محبتنيش يا هيثم… انت كنت عايز تاخد مني نفس الغرض اللي اخدته من البنات اللي تعرفهم… و لما موافقتش اخضعلك ورتني وشك التاني…
الوش الحقيقي اللي انت خبيته عني طول فترة جوازنا… غبية انا صح ؟ رغم اللي مريت بيه في حياتي بقبلي الساذج ده صدقتك و صدقت انك بتحبني… يمكن عشان انت أول واحد تقولي كلمة حلوة و تمدحني… بس كل كلمة حلوة قولتها ليا قصادها قولت كلام أكتر جر*حني… امبارح كنت انت نايم هنا بكل أريحية و انا قاعدة في البلكونة حاسة ان روحي كانت هتتسحب من جسمي من كُتر الضغط و الصدمات اللي اخدتها… بس صدمتي فيك كانت اكبر صدمة…
كانت تتكلم و هي تبكي و شفتاها تتخبط ببعضهما من شدة البكاء… رجعت للوراء و قالت
‘ ارجوك كفاية لغاية كده… انا مش عايزة حاجة منك ولا من غيرك… مش عايزة حُب ولا عايزة فلوس ولا عايزة اي حاجة منك يا هيثم… ( أشارت لنفسها بيدها ) اللي عيزاه انا… اعيش مش اكتر… انا معملتش حاجة تستاهل اني اتقت*ل… معملمتش حاجة والله… حياتي مش لعبة ايدكم عشان تحكموا عليا بالموت… روحي دي بتاعتي انا… بتاعتي انا و بس… يعني مش بتاعت حد فيكم عشان تتحكموا فيا و تحكموا عليا اعيش ولا اموت… كان عندي امنية وحدة بس… هي اني اعيش حرة… مهما وقفتوا في وشي منعتوا حريتي انا مش هسكت… و سامعني بقولك ايه يا هيثم… انا مش هسكت… و انت دلوقتي وقفت ضدي و حكمت عليا اني خيا*نة على أساس ايه بالضبط… فين دليلك يا هيثم ؟
نظر لها هيثم بحزن و لاحظ حالتها تلك و يداها ترتعشان بطريقة ليست عادية
” رنا…
قالها و هو يتقدم منها… رجعت رنا للوراء و سحبت السك*ين من طبق الفاكهة و وجهتها في وجهه
‘ زي ما هربت منهم 4 سنين كاملين… ههرب منك انت كمان !!
” رنا اهدي و نزلي السك*ينة دي…
‘ لو قربت مني يا هيثم هقت*لك… بما انكم كلكم عايزين تقت*لوني… يبقا مش غلط لو قت*لت حد منكم… لو مبعدتش عني انت هتبقا الحد ده… ابعد عني احسنلك…
” اهدي يا رنا و اقعدي نتكلم…
‘ لا مش قاعدة ولا هقعد ثانية وحدة هنا… مش عايزة فلوسك يا هيثم… اوعى تكون مفكر اني اتجوزتك عشان فلوسك… انا مش عايزة حاجة منك…
نزعت العقد الذي على رقبتها الذي هو اشتراه لها… ألقته على الأرض و قالت
‘ مش عيزاه ولا عايزة غيره… مش الهدايا و الالماظ هي اللي هتعبر عن الحب… طلبت منك تكون ضهر استند عليه لكن انت بقيت اكبر عدو ليا… مش عايزة حاجة منك يا هيثم… هدومي اللي هي انت اشتريتها مش عايزة حاجة منهم… و هخرج من هنا زي ما دخلت…
” نزلي السك*ينة و اهدي
‘ متقوفش في طريقي… سيبني امشي
” مش هتمشي غير لما تحكيلي كل حاجة بالتفصيل… عايز اسمع منك انتي
‘ مفيش حاجة هتتغير لو سمعت… انا اتقفلت منك يا هيثم و مش طايقة اسمع صوتك حتى… و لو قعدت هنا دقيقة تانية انا همو*ت بجد… بعدين انت مش هيفرق معاك اذا مشيت او لا… كلها يوم و هتلاقي غيري…
” و انا مش عايز غيرك…
‘ كذب… كل كلامك كذب… يعني انت مش عايز غيري و امبارح روحت عندها… ده اللي هو ازاي بقا ؟! انا مش هصدقك تاني ولا هسمحلك تلعب بمشاعري تاني… انا طاقتي خلصت و زهقت… همشي و متوقفش في طريقي
تقدم منها هيثم و هي ازداد توترها… امسك يدها و لكن سرعان ما جر*حته بالسكين في يده… تأ*لم هيثم و تركت يده… فتحت باب الغرفة و ركضت للاسفل… ركض هيثم ورائها و ينادي عليها بصوت عالي سمعه كل شخص في القصر و كل خرجوا و رأوهم…
لم تهتم و نزلت للاسفل… وجدت سلمى في وجهها ف قال هيثم مشيرًا الى سلمى
” سلمى وقفيها… متخليهاش تمشي… اوعي تخليها تعدي السلم ده !!
* رنا في ايه ؟ ايه السك*ينة اللي في ايدك دي !!
‘ انا حبيتك يا سلمى و اعتبرتك صحبتي… و اختي… بس مش هسمحلك توقفي في طريقي…
وجهت السك*ين في وجهها ف رجعت سلمى للوراء خائفة
اكملت رنا طريقها و هيثم خلفها… نادى لرجال الأمن لكي يوقفوها و جاؤوا بسرعة منعوها من الخروج… وجهت رنا السك*ين في وجههم و قالت بذعر و هي تبكي
‘ متقربوش… اياكم حد يقرب مني…
جاء هيثم من خلفها و امسك يدها و اخذ السك*ين منها ألقاها على الأرض…
‘ سيب ايدي يا هيثم…
” اطلعي معايا لفوق…
‘ مش طالعة…
” اهدي بس و نتكلم فوق و نحل كل حاجة
‘ مفيش حاجة تتحل… سيبني في حالي…
” متنسيش انك لسه مراتي… يعني مفروض تسمعي كلامي… اطلعي معايا… كلهم بيبصوا علينا
‘ يعني انت خايف على منظركم قدامهم… لكن مخوفتش على منظري انا قدام نفسي و قدامهم بعد ما اقتنعوا بكلام احمد… هيثم متقلقش… سيبني همشي عشان معملش حاجة تخليك تحس بالخجل من حد ( نظرت للجميع و زاد بكائها ) و عشان مخليش حد يحس بالعا*ر من انه يعرفني…
قالت ذلك ثم سحبت يدها من يد هيثم… و بحركة سريعة اخذت المسد*س من جيب أحد رجال الأمن… وجههت المسد*س على رأسها و قالت و هي تصرخ وسط بكائها
‘ لو مبعدتوش عن الباب ده انا هقت*ل نفسي…
خاف هيثم جدا و تقدم منها ببطىء
” اهدي و نزلي المسد*س… محدش هيعملك حاجة
‘ مش هنزله… خلي رجالتك يبعدوا عن الباب ( شدت الزناد و اكملت ) والله هعملها !!
قلق هيثم منها خصوصًا انها تبدو في حالة سيئة و ليست طبيعية ولا تدرك ماذا تفعل… أشار رجاله بالابتعاد عن الباب و ابتعدوا… تقدمت رنا من الباب و بمجرد ان قدمها لامست الخارج… ركضت مسرعة… قال هيثم بتحذير
” هاتوها اوعى تمشي… اقفلوا بوابة القصر الرئيسية… اقفلوا اي باب ممكن تخرج منه
سمعوا كلامه و خرجوا ورائها… وقف هيثم مكانه يستوعب ماذا حدث الآن و ما تلك الحالة الغريبة التي ظهرت عليها…
كانت نسرين و سلمى موجودتان و رأتا كل ما حدث و كذلك ريم…
ابتسمت ريم و لكن اخفت ابتسامتها عندما نظرت لها سلمى بغضب… تقدمت ريم من هيثم و قالت بقلق و هي تمسك يده
– هيثم ايدك بتنز*ف !!
نظر هيثم ليده المليئة بالدم… فلم يلاحظ جر*حه ذلك و لكن لاحظ جر*حها هي…
– هيثم تعالى اربطلك ايدك…
” ريم… متحتكيش بيا… ولا تكلميني
– ليه يا هيثم ؟
” غلطتي فيها و انا سكت بس تستاهلي القلم اللي ادتهولك… لانك ما بتصدقي تلاقي حاجة عليها و تتكلمي… رنا مشيت او لا… هتفضلي انتي بعيدة برضو…
سحب يده من يدها و ذهب لغرفته… وقفت ريم غضبها يغلي بسبب كلامه… تقدمت منها سلمى و قالت تبتسم
* يا حرااام… اكيد كنتي مفكرة ان كل اللي حصل ده هيجي في صالحك انتي و تتقربي من هيثم ؟ انا فاكرة كويس اوي اني ان قولتلك قبل كده رنا مش عائق عشان تخلي هيثم يحبك… كنتي موجودة قدامه من و انتي طفلة… مبصش عليكي ليه ؟
نظرت لها ريم بغضب و ذهبت لغرفتها…
ربط هيثم يده بقطعة قماش… نزل للاسفل… خرج يبحث عنها
” لقيتوها ؟
* ملهاش اي أثر يا مستر هيثم…
” فلتت منكم برضو ؟! حسابكم بعدين…
ركب هيثم سيارته و انطلق…
كانت تجلس رنا صفة البحر و تحرك قدماها في المياة و شاردة و تتذكر كلام هيثم لها
” تصحيح بسيط… انا نمت معاها مش نمت عندها ”
” انتي قلبك مشو*ه ولا تستاهلي اني ابصلك اصلا ”
غضبت رنا و ألقت خاتم زواجهم في البحر و قالت بصوت مك*سور
‘ ايوة قلبي مشو*ه يا هيثم… مشو*ه لانه حَبك انت… مفروض كنت اخد اللي حصلي زمان درس قوي اني مسلمش قلبي لأي راجل… بس انا اول مرة احب حبيتك انت… يمكن ده مش حب اصلا و انا اوهمت نفسي بكده لان لأول مرة حد يقولي كلمة حلوة… انا فاقدة الحنان لدرجة اني افتكرت ان كلامه الحلو ليا ده حُب… و هو كان واخدني مجرد تسلية مش اكتر !!
وقفت رنا و ارتدت الكوتشي… وضعت يدها في جيبها لتجد 200 جنيه بداخله… ابتسمت ابتسامة ساخرة وسط دموعها التي تتساقط من عيناها
‘ على فكرة عادي جدا… هعرف ادبر حالي زي ما عملت زمان… و ال 200 جنيه من قليلة… هلاقي شغل و هرجع الشقة اللي كنت ساكنة فيها… مش هحتاج لهيثم او غيره…
وضعت النقود في جيبها و مسحت دموعها بكُم البلوڤر و ذهبت…
رجع هيثم للقصر في الليل بعد فشل محاولاته لإيجادها… كأنها تبخرت… ذهب لغرفته مباشرةً و اغلق الباب عليه… دخل الحمام و فتح المياة و يغسل وجهه مراراً و تكراراً… نظر لنفسه في المرآة و تذكر شىء حدث من قليل
” السلام عليكم…
* و عليكم السلام… اتفضل تؤمر بإيه حضرتك…
” التليفون ده… الشات ده مفبرك ؟
اخذ الرجل منه الهاتف و بعد تفحص و تمحيص قال
* الشات حقيقي بس التليفون عامًة كله متهكر
” ازاي ؟
* الشات حقيقي و التليفون متهكر ده معناه ان اللي هكر التليفون ده كتب الرسايل دي من تليفونه هو و ظهرت على التليفون ده عشان عرف يخترقه…
” تمام… شكرا لحضرتك
” قالت مليون مرة انها مش هي اللي كتبت الرسايل دي… قالت و انا مسمعتش ولا صدقتها حتى… صدقت نفسي و جيت عليها و جر*حتها… اهي مشيت… مشيت عشان ملقيتش زوج يقف في ضهرها و يحميها من الناس… لقيت زوج كان كل هدفه انه يمتلكها و يقضي معاها ليلة… و لما ما اخدش اللي هو عايزه هجرها و جر*حها… اقول ايه… انا طلعت وحش بجد…
خرج هيثم من الحمام… نظر لكل ركن في الغرفة… ملابسها… كل شيء خاص بها مازال موجوداً ما عدا هي !!
جلس على طرف السرير و نظر للجزء الذي تنام عليه دائما… فارغ تمامًا…
” كانت معايا بس انا ضيعتها بإيدي !
سند رأسه للخلف و تذكر كل كلامها
‘ امبارح قولت كلام ليا تعمدت تقوله عشان تجر*حني… تعرف انا حسيت بإيه ؟ حسيت ب اد ايه انا غبية لاني حبيت واحد زيك ‘
‘ غبية انا صح ؟ رغم اللي مريت بيه في حياتي بقبلي الساذج ده صدقتك و صدقت انك بتحبني ‘
‘ حياتي مش لعبة ايدكم عشان تحكموا عليا بالموت ‘
‘ انا معملتش حاجة تستاهل اني اتقت*ل… معملمتش حاجة والله ‘
‘ مش عايزة فلوسك يا هيثم… اوعى تكون مفكر اني اتجوزتك عشان فلوسك… انا مش عايزة حاجة منك ‘
‘ طلبت منك تكون ضهر استند عليه لكن انت بقيت اكبر عدو ليا ‘
تنهد هيثم بحزن
” طريقة كلامك و شكلك و انتي بتقولي كل ده واضح جدا انك اتظلمتي… اتظلمتي ظلم كبير لسه سايب ندبة في قلبك… 4 سنين عشتيهم لوحدك… يا ترى عنيتي اد فيهم… و هل لقيتي حد مدلك ايده عشان يساعدك ولا لا… انتي مخو*نتيش انتي اتعرضتي للخيا*نة… و انا بدل ما اعوضك عن كل ده ك*سرتك فوق ك*سرك… هربتي مني انا كمان… هربتي لانك مش هتقدري تواجهي نفسك اللي حصلك مرة تانية… بس انتي مقولتيش اي حاجة ليا… لو كنتي اتكلمتي قبل كده كان هيبقى احسن من كده… بس انا السبب… انا ضغطت عليكي… كان هيجي وقت و تقوليلي كل حاجة بنفسك… و انا بدل ما اخليكي تطمنيلي و تحكيلي… خليتك تخافي مني !
سقطت دمعة من عيناه و امسك وسادتها و احتضنها ليشعر بها…
فجأة دخلت سلمى غرفته دون ان تطرق الباب و قفلت الباب ورائها… اعتدل هيثم في جلسته و قال بتساؤل
” في ايه يا سلمى ؟ دخلتي الأوضة كده ليه ؟
* ريم…
” مالها ؟
* سمعتها بتكلم احمد اخو رنا… و كانت بتقوله ان رنا هربت من القصر ف اوصلها انت قبل ما يوصلها هيثم…
” انتي بتقولي ايه !!
يتبع…
تكملة الرواية من هناااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق
فضلا اترك تعليق من هنا