رواية شبة أنثى الفصل الاول والثاني والثالث والرابع والخامس بقلم حنان حسن

 رواية شبة أنثى الفصل الاول والثاني والثالث والرابع والخامس بقلم حنان حسن 

رواية شبة أنثى الفصل الاول والثاني والثالث والرابع والخامس بقلم حنان حسن 

الجزء الاول 

اصعب حاجة 

 انك تتفرج علي متع الدنيا.... ونعيمها

من خلال حد تاني 

بمعني... انك تبقي محروم من كل حاجة

 و تقعد تتفرج علي غيرك 

وهو...بياكل احسن اكل 

...ويشرب احلي شرب

..... ده غير انك بتشوف غيرك .. بيضحك... ويتمتع.. ويحب ..ويتحب...ويتزوج وبيخلف... 

وانت مش بتعمل حاجة اكتر من الفرجة

وكانك... اتفرض عليك انك تعيش مشاهد فقط

 تتفرج بس

علي الناس

 وهما بيستمتعوا... وبيتسطوا

زي دلوقتي مثلا... 

انا قاعدة ورا الستارة في المطبخ

 وانا بسمع

(  علي )خطيب

( يارا) اختي الصغيرة.....  

وهو قاعد معاها في الصالة 

و ماسك ايديها 

وبيسمعها  احلي كلام

وعمال بيقولها بحبك يا يارا...

بعشق التراب الي بتمشي عليه يا يارا

اصل ...علي... ويارا بيعيشوا اجمل قصة حب 

ربنا يسعدهم ويتمملهم بخير

شوفتوا الكلام خدني

 ونسيت اعرفكم بنفسي

قبل ما احكيلكم حكايتي

انا نعمة

عندي ٣١ سنة 

ولسة بنت بنوت

من قرية صغيرة في الفيوم

شكلي عادي

 لا حلوه اوي 

ولا وحشة اوي 

لكن البهدلة الي عيشتها في حياتي... والخدمة الي بخدمها ليل نهار ...

والملابس المبهدلة الي بلبسها..... 

 وقلة الاكل.... 

وقلة النوم ... 

مخلين شكلي( بشع) 

وعاملة زي المهطلة

وطبعا شكلي المبهدل ده 

كان احد الاسباب

 الي مخليه مفيش عرسان يتقدمولي.. لغاية دلوقتي  

ده بخلاف ..اني معنديش ام

 تبكي عليا

... وتخاف اني اعنس جنبها

وخصوصا ان مراة  ابويا

قصقصت ريش ابويا ...

واخدت الي وراه

 والي قدامة في جوازت بناتها الاتنين

 الي اتجوزوا 

ودلوقتي بسبب جوازة يارا

اجبرت  ابويا 

انه ياخد قرض...  

بضمان حتة البيت الي احنا فيه

 عشان تجهز يارا

يعني من الاخر 

لا في حد هيجهزني

 ولا عندي حد يبكي عليا اصلا

وعشان تعرفوا حكايتي 

بطريقة اوضح

انا هلخص لكم حكايتي 

 انا اتيتمت بدري من الام

فا امي الله يرحمها

ماتت وانا لسة طفلة صغيرة

وبعدها ابويا اتجوز من زوجتة دي 

واسمها (عواطف)

 ...الي انجبت له ثلاث بنات

غيري..

اتنين منهم اتجوزوا 

ويارا اتخطبت لعلي

 بعد قصة حب وهيتجوزوا قريب

وطبعا انا كنت بخدم الجميع

 وكنت بساعد معاهم

  في رص العزال بتاع كل بنت.. من اخواتي

 وكنت بتفرج علي جهازهم 

 واشارك في

افراحهم 

وكنت بشوفهم وهما بيفرحوا 

ولما كنت بصعب علي  ابويا 

وكان بيجي وقت ويتعاطف معايا... 

ويسالني...

 امتي بقي هتروحي بيتك انتي كمان

 يا نعمة؟

عشان اطمن عليكي؟

كانت مراة ابويا ترد  وتقولة...

لا بلاش تعشم نفسك يا مسعد بالعشم ده

لان  بنتك وحشة 

وعمرها ما هتتجوز

 ولا حد هيبصلها... 

اصلها طالعة 

هالهوطة...

لامها الله يرحمها

لما كنت بسمع كلامهم 

  كانت نفسي  بتتكسر

 لكن كنت بقول لنفسي

عندهم حق انا فعلا

 مش حلوه 

وكبرت في السن 

العرسان هيجوا علي ايه؟

واكتفيت اني اقعد واتفرج من بعيد

 علي الي بيفرح ...

والي بيتخطب 

والي عايش وبيستمتع بالدنيا

يعني مثلا 

 النهاردة علي خطيب يارا عندنا ...

وشايفة  يارا وهي بتتبغدد عليه...

 بالرغم من ان علي جايبلها احلي شبكة...

 واحلي شقة 

وبيجيبلها كل شوية هدية

اصلهم خلاص قربوا يدخلوا

فا بالرغم من ان  يارا اصغر مني

 بعشر سنين

الا انها اتخطبت وقربت تتجوز

 وانا لسة محدش بص في وشي

 ولا حد اتقدملي لغاية دلوقتي 

المهم انا طبعا فقدت الامل

وغصب عني

 كنت بنظر ناحية علي ويارا

 من خلف الستارة وسرحت 

ومرة واحدة 

سمعت مراة ابويا 

وهي بتصرخ فيا 

وبتضربني بشبشبها كا العادة

وبتقولي

ايه يا بت يا نعمة؟

 انتي قاعدة تتصنتي علي يارا وعريسها

 ولا ايه؟

قلت...لا والله يا مراة ابويا 

انا بس كنت عايزه انادي ليارا

 عشان اسالها

 اعمل ايه لعلي عشان يشربة؟

وطبعا كلامي مدخلش دماغ مراة ابويا

واخدتني علي غرفة البنات 

وقفلت عليا باب الاوضة

ومسكت المنفضة

ونزلت بيها عليا

وانا فضلت اصرخ

لكن هي مرحمتنيش

 وفضلت تضرب فيا وهي بتقولي..

 انتي عينك وحشة 

...وعايزة تحسدي البت

واستمرت في الضرب بقسوة

وزرقتلي جسمي

لغاية ما ابويا دخل

 من بره علي صوتها

وصراخها

وسالها

في ايه يا عواطف

مالك باابت اليتيمة

 تاني؟

اصل ابويا راجل كبير وصحتة علي ادة

ردت مراة ابويا

قائلة..

بقولك ايه يا مسعد 

بنتك عينها وحشة 

وبتقر علي اخواتها  ....وبتحسدهم

رد ابويا بغضب

 قائلا

ريحي نفسك 

خلاص 

نعمة متقدملها عريس

 وكلها يومين وهتروح بيت جوزها

طبعا انا مصدقتش الي سمعتة من ابويا

 دلوقتي ده 

وقلت في نفسي

اكيد ابويا بيقول كلمتين لمراتة 

عشان تسكت 

وترفع الشبشب الي

 في  ايدها

 عني

لكن لقيت ابويا بليل بيتكلم معايا في الموضوع بجد

وبيقولي...

انا جاني ليكي عريس يا نعمة النهاردة...

وانا ووافقت

ولما سمعتة مراة ابويا

سالتة

قالت..

عريس مين يا ابو عريس

ده اكيد لسه مشفهاش

مش تستني لما يبقي يشوفها الاول؟

مين قالك انها هتعجبة؟

رد ابويا

قال..لا ريحي نفسك العريس شافها 

وعاجباه 

وسالتة مراة ابويا بدهشة

معقول عجبتة؟

ثم سالتة

 مرة اخري

قالت..وعنده مطرح علي كده؟

 ولا لسه هيركنها جنبة لما يبقي يلاقي شقة ؟

و تكون بنتك عدت الاربعين؟

رد ابويا

 قائلا

العريس عنده مطرح في القاهرة

واتفق معايا انه هيكتب كتابة علي نعمة 

وياخدها معاه تعيش في المدينة

صرخت مراة ابويا 

وهي بتقول

يا حومتي...

المدينة مرة واحدة؟

بقي انا بناتي القمرات يعيشوا هنا 

في البلد؟

ونعمة المقشفة

 تعيش في المدينة؟

رد ابويا

 قائلا

رزقها بقي ونصيبها

نظرت له مراة ابويا 

وهي تقول

وهتجهزها منين بقي ان شاء الله ؟

دا احنا فا ضل كام يوم 

والبنك يحجز علي البيت الي عايشين فيه 

بسبب القرض الي انت اخدتة

 عشان جهاز يارا

رد ابويا

 قائلا

اطمني

العريس قالي انه عايزها بشنطة هدومها

ومش عايز مننا اكتر من كده

طبعا انا كنت بسمع للحوار الي بين ابويا ومراتة 

وانا بقرص نفسي

 وبقول ...

اني اكيد بيتهيالي او بحلم حلم جميل وهصحي منه

معقول انا في راجل اتقدملي؟

معقول في حد هيمسك ايدي ؟

ويقولي كلام حلو زي كل البنات ...

والستات؟

معقول في حد هيبقي حنين عليا؟

معقول هبقي عندي بيت وعيال؟

معقول هدخل جوة الدنيا؟

 واعيش الحياة ؟

واشعر بمتعتها؟

ومكنتش مصدقة غير لما جه العريس

فعلا يوم الخميس

  وكتب الكتاب 

انا طبعا لغاية ما اتكتب كتابي

 مكنتش شوفت العريس

 وكنت عارفة ومتاكدة انه فيه عيب ما

يمكن عنده اعاقة معينة؟

 وممكن يكون دميم؟

وشكلة  قبيح

وممكن يكون عجوز؟

بس انا مكنش فارق معايا 

هو شكلة ايه؟

 اهم حاجة اني جالي عريس..

 (عريس يا امايا) 

لاني بصراحة مكتنش   هرفضة مهما كان

شكلة

وبعد ما مشي الماذون 

دخل ابويا عليا الغرفة

 وهو بيقولي..

حضرتي شنطتك  يا نعمة؟

قلت وانا انظر في الارض

ايوه يا ابويا

رد ابويا

 قائلا

طيب يلا..عشان العريس مستعجل

 عشان الميكروباص الي هتسافروا فيه 

مستني ادام الباب

قلت..حاضر

وخرجت خلف ابويا 

وفضلت ماشية وراه لغاية الصالة..

ولقيت ابويا بيقولي سلمي علي عريسك يانعمة

فا نظرت لذلك العريس وبصراحة ..اتصدمت 

لان العريس كان طول بعرض

 وشاب لم يتعدي الخامسة والثلاثين من عمره

يعني مش كبير في السن

وابيض... ووجهة مدور ...والدم هيبظ من شفايفة وخدودة...

واستغربت...

 وقلت في نفسي

يعني العريس مفيهوش عيب ..

امال ايه الي لطشوا في دماغة

 عشان يتجوزني؟

وقلت بيني وبين نفسي

يمكن زي ما بيقول ابويا كده نصيبي واخرة صبري؟

المهم ..سلمت علي ابويا واخواتي 

ومراة ابويا

 الي وقفت تبصلي وهي بتحسدني 

علي الاملة الي انا فيها

وكانت النار بتاكل قلبها 

ومكنتش قادرة تخبي نارها وكانت منكادة مني

لدرجة انها مكنتش بتبتسم حتي

 لغاية ما ابويا ركبني الميكروباص

 ومشيت مع عريسي

المهم..بعد ما ركبت مع عريسي 

الميكروباص..

افتكرتة هيفضل ماسك ايدي طول الطريق 

زي ما علي بيعمل مع البت يارا

وكنت فاكره 

ان العريس

هيفضل يعد الدقايق والثواني

 لغاية ما نوصل بيتنا 

بقي 

ويتقفل علينا باب واحد

لكن اتفاجئت 

ان العريس بمجرد ما ركب الميكروباص 

سابني وراح في النوم طول الطريق 

لغاية ما وصلنا القاهرة

وبعد ما وصلنا..دخلنا عمارة 

ولقيتة بيقولي ...

انا بشتغل غفير في العمارة دي 

وشاور علي اوضة في اول دور جنب الاسانسير

 وهو يقول..احنا هنعيش هنا

 ادخلي برجلك اليمين يا عروسة

طبعا انا اتكسفت جدا

وحطيت وشي في الارض

وقلت خلاص يا نعمة انتي كده نولتي الاملة 

ونزلتي القاهرة 

(بلد الجنا والملائكة)

واثناء منا بتلفت حوليا

ومش مصدقة الهنا الي  بقيت فيه

لقيت عريسي حسان مسك  الشنطة من ايدي

 ودخل ادامي 

وهو بيقول...افتحي الباب يا بت

واستغربت ؟

هو بيقول لمين افتحي الباب يابت؟

وقلت لنفسي 

يمكن تكون دي اخت من اخواتة 

وجاية تفرح باخوها وتفرحة

 في ليلة زي دي 

بما اننا معملناش فرح في البلد

لكن لما دخلت للاوضة اتفاجئت باتنين ستات تاني 

غير الي استقبلتنا

قلت عادي اخواتة او قرايبة

وشوية ولقيت العريس

بيعرفني بيهم

قال..سلموا علي العروسة الجديدة

اسمها نعمة

ثم نظر الي حسان عريسي

وهو بيعرفني بيهم

وهو يقول

ودول سيدة... ومحاسن ...وعديلة

تقدري تعتبريهم من النهارده اخواتك

طبعا انا سمعت اسمائهم فقط

 لكن معرفتش لغاية دلوقتي

 صلة القرابة الي بتجمعهم بيه

 وسالتة

قلت..هما دول اخواتك؟

ردت محاسن ودي كانت طويلة وعريضة وهجمة 

وقالت...اخواتة ده ايه يا غندورة ؟

احنا مرتاتة

يعني هو متجوزنا احنا الثلاثة

 وانتي الزوجة الرابعة

بصيتلها بدهشة

وانا اقول..الرابعة؟

ردت عديلة زوجتة الثانية

وهي تعاتب حسان

قائلة..

جري ايه يا عريس ؟ 

هو انت معرفتش العروسة انك متجوز ثلاثة قبلها ولا ايه؟

رد حسان 

قائلا

لا طبعا انا قلت لابوها وهو وافق 

وانا افتكرتة قالها

قلت..لا ابويا مقليش حاجة

ردت احسان الزوجة الثالثة

 وهي تكشر عن انيابها

قائلة..

متعمليش فيها عروسة جديدة 

ومستغربة يا معدولة 

انتي جيتي ولا روحتي زوجة رابعة

 وليكي دور وجدول 

معانا 

وليكي ليلة  واحدة في الاسبوع

 مش هتزيدي عنها

قلت... والليلة دي هقضيها انا وعريسي فين؟

قالت..هنا

قلت..وانتوا هتكونوا فين؟

قالت..بردوا هنا

قلت..امال انتوا فين الاوض بتاعتكم؟

ضحكت احسان بسخرية

 وهي تقول..

انتي فاكرة نفسك متجوزة قنصل الوز ؟

وحاجزلك في لوكندة سبع نجوم؟

اصحي يا غندورة

احنا هنا كلنا عايشين في الاوضة دي

قلت..طيب وبتناموا ازاي؟

ردت عديلة

قالت..يعني  الراجل هيعمل ايه في ازمة السكن دي ؟

وبعدين هي اوضة واحده 

واحنا هنا كلنا متعودين علي اننا ننام في حضن جوزنا

واحنا اسرة مع بعضينا

قلت..هو ايه الي اسرة مع بعتتتينا؟؟؟

لا طبعا مينفعش الكلام ده

ردت عديلة بثقة

قالت...ومالة لما ننام كلنا جنب جوزنا؟

مش عيب ولا حرام

 وجوزنا بيتعامل معانا كلنا هنا عادي

قلت عادي ازاي؟

قالت وهي تضحك ضحكة مستفزة

عادي في المعادي 

 يا بت ما تفكي كده

و بكره تتعودي زينا

وفي تلك اللحظة

سيبتني من عديلة خالص

والتفت لحسان زوجي 

وسالتة..

قلت..انت كان لازم تاخد راي في الاول

 وكان لازم تعرف ان كنت هقبل علي الوضع ده او لا؟

قال..ابوكي عارف وموافق

قلت..ابويا ممكن يكون كان عارف انك متجوز غيري

 لكن اكيد مكنش يعرف اننا كلنا هنام في غرفة واحدة

وفي تلك اللحظة

لقيت عديلة بتتحول وهي بتصرخ فيا 

وبتقولي..ما تفصلي بقي يا بت

 وتقولي فصلت

انتي كنتي فاكره نفسك 

جاية تتستتي هنا 

ولا ايه؟

 انتي من بكرة هتنزلي الشغل في البيوت

 عشان تجيبي مصاريفك زينا

نظرت لحسان زوجي وسالتة

قلت...انت ساكت ليه ؟

هما الي بيقولوه ده بجد؟

انت هتنزلني اشتغل من بكرة؟

نظر لي حسان وبدء يقنعني بهدوء

قال..يا نعمة انتي عارفة ان الحياة تعاون 

والمعيشة في القاهرة غالية

 وهنا الشغالة في القاهرة بتاخد في اليوم مبلغ وقدرة

وكلكم لما تنزلوا تشتغلوا هتجيبوا مبلغ حلو

 نقدر نحوش منه ونجيب منه شقة اوضة وصالة.... بعدين

وفهمت ساعتها طبعا

 ان حسان عريسي شخص عاطل ...

وواخد الاوضة دي بحجة انه بيحرس العمارة

لكن الحقيقة

 انه بيقعد هو طول النهار

 علي الدكة بتاعة

 البواب

وبيخلي زوجاتة يشتغلوا و يصرفوا عليه

وعشان كده هو اتجوزني عشان يستفاد من الايدي العاملة

من الاخر...

هو... متجوز اربعة

 عشان يخدموا في البيوت 

ويصرفوا عليه 

وده بس الي عرفتة لغاية دلوقتي 

واكيد...

ما خفي كان اعظم

وفي تلك اللحظة

سالتة

قلت..اه صحيح بمناسبة السكن؟

 انت بجد هتخلينا ننام كلنا في اوضة واحدة 

مع بعض 

عادي كده؟

رد حسان بمنتهي البرود قائلا

لا طبعا مين قال كده؟

مش كلنا هنام هنا

لان عديلة بتبات عند الناس الي بتشتغل عندهم

 وبتيجي خميس وجمعه بس

يعني طول الاسبوع هتبقوا  انتوا الثلاثة  بس الي معايا 

في الغرفة

 مش اربعة

وقبل ما ارد عليه

لقيت..عديلة بتشدني من ايدي 

وهي بتقول..

يلا بقي يا عروسة بطلي رغي كتير ...وقومي غيري هدومك 

عايزين نشوف حلاوة قمصان النوم بتاعتك...

 يلا عايزين نتفرج

قلت..تتفرجوا علي ايه يا ام سحلول انتي وهي؟

ثم نظرت لهم

 وانا اقول.... باصرار

قلت..لا طبعا مش هغير هدومي ادام حد

مهما حصل

وفي تلك اللحظة

قمن زوجاتة  الثلاثة من مجلسهم

 واقتربن مني جميعهن  وهنا كانت المفاجئه........

الجزء الثاني 

بعدما عرفت المصيبة السودة الي انا اتحطيت فيها 

والجوازة المهببة الي انا اتجوزتها

 وان عريسي حسان متجوز غيري ثلاثة

 وانا الرابعة.. 

وعرفت انه بيتقدم للبنات الي كبرت في السن 

لان اهلهم بيتساهلوا في جوازهم 

عشان يشغلنا في البيوت 

ويقبض من ورانا

و طلبوا مني زوجاتة اني اغير هدومي

 ادامهم عادي ...

عشان اقضي اول ليلة في دخلتي

 في نفس الغرفة الي هما كلهم قاعدين فيها وبيناموا فيها

فا طبعا انا رفضت 

وقلت مستحيل اغير ادام حد

فقاموا زوجاتة

باغلاق باب الغرفة 

 واتجمعوا عليا كلهم

عشان يهجموا عليا

فسالتهم ؟

وانا في منتهي الفزع منهم

قلت...انتوا هتعملوا ايه؟

 ردت عديلة مراتة وقالتلي

احنا سمعنا انك بنت بنوت

 والدخلة لازم تبقي بلدي

وانا طبعا

لما سمعت كلامها 

وشوفتهم وهما بيهجموا عليا

فضلت ارقع بالصوت

واقول... الحقوني يا ناس

حد يغيثني يا خلق

وفي اللحظة دي

سمعنا باب الغرفة

وهو بيخبط بطريقة قوية 

تشبة خبطات رجال الشرطة

 علي الباب اثناء ما بيهجموا علي المجرمين

والخبط كان جامد 

لدرجة ان الباب كان هيتكسر

فا توقف حسان و  زوجاتة

  ورفعوا ايديهم عني

عشان يشوفوا مين الي بيخبط علي الباب بالمنظر ده؟

وسال حسان بتردد

قال...مييين؟

ردت امراة من خلف الباب بغضب 

وهي تقول

...افتح يا زفت يا حسان..

فاوقف حسان في هلع يرتجف ..

بعدما سمع صوت تلك المراة

والاغرب من كده ان حريمه كمان كانوا مرعوبين منها 

وفضلوا يسكتوني 

ويقوليلي

اسكتي 

واقتربت مني عديلة وهمست في اذني

 وهي تقول 

اوعي تعملي اي صوت احسن دي ولية مجنونة

رسمي

 وممكن تقتلنا كلنا

 ومش هتاخد في حد فينا 

دقيقة واحدة حبس 

وواضح انهم كانوا فاكرين الست هتزهق وتمشي

 لما محدش يرد عليها 

لكن الي حصل

 انها زادت في الخبط علي الباب

 ولما خاف حسان علي الباب لا يتكسر

فتحلها الباب

ولما بصيت ناحية الباب

شوفت واحدة ست عفية..

لابسة نقاب اسود

 في اسود

ووقفت الست 

علي الباب

 لا راضية تدخل

 ولا راضية تمشي

ومكتفية انها تبص ناحيتنا فقط 

وكانها كانت جاية علي صوت صراخي

 وكانت عايزة تشوف احنا بنعمل ايه

 في الاوضه ؟

وايه موضوع الصراخ الي سمعتة

 من شوية؟

فا انتهزت انا فرصة خوفهم منها

وجريت عليها... وقولتلها..

الحقيني يا ست هانم ربنا يسترك

انا 

مش من هنا 

والراجل ده وحريمه عايزني اقعد معاهم بالعافية

والنبي ساعديني ارجع لاهلي

 ربنا يسترك

بعد ما استمعت تلك المراة لتوسلاتي...

لقيت عنيها بدات تخرج دخان

 من شدة الغضب 

واقتحمت الاوضة واقتربت مني

 ومسكت ايدي 

عشان تاخدني معاها ونخرج

فا امسك حسان زوجي بيدي

 وهو يقول...

 بصوت منخفض

 من شدة خوفه وقلقة منها

قال..ياست هانم 

متسمعيش كلامها دي مراتي علي سنة الله ورسولة 

والليلة دخلتنا

فا بصتلة الست المنقبة بصة فيها عصبية

 الدنيا

وراحت ضرباه  علي ايده 

الي كان ماسكني بيها 

...وشدتني من ايدي واخدتني وخرجنا ..

ولما مشيت معاها 

اكتشفت انها ساكنة في نفس العمارة 

وفي نفس الدور الارضي

 هي كمان

 لكن شقتها واخده الدور الارضي تقريبا كله

لاني لما دخلت شقتها لقيتها واسعة اوي 

وفيها عفش جميل

 من بتاع الناس الاكابر 

حاجة كده زي الي بيجي في التليفزيون

لكن الغريبة..

اني لما دخلت عندها الشقة

 وقفلت الست  الباب..

لقيتها سابتني في الصالة لوحدي

 ودخلت اوضه

 وقفلت بابها عليها 

وسابتني لوحدي في الصالة

وفضلت واقفة وانا بتلفت حوليا...

وكنت هخرج امشي

 لكن

 حبيت اشكرها 

واستاذنها اني امشي 

وبصراحة اكتر

كنت عايزة

اطلب منها ثمن تذكرة المواصلات لبلدنا

وفضلت انادي

واقول..ياست هانم 

وخبطت علي باب الغرفة

 الي دخلت فيها

لكن الباب بتاعها متفتحش... 

ومردتش عليا

فا رجعت تاني اقف في نفس المكان الي سابتني فيه في الصالة

لكن وانا برجع

 اتفاجئت

 بباب غرفة تاني

 بيتفتح

 وبيخرج منه ست كبيرة 

عجوزة وشكلها كده مريضة..

فا سالتني 

انتي مين وايه الي جابك هنا؟

قلت..السلام عليكم يا ست هانم

انا مدخلتش هنا لوحدي

الست بنتك هي الي دخلتني هنا

 والله يا ست

قالت..وفريدة بنتي جابتك هنا ليه؟

فا بصيتلها

 وسالتها

قلت..انا حكايتي طويلة اوي يا ست ام فريدة 

ممكن اقعد واحكيهالك؟

ابتسمت الحاجة ام فريدة 

وهي بتشاورلي 

وتقولي...اقعدي

فا مصدقت الست الطيبة دي تقولي اقعدي

وروحت قاعدة تحت رجليها...

وفضلت احكيلها حكايتي من اول طقطق لغاية سلاموا عليكم

فا بصيتلي الست 

بشفقة

وراحت قالتلي

تلاقي فريدة بنتي شافت الي حصل معاكي من شباك المنور

 فا اتعصبت وراحت هجمت علي البواب 

لان شباك غرفتة 

بيطل علي شباك المطبخ بتاعنا

اصل... فريدة بنتي بتكرة حسان البواب ده اوي

وضربتة اكتر من مرة قبل كدة 

لدرجة انها في مرة من المرات دول

 جابتلة  ارتجاج في المخ

قلت ربنا يحمي الست فريدة 

و يارب ديما تبقي نصيرة للغلابة

ردت ام فريدة 

قالت..اصلها يا قلبي من يوم الحادثة 

وهي عصبية

 واول ما حد بيعصبها  الي عليها بيطلعوا

قلت...سلامتها الست فريدة هي عليها عفاريت؟

ردت ام فريدة

قائلة...

ادعيلها بالشفاء

 يا...

انتي قولتلي اسمك ايه؟

قلت..خدامتك نعمة

وعندي طلب عند حضرتك متعشمة فيكي تعملهولي

قالت..خير عايزه ايه يا نعمة؟

قلت..عايزة ارجع بلدنا واعيش عند ابويا

 ومراة ابويا تاني

ومش عايزة حد يرجعني عند حسان

 لانة... عايز يشغلني في بيوت الناس

 ويقبض من ورايا

ردت ام فريدة

قالت..بس كده جوزك من حقة شرعا ...وقانونا انه يغصبك ترجعي وتعيشي معاه 

 في غرفتة مع حريمة 

طالما كتب كتابة عليكي 

محدش يقدر يمنعه عنك

نزلت تحت رجلها

وانا ببوسها

قلت..ابوس رجلك يا ست ام فريدة 

ما تخليه ياخدني عندهم تاني

ردت الحاجة 

وقالت...لاحول ولا قوة الا بالله

طيب اسمعي هو فيه حل تاني

قلت..حل ايه؟

قالت..انتي ممكن تستفادي من نزولك للقاهرة... وتشتغلي ....وتحوشي قرش لنفسك 

وساعتها هيبقي ليكي ذمة مالية خاصة بيكي

و هتقدري تستقلي بذاتك

 وتتحرري من قيود التبعية

قلت..يعني ايه؟

معلش يا ست وضحي كلامك؟

قالت..لما الست بتشتغل وبيكون ليها ماهية او ...راتب خاص بيها 

وبيبقي معاها قرش بيخليها تحس انها قويه 

لانها بتعتمد علي نفسها  ومش بتحتاج لاهلها ...

ولا لجوزها

 قلت..ايوه ...

بس انا هشتغل اية هنا ؟

دنا بفك الخط بالعافية؟

ردت ام فريدة 

قالت..هو مش جوزك حسان عايزك تشتغلي في البيوت؟

قلت..ايوه

قالت..خلاص اشتغلي لكن لحسابك انتي 

مش لحسابة هو

قلت..طيب ولو مرديش؟

قالت..امشي معاه بمبدء الي يزعل نسلخ وشة

قلت..معلش فهميني اكتر

قالت..مش انتي اصلا مستبيعة ؟

وعايزة تطلقي و ترجعي لبلدكم؟

قلت..ايوه

قالت..خلاص اشتغلي هنا 

واكسبي

 ولما حسان يطلب منك الراتب بتاعك ارفضي 

وقوليلة 

لو مش عاجبك طلقني

قلت..يعني حضرتك شايفة اني افضل هنا ومرجعش البلد؟

قالت..الافيد ليكي انك تشتغلي في القاهرة

 وتعملي قرش

 بدل ما تروحي لمراة ابوكي تتحكم فيكي 

تاني 

وتشغلك مرمطون ببلاش

استغلي مجهودك ده هنا واكسبي فلوس مقابل تعبك 

لانك كمان  لو سافرتي مراة ابوكي هتشمت فيكي 

وهتشغلك في البيت تاني خدامة بدون مقابل 

وبدل ما بتشتغلي في بيت ابوكي من غير فلوس 

اشتغلي هنا لحسابك

 وبدل ما حسان يستفاد من جوازة منك

 استفادي انتي من جوازك منه

قلت..بس انا هشتغل هنا فين؟

 انا معرفش هنا اي حد

 لاني لسة اول مرة انزل القاهرة النهاردة؟

وقبل ما الحاجة تجاوب علي سؤالي

سمعت الجرس بيرن

فقلتلها..

ابوس ايدك يا ست ام فريدة 

لو كان ده هو حسان متخليهوش ياخدني والنبي 

لغاية ما اشوف طريقة اقدر اهرب بيها  من هنا

ردت ام فريدة بثقة وهي بتقولي

متخافيش يا نعمة

تعالي اقفي ورايا

لما افتح الباب

وبالفعل فتحت ام فريدة الباب 

واتفاجئت بحسان جوزي

الي دخل يعيط

 وهو بيوطي علي ايد ام فريدة

 يبوسها...

 وهو بيشتكي من الي الست فريدة عملتة في الاوضة عنده

ردت الست ام فريدة بحسم

وسالتة

قالت...انت اية مشكلتك انت وزوجتك دلوقتي ياحسان ؟

رد حسان بادب القرود

قال...انا جايبها من البلد ياست... عشان تعيش زي ما باقي الحريم عايشين معايا

 وتشتغل زي ما هما بيشتغلوا في البيوت

وفي تلك اللحظة 

سالتني الست فريدة

قالت..وانتي ايه مشكلتك مع جوزك دلوقتي يا نعمة؟

قلت...انا عمري ما هقبل اعيش معاه في غرفة واحدة 

وزوجاتة كلهم عايشين معانا

ردت الست ام فريدة عشان تحسم المشكلة دي

قالت... بصراحة يا حسان نعمة عندها حق 

انها متقبلش تعيش معاك في اوضة فيها زوجاتك الثلاثة

 نايمين معاك فيها

وعشان كده لازم توفرلها اوضة خاصة بيها

قال ..منين بس يا ست الكل؟

 منتي عارفة الظروف

فا رديت انا باصرار

قلت...وانا مش هتمم جوازي منك 

غير لما تجيبلي اوضة اعيش فيها لوحدي

قال..ده اخرة المعروف الي عملتة فيكي ؟

ده بدل ما تبوسي ايدي اني اتجوزتك؟

 بعد ما كنتي معنسة وجيبتك من الفلاحين للقاهرة؟

 وفي تلك اللحظة

اتفتح الباب 

وخرجت الست فريدة المنقبة مرة تاني

 من غرفتها 

وهي بتصرخ في حسان وبتقولة...

هو انت فاكر انك عملت فيها جميل ؟

عشان اتجوزتها يا 

عاطل ؟

ياالي النسوان بتشتغل وبتصرف عليك؟

ده جوازها منك

  ابتلاء ليها

 وتكفير ذنوب يا معفن

وقف حسان يرتعش

وفي الاخر بصلي وسالني؟

قال..اسمعي يا بنت الناس

 هي كلمة ابرك من الف

هتيجي تعيشي معايا في الاوضة 

زي ما نسواني الثلاثة عايشين ...وتشتغلي... وتساعدي 

في المعيشة زيهم ؟

اهلا وسهلا 

مش هتعيشي زيهم يبقي هرمي عليكي يمين الطلاق... واخليكي ترجعي لمراة ابوكي

 تبهدلك تاني؟

بصيت لحسان بتحدي

وانا اقول...

لا يا منيش راجعة للاوضة

 الي انت عايش فيها مع حريمك الثلاثة... 

وبعدين انا لية اكشف عورتي ادام الحريم؟

ومتهددنيش انك هترجعني لبيت ابويا تاني

لان علي راي المثل..

قعدة الخزانة ولا جوزاة الندامة

نظر لي حسان بغضب

وهو يقول..

بقي كده؟

طيب..روحي وانتي طالق بالثلاثة

وتركني حسان وخرج بعد ما طلقني

وفي تلك اللحظة

نظرت لي ام فريدة  بشفقة

وهي تقول...

لا حول ولا قوة الا بالله

ليه كده يا فريدة يا بنتي بس ؟

ما كنتي سيبتيه 

يصطفي مع مراتة بدون ما نتدخل بينهم

 يعني عاجبك انه طلق البنت الغلبانة دلوقتي بسببنا؟

وفي تلك اللحظة

بمجرد ما سمعت فريدة كلمات اللوم والعتاب

 من امها..

فضلت تشاور علي نفسها 

وهي بتقول..

بردوا انا السبب؟

انتي كل حاجة تقولي عليا اننا السبب؟

وخلعت فريدة عن وجهها النقاب

ليظهر وجهها الطفولي الرائع الجمال

فقد  بدت فريدة انثي مثل البدر في تمامة

 ولكنها قعدت جنب الحيطة

 وهي بتعيط ...وتصرخ 

وفي الاخر اصابتها بعض التشنجات 

ولما امها قربت منها عشان تهديها...

بدات فريدة تتكلم بصوت غريب

 ولهجة مش مفهومة ...

فا طلبت مني ام فريدة

 اني انادي لمبروكة من المطبخ...

 بسرعة

فا طلعت اجري علي المطبخ

ولقيت واحدة ست واقفة بتطبخ

فا قلتلها..تعالي يا حاجة مبروكة بسرعة

 الست ام فريدة عايزاكي

لكن مبروكة مبصتش حتي ناحيتي

فا شكيت انها تكون مش بتسمع

فا وقفت ادامها وفضلت اشاور لها بايدي 

عشان تيجي معايا تكلم ام فريدة

وبالفعل فهمت كلامي وجت معايا

واول ما وقفت مبروكة ادام فريدة...

فضلت فريدة تتكلم باصوات غريبة..

مره بصوت طفل صغير 

ومرة بصوت راجل

ومرة بصوت واحدة ست

وكان واضح فعلا ان الست فريدة ملبوسة زي ما امها قالت

ولقيتني بقول لنفسي

اتاري حسان كان خايف منها

 هو ونسوانة الثلاثة

لكن بصراحة..

مبروكة دي واضح ان في ايديها الشفاء..

لان بمجرد ما مبروكة ركزت نظرها في نظر فريدة 

والاتنين عنيهم جت في عنين بعض

 الا وفريدة رجعت تتكلم بصوتها الناعم الرقيق مرة تانية

ولقيت فريدة بتسال امها بكل هدوء

قالت..بجد يا ماما انا كنت سبب في اذية حد تاني؟

ضمتها امها لحضنها وهي بتبكي

 وقالتلها لا يا حبيبتي هي نصيبها معاه لحد كده

وفي تلك اللحظة

لقيت فريدة بتبصلي..

وهي بتبتسم 

وبتقول...فعلا يا ماما هي ربنا بيحبها

 انها خلصت من بني 

ادم اناني.... وانتهازي زي حسان ده

ومدت فريدة ايديها بااتجاهي 

وهي بتشاورلي 

وبتقولي...اعملي حسابك يا نعمة من النهاردة انتي هتشتغلي عندنا هنا 

في البيت

انا سمعت حكايتك وانا قاعدة جوة

وهديكي مرتب كبير عشان محدش يقدر يتحكم فيكي تاني

لا اهلك ولا اي حد

ردت الام بحزم

قالت..مينفعش يا فريدة نعمة تشتغل هنا

انتي ناسية مبروكة؟

ردت نعمة وهي تبتسم

قالت...مبروكة طيبة وعمرها ما هتعترض

 لما هتلاقينا بنفك كرب او بنساعد حد محتاج مساعدة

كررت ام فريدة تاني تحذيرها

وهي تقول..

طيب بردوا عشان خاطري

 استاذني مبروكة 

لانها ممكن متوفقش وساعتها الدنيا هتطين فوق دماغنا

فريدة سمعت الكلمتين من امها 

وفضلت محتفظة بابتسامتها 

وهي تقول...

حاضر

هسالها وتركتنا فريدة ومشيت

 وانا بصراحة

كنت مستغربة من الي بيحصل

وبسال نفسي

مين مبروكة الشغالة دي الي مدينها الاهمية دي كلها؟

وياتري بياخدوا رايها في كل حاجة في حياتهم ؟

ولا انا بس الي ممكن مبروكة كانت هتعترض علي شغلي عندهم؟

واثناء ما كنت بسال نفسي

لقيت فريدة خرجت من جوة 

وهي بتقول لامها

 ان مبروكة معندهاش مانع

 اني اشتغل في البيت عندهم

ولقيت ام فريدة

 بتقولي

خلاص يا نعمة

 انتي من النهاردة هتبقي واحدة من البيت ده 

واحنا هنعلمك كل الي مفروض تعملية هنا

واخدتني فريدة معاها لغرفتها 

واديتني بيجامة باكتاف عارية 

وطلبت مني اني ادخل استحمي والبسها

وبعد ما استحميت ولبست البيجامة 

الجميلة دي 

حسيت اني بقيت واحده تانية خالص 

حسيت اني بقيت شبة البنات ...والستات الحلوه

المهم بعد ما خلصت حموم

 اتكسفت اخرج من الحمام 

بالبيجامة دي

 اصلها كانت بحملات واكتافي كلها كانت عريانة

 لكن الي شجعني اني اخرج بيها 

ان الست فريدة كانت لابسة حاجة شبهها 

وكمان احنا كنا كلنا ستات في البيت 

ومفيش راجل معانا

المهم دخلت بعد ما خلصت 

مع الست فريدة

عشان...

 تعرفني علي البيت عندهم

 وابقي عارفة مكان كل حاجة

واخدتني ودخلنا للصالون 

ولفت نظري انهم حاطين صورة كبيرة في الصالون

 لشاب في العقد الثالت

من العمر

ومعاه في الصورة واحدة ست في نفس عمرة

  ومعاهم كمان طفلة

 بس لاحظت ان  علي الصورة شريطة سودة

  فسالت الست فريدة

قلت..قرايبكم دول يا ست فريدة؟

بصت الست فريدة في الارض بحزن 

وقالت...ده اخويا هشام  ومراتة وبنتة الله يرحمهم

قلت...الله يرحمهم

وسالتها

هما ماتوا صغيريين كده؟

ردت فريدة بصعوبة

وقالت...الله يرحمهم ماتوا في حادثة عربية

كلهم

 هو... ومراتة.... وبنتة

 وهما راجعين من المصيف

قلت ...الله يرحمهم يا ست فريدة

هزت الست فريدة ىاسها وداست علي زرار النور 

وخرجت وقفلت نور الاوضة

 وهي بتقول...

الله يرحمهم

وخدتني الست فريدة ودخلتني في غرفة صغيرة 

جنب المطبخ 

وهي بتقول...دي غرفة مبروكة 

لو عايزة تنامي في الاوضة نامي

 فيها يا نعمة

فقلت في نفسي

هي مبروكة دي شكلها مرعب اصلا

وممكن غرفتها تكون كلها عفاريت

 فقلت...لا يا ست فريدة معلش

 انا هنام في اي حتة 

انشلة المطبخ

 بس بلاش اوضة مبروكة

فقالتلي خلاص الي يريحك

لو عايزة تنامي في المطبخ الليلة 

افرشي.... و نامي

 لغاية ما نشوفلك بكرة مكان تنامي فيه

قلتلها ماشي

المهم بعد ما اتعشينا قعدت شوية مع ام فريدة

 وسالتها 

هي الست فريدة متجوزة؟

ردت ام فريدة

قالت..ايوه متجوزة بس جوزها سايبها عندي شوية

 عشان اعصابها تعبانة من ساعة الحادثة

قلت ربنا يصبر قلبكم يارب

بصتلي الحاجة

 وسالتني

قالتلي...هو انتي ليه بتسالي كتير؟

قلت..انتي زعلتي يا ست انا اسفة

قالت...شرط عشان تشتغلي هنا لازم متساليش وتبقي في حالك

ميغركيش فريدة دلوقتي في حالتها الطبيعية 

لكن انتي متعرفيش لما بتتعصب 

والحالة بتجيلها بتبقي عاملة ازاي؟

قلت...خلاص يا ست

 انا مش هسال بعد كده عن اي حاجة تاني

فقالت..خلاص روحي نامي

 عشان تصحي بدري

 وتنضفي بدل مبروكة عشان مبروكة 

سافرت بلدها

قلت حاضر

وفعلا

دخلت للمطبخ لقيت الست فريدة نسيت تجيبلي فرش 

في المطبخ ...

فقلت ادخل لغرفة مبروكة 

عشان اخد اي حاجة انام عليها 

في المطبخ

لكن الغريبة اني وانا رابحة  لغرفة مبروكة .....عديت علي اوضة تانية

 كانت مقفولة

 وسمعت صوت الست فريدة بتتكلم مع راجل جوه الاوضة دي

فا قلت يلهوي يظهر الست فريدة جتلها الحالة تاني

 ودلوقتي مبروكة مش موجودة 

فا ربنا يستر

وتذكرت في اللحظة

 دي

 كلام ام فريدة

لما قالتلي خليكي في حالك

وفعلا. قررت اروح لغرفة مبروكة

 عشان اجيب حاجة افرشها في المطبخ 

وفتحت غرفة مبروكة لكن اتفاجئت

 بالست فريدة في غرفة مبروكة

بتىتسم ليا 

وهي بتقولي

تعالي يا نعمة

 انا مستنياكي من ساعتها

 عشان تاخدي الفرشة

وقلت ..يلهوي يا امه

 لما الست فريدة هنا ؟

امال مين الي كان في الغرفة المقفولة؟

وبصراحة مقدرتش امنع نفسي

  ولا قدرت اصبر

ورجعت للاوضة الي سمعت فيها الاصوات

عشان اشوف مين الي في الاوضة المقفولة؟

 ولما وصلت للاوضة المقفولة

وفتحتها ...

مصدقتش نفسي 

لما فتحت الباب....

 لاني شوفت حاجة لا يتصورها عقل......

الجزء الثالث 

بعدما شوفت الست فريدة في غرفة مبروكة استغربت

وقلت في نفسي

 ازاي الست فريدة في اوضة مبروكة؟

امال مين الي كان بيتكلم في الاوضة المقفولة؟

فا رجعت بسرعة

 علي الاوضة المقفولة 

وفتحتها بسرعة

 عشان اتفاجئ

 بشيئ رفض عقلي يستوعبة

لاني شوفت ادامي الست فريدة 

في الاوضة المقفولة 

وكانت قاعدة مدياني ظهرها 

وحواليها قطط كتير 

والغريبة انها كانت بتتكلم مع القطط

بصوت واطي

 وبتشاور لهم كانهم بني ادميين 

وفاهمين كلامها

طبعا انا وقفت علي باب الاوضة

 وانا مذهولة ...وخايفة

لان الوضع كان مرعب

وسالت نفسي

ازاي الست فريدة موجودة في اكتر من مكان؟

 في وقت واحد؟

وخوفت لا يكونوا القطط دول كمان ؟.....

ربنا الحفيظ

فا رجعت بالراحة وقفلت الباب عليهم تاني 

عشان ميخدوش بالهم اني شوفتهم

و رجعت بسرعة علي غرفة مبروكة

 والمصيبة اني لقيت الست فريدة لسة قاعدة منتظراني

 في غرفة مبروكة 

ومحضرة الفرشة 

وبتقولي خدي الفرشة اهية

اخدت منها الفرشة وانا بقول في نفسي 

هي كام فريدة في البيت بس ياربي؟

لكن انا طبعا مكلمتهاش في حاجة

 لاني كنت مرعوبة

فا اخدت الفرشة الي هنام عليها

 وروحت علي المطبخ جري...

فرشت الفرشة وحاولت انام عشان

 اهرب من الرعب الي

 انا شوفتة

لكن النوم جفاني 

ومعرفتش اغمض عيني طول الليل

لكن فضلت احايل في نفسي

 عشان انام 

واثناء منا بحاول النوم

سمعت صوت باب الشقة بيتقفل

ولقيت الست فريدة 

داخلة وكانها 

كانت في مشوار 

ولسة راجعة من برة 

لانها كانت لابسة النقاب زي ما شوفتها اول مره

وقبل ما تدخل اوضتها

سالتها؟

قلت..تؤمريني باي خدمة

 قبل ما انام يا ست فريدة؟

وانتظرت ان الست فريدة ترد عليا

 ولكنها لم تلتفت الي 

ولقيتها قعدت علي الكرسي

 وهي ساكتة

وبتبصلي

فا قربت منها

 وقلتلها

يا ست فريدة انا بكلمك انتي مش بتردي عليا ليه؟

لكن بردوا مردتش في صعب عليا الحالة الي هي فيها

اصل بصراحة...

 حالتهاكانت صعبة اوي

 بسبب انها فقدت اخوها وعيلتة 

فا قربت منها

وحطيت ايدي علي كتفها

وقلتلها...حبيبتي انا حاسة بيكي

 وعارفة انك شوفتي كتير 

خلاكي تعبتي ونفسيتك تعبت

يعلم ربنا انا اد اية زعلانة عشانك

يا ست فريدة

 لانك طيبة وتستاهلي كل خير

ده كفاية الي انتي عملتية معايا

عشان كدة

انا عايزاكي ترمي من ورا ضهرك

 وتعيشي حياتك

 انتي لسه صغيرة ....وحلوة ... والحياة ادامك

وياريت تعتبريني حد قريب منك 

ولو عايزة تتكلمي معايا اتكلمي

 ومتكتميش في نفسك

لان الكبت وحش

 وجربيني واتكلمي

 معايا

  وهتلاقي سرك في بير 

بعد ما قلت كل الكلام ده

 لقيت الست فريدة بتمسك ايدي

 الي علي كتفها 

وبعد ما بصت علي ايدي 

بعدت ايدي عنها 

وسابتني ودخلت لاوضتها من غير ما تتكلم معايا

 كلمة واحدة

وبالرغم من تصرفها ده

الا اني بصلتها وانا بدعيلها ربنا يشفيها من الي هي فيه

ورجعت للمطبخ تاني

وحاولت انام شوية

واخيرا نجحت اني انام شوية

وصحيت الصبح علي صوت ام فريدة

وهي بتقولي...اصحي يا نعمة

 جايلنا ضيوف وعايزين ننضف البيت بدري النهاردة

فا قمت وشيلت الفرشة الي في للمطبخ

 وبدات الشغل

وبعد ما خلصت شغل البيت 

كانت فريدة وامها 

قربوا ينتهوا من تجهيز الاكل

 عشان الضيوف الي مكنتش لسة عرفت هما مين

لكن لما لقيت الست فريدة 

غزالتها رايقة

 عرفت انها فرحانة بالضيوف الي جايين

فسالتها

قلت...هما مين الضيوف الي جايين يا ست فريدة؟

ردت فريدة

 قائلة

ده زيدان اخويا والتؤم بتاعي...

 انا ....وهشام

وسالتها

قلت..هو المرحوم كان التؤام بتاعك هو كمان؟

قالت...ايوه

قلت..هو انتوا كنتوا ثلاثة تؤام

هزت راسها باسف وهي تقول.. اه لكن دلوقتي بقينا تؤامين 

 واخويا الي جاي دلوقتي زيدان اخويا ....حبيبي

 وبالرغم من اني مش بحب مراتة

لكن فرحانة انه جاي اوي

وسالتها

قلت..وهو حضرتك مش بتحبي مراتة ليه

يا ست فريدة؟

ردت الست فريدة

قائلة

 عشان مغرورة ....وشخصيتها زبالة 

لكن انا اهم حاجة

 عندي

 ان  اخويا تؤامي جاي  اخيرا .... وهشوفة

قلت..ربنا يخليكم لبعض يا ست فريدة

وبعد شوية

لقيت الحاجة بتقول لفريدة 

 اخوكي زيدان اتصل يا فريدة 

وبيقول انه وصل هو ومراتة  ابعتي نعمة

تفتح الباب

فطلبت مني فريدة اني

اخرج افتحلهم

فطلبت منها

 اني اروح الاول البس حاجة

 بدل الحملات الي انا لابساه

 واكتافي العريانة دي

لكن فريدة صرخت فيا وهي بتقولي..

روحي بسرعة افتحي

يا نعمة

  احنا كلنا هنا بنلبس كده

واكدت ام فريدة علي كلام بنتها

 وهي بتضحك

و بتقول...

هو انتي فاكرة ان ابني ممكن يبصلك

 يا  يا بت نعمة ؟

ده عايش طول عمرة بره

 ومتجوز واحدة

 تقول للقمر قوم وانا اقعد مطرحك

 روحي يا بت بسرعة افتحي وبطلي هبل

قلت...حاضر

انا طبعا كنت خارجة افتح ومكسوفة اقابل الناس

 الي علي الباب 

وانا كده

وكنت بقول ...يا حيط داريني

و فتحت الباب زي ما الست فريدة وامها امروني...

 لكن اول  لما فتحت الباب 

وقفت متسمرة مكاني

لاني شوفت واحد ادامي

 صورة طبق الاصل من هشام

 الي في الصورة

وواضح فعلا انهم تؤام

ولما لاحظ الشاب الي ادامي اني ببصلة اوي

لقيتة بيبتسم

 وهو بيقولي...

احنا بقي عندنا ناس حلويين في بيتنا ولا اية؟

وقبل ما ارد عليه

ظهرت واحدة ست من وراة 

وكان واضح طبعا انها مراتة

لانها بصتلي من فوق لتحت باحتقار 

وهي بتقول...

ايه قلة الزوق دي؟

 هي مش فريدة عارفة اننا جايبن؟

 ازاي يتاخروا في فتح الباب ؟

وفي الاخر تخلي 

واحدة صحبتها هي الي تقابلنا علي الباب؟

ابتسمت لها وقلت بكل ادب

لا يا ست هانم 

 انا مش صاحبة الست فريدة 

انا بشتغل هنا

بصتلي تاني باحتقار واستعلاء

ولقيتها بتقول...

ولما انتي شغالة هنا؟

 ايه المسخرة الي انتي عاملاها في نفسك دي؟

وقبل ما ارد عليها

 لقيت فريدة خرجت من جوة 

ورمت نفسها في حضن اخوها 

وهي بتقول ...

زيدان حبيبي... وحشتني اوي 

يا اخويا

وبعدما دخل الجميع للصالون

دخلت انا المطبخ وانا بقول...

فعلا فرق كبير اوي

 بين ست فريدة وست نسمة

وفضلت اجهز السفرة مع الست فريدة 

و مرة واحده 

لقيت  زيدان بيه

 قام من مكانه ... وجه يساعدنا في تجهيز السفرة معانا

والغريبة اني كنت ملاحظة 

في عنية نظرات اعجاب 

اول مرة اشوفها في حياتي

 لاني عمري ما حد بصلي اصلا

والغريبة انه بيبصلي وهو معاه واحدة زي القمر

المهم انا طبعا  كنت بحاول مبصش ناحيتة

لاني كنت ملاحظة

 ان الست نسمة مراتة مركزة معايا

 ومع عنين  جوزها اوي

فا مصدقت اننا انتهينا من تحضير السفرة

ورحعت اقعد في المطبخ 

لكن بعد شوية

لقيت الست نسمة داخلة تعمل نسكافية

فا سالتها

قلت.. حضرتك عايزاني اعملك حاجة ؟

فا تجاهلتني الست نسمة

 ومردتش عليا..

وكانها استكبرت انها ترد عليا

فا سيبتها تعمل الي هي

عايزاة تعمله

وبعد شوية

 لقيت زيدان بية داخل المطبخ

ووقف جنب الست نسمة 

 وهو بيبتسم بكل زوق وبيقولي...

انتي اسمك نعمة؟

قلت..ايوه 

قال..ممكن تعمليلي شاي يا نعمة ؟

من فضلك

قلت..طبعا من عنيا هعمل لحضرتك شاي حالا

رد زيدان بية  مازحا 

وهو يضحك بسعادة

قال..شايفة يا نسمة 

اخيرا لقيت واحدة تقولي حاضر....

 ومن عنيا 

مش زي الفليبنيات الي جايبهملي متبرجمين علي كام كلمة

وبوزهم بيبقي شبرين

وفي تلك اللحظة

لقيت الست نسمة بتبصلي... وهي بتكلم  زيدان بية

 بسخرية

قالت ...

الشغالات الفلبينيات بيبقوا جايين تبع مكاتب توظيف

 ومتحرين عنهم بدقة 

وعارفين اصلهم من فصلهم

ده غير انهم بيبقوا نضاف 

ومتدربين علي العمل في بيوت الناس

لكن الشغالات المصريات بيبقوا معظمهم بنات شوارع

 وبنات ليل كمان

 لو حبيت

وفي الاخر  ممكن يسرقوك .....

او يقتلوك 

نظر لها  زيدان بيه بغضب 

وهو يستعد للخروج

 من المطبخ 

وهو يقول...

لا تعليق...

بجد مش لاقي كلام ارد بيه عليكي

وبعد ما خرج زيدان بيه من المطبخ

خرجت هي كمان وراه بعد ما اخدت النسكافية

وامرتني اني اخلص الشاي بتاع زيدان

 بية واجيبة علي الصالون

قلت ...حاضر

وبعد ما خرجوا وبقيت لوحدي

لقيت نفسي

مستغربة من الست نسمة ؟

هي بتعاملني كده ليه؟

معقول تكون بتغير مني انا  ؟

هو انا بيحسبوني من ضمن الستات اصلا؟

وبعدين ليه بتغلط فيا ؟

وانا معملتهاش اي حاجة

يعني هو عشان انا غلبانة ؟

وظروفي جبرتني علي الشغل هنا ؟

تسمح لنفسها انها تنبط عليا بالكلام

 و تسبني

 وتقول عليا بنت شوارع وبنت ليل كمان؟

ولقيت نفسي صعبت عليا نفسي

 ودموعي نزلت

واثناء ما كنت بعيط

سمعت صوت حنين اوي بيقولي

متزعليش يا نعمة 

حقك عليا انا

فا التفت بسرعة ناحية الصوت

ولقيته زيدان بية

 وقلت في نفسي 

معقولة ؟

زيدان بيه 

لحق يغير هدومة

 ويلبس ملابس مختلفة بالسرعة دي؟

المهم..بصيت ناحيتة 

ولقيتني بقولة

خاطرك علي راسي يا زيدان بيه

انا بس الي زعلني اني حسيت اني ضعيفة.... وذليلة 

لمجرد اني بشتغل عندكم 

ومقدرتش ارد عليها

 لما شتمتني 

وقالت ان الشغالات المصريات بنات شوارع وبنات ليل

ابتسم زيدان بية

وهو بيقول..

نسمة دي انسانه تعبان في دماغها

 متخديش علي كلامها

هي بس تلاقيها غيرانة منك 

عشان البيجامة الي انتي لابساها دي شكلها حلو عليكي 

قلت..معقولة

 وهو انا هاجي حاجة في جمالها ؟

دي الست نسمة زي القمر

رد زيدان بيه

 قائلا

للاسف نسمة غنية بجمال الشكل 

لكن فقيرة في جمال الروح ....والقلب

لكن انتي يا نعمة بتجمعي بين الاتنين

 عشان كده هي بتغير منك

بصيتلة باستغراب وسالتة..

قلت..حضرتك تقصد اني انا جميلة؟

قال..طبعا انتي جميلة يا نعمة 

وزي القمر 

وروحك... وبسطاتك بيزودوكي جمال

 فوق جمالك كمان

اتكسفت من كلامة 

وقلت اغير الموضوع 

فاقلت...الشاي بتاع حضرتك خلص

 اتفضل

ابتسم زيدان بية واخذ من ايدي الشاي

وهو بيقولي..تسلم ايدك يا نعمة

وتركني وخرج من المطبخ

ووقفت مذهولة وسرحانة في كلامة وانا مش مصدقة نفسي

وكنت فرحانة اوي

ايه ده يا جدعان؟

 انا اول مرة في حياتي حد يقولي اني جميلة

ومش اي حد

 ده انسان شيك ومتعلم وزي القمر

واثناء ماكنت واقفة سعيدة ...وسرحانة

سمعت صوت الست نسمة 

وهي بتزعقلي

وبتقولي..كل ده بتعملي في كوباية شاي؟

فين الشاي الي عملتية؟

قلت..منا اديت الشاي لزيدان بية

قالت..انتي مسطولة يا بت انتي؟

ولا بتشربي حاجة؟

زيدان مين الي خد الشاي؟

 اذا كان زيدان بية بعتني اخد منك الشاي حالا

قلت في نفسي 

لا بقي دنتي بتتلككي عشان تتخانقي 

فا سيبتها... وخرجت من المطبخ

 عشان اسال زيدان بيه ادامها واكسفها

لكن الغريبة اني لما روحت لزيدان بيه في الصالون

 لقيتة رجع غير هدومة تاني 

واصبح بالملابس الي كان لابسها اول ما وصل

 ووقفت ادامة وانا مستغربة

وقلت...يا حومتي ؟

وسالتة

قلت..هو مش حضرتك اخدت مني الشاي من شوية يا بية؟

رد زيدان بيه

 قائلا

شاي ايه الي اخدتة 

انا منتظر الشاي من ساعتها يا نعمة

 اخلصي

وقفت ابصلة وانا مش فاهمة في اية الي بيحصل

لكن قلت 

بيني وبين نفسي

 ممكن يكون مش عايز يفهم الست نسمة انه كان عندي في المطبخ من شوية 

ورجعت اعمل تاني الشاي 

لكن الي صدمني وكان هيجنني اني لما رجعت  للمطبخ لقيت كوباية الشاي علي الرخامة في المطبخ

فقلت ..لا اانا اكيد عقلي تعب وبقي يحصلي توهان

وعدي الموضوع

 وفي اليل 

كانوا كلهم سهرانين وبيضحكوا 

ما عدي الحاجة ام فريدة كانت نايمة في اوضتها

فا وقفت اتفرج عليهم من بعيد 

لكن لقيت فريدة بتقولي تعالي يا نعمة

 اقعدي معانا 

 قلت لا يا ست انا اتكسف 

وقبل ما ترد عليا ست فريدة

لقيت الست نسمة

 جاية بتمسكني من ايدي 

وهي بتقول...

لا متتكسفيش تعالي اقعدي ...

واشربي

 معانا من العصير السحري ده

وبعد ما اديتني الكوباية وشربت  منها

 حسيت اني دماغي لفت 

وبقيت بشوف حاجات غريبة

  وكنت شايفاهم كلهم بذيول

وبقيت بضحك زيهم بهبل

لكن مره واحدة

سمعت الست الكبيرة بتزعق

ولقيت ام فريدة بتصرخ في  الجميع 

وبتطلب من الكل يدخل ينام

وبعد ما السهرة خلصت 

دخلتني ام فريدة غرفة مبروكة

 عشان انام  فيها...

وبعد ما طفت النور وخرجت

حطيت راسي علي المخدة  

وانا لسة بضحك 

وفي تلك اللحظة 

شوفت فريدة داخلة عندي الاوضة

 وهي مغطية وشها 

ومعاها القطط بتاعتها

الي انا شوفتهم  قبل كده

وسالتها...

ايه القطط دي كلها يا ست فريدة؟

ردت فريدة

 قائلة

دول مش قطط

قلت..امال ايه دول؟

ردت فريدة 

وهي تقول

دول الاموات الي ماتوا مقتولين في عيلتنا

اترعبت من كلامها وسالتها

قلت..طيب وانتوا جايين هنا ليه؟

وعايزين مني ايه؟

قالت...عايزينك معانا

 يا قطة

ولما سمعت كلامها وفهمت قصدها

كنت هموت واتجمد من الرعب

 لولا ان الباب اتفتح

ودخل زيدان بية 

وفضل يضربها هي والقطط 

وطردهم بره الاوضة

وحذرهم يقربوا مني تاني

ولقيتة قرب مني 

وهو بيقولي...

هما صحيح كلهم معاكي هنا 

في البيت

لكن متخافيش 

طول منا معاكي

ولقيتة مسك ايدي وحط فيها خاتم قديم

 وهو بيقولي..

خلي الخاتم ده في ايدك 

واول ما تشعري انك 

خايفة 

او محتاجة حماية..

دوسي مرتين علي الخاتم ده

بصيتلة وانا متاكده اني في حلم 

وشوية وهصحي منه

لكن...لقيت نفسي ىهز راسي وبقول...حاضر

فا طلب مني اهدي ....وانام.... ومفكرش في الي حصل 

تاني

وبالفعل وضعت راسي علي المخدة

 ونمت ....

ولما صحيت الصبح 

عرفت طبعا اني كنت بشوف تهيؤات 

من تاثير العصير

بتاع امبارح

 الي شربتهولي ست نسمة

 عشان تعملني مسخرة وتتمهزق بيا

وقمت من علي السرير وانا دمي محروق 

من الست الي اسمها نسمة دي 

وقررت اني اروح للست ام فريدة 

واطلب منها تبعد الست نسمة عني

 لكن قلت لازم ادخل الحمام اغسل وشي الاول

وبالفعل دخلت الحمام  وحطيت ايدى تحت المية في الحوض

 ولما بصيت علي ايدي 

شوفت حاجة غريبة 

جدا

عارفين لقيت ايه؟

الجزء الرابع

بعدما زيدان طرد فريدة والقطط بتاعتها من الاوضة...

ولبسني في ايدي خاتم 

....

وقالي... اول ما تحسي انك محتاجة للحماية 

دوسي علي الخاتم... 

وطلب مني انام وانسي كل الي حصل

 وطبعا انا لما صحيت الصبح

 قلت لنفسي 

 ان كل الي حصل امبارح ده .. 

كان من تاثير شوية العصير 

الي شربتهم

وقررت اروح اشتكي للحاجة ام فريدة

من الست نسمة

لكن قلت ادخل اغسل وشي في الاول

و لما دخلت الحمام ومديت ايدي تحت المية